Ĩsaya 16 - AMASAKO ABOYTRTRE WA NYAMUHANGA AWAKAHULAWA MO BIBLIA

Eritsanda lyʼeMoabũ

¹ Mutume ekyana kyʼembũlĩ busana nʼomũtabalĩ wʼekihugo erĩtsũka eSela omo nzira yʼembwarara, erĩhĩka oko kitwa kya mwali wʼeSĩonĩ.

² Neryo, ngʼesyonyonyũ nʼehyana hyʼomo lutu, abali bʼeMoabũ basyabya batya oko bisokero byʼeArnonĩ.

³ Mutuhe amahano, mutswere. Muyire ekyũtũtũ kyawe kibye ngʼekiro omwʼitungi. Mũbĩse abahigawa. Simuhotere omũsayĩ.

⁴ Muleke abahigawa bʼeMoabũ bĩkale haguma nawe. Nĩkwa ubye ahʼerĩbĩsama busana nabo oko bũsũ bwʼoyũkaheraya. Kusangwa omũnyeyĩ abiriyirwa mo buyira, nʼerĩherya lyamũmbya, nʼabakanũbaya bahwereho omo kihugo.

⁵ Ekĩtũmbĩ kyʼobwami kyasyahanganĩbwa omwʼisasira. Omũtswerĩ asyĩkala kukyo omwʼitendiregula, omo hema ya Dawĩdĩ, kandi asyasondasonda erĩbanza libuya, nʼerianguha erikola eritunganene.

⁶ Twabĩrĩowa engulu yʼeriyiheka lyʼeMoabũ, kwʼakayiheka kutsibu; eriyipipa liwe, nʼeriyiheka liwe, nʼerihitana liwe. Emiyihalambo yiwe ni buyira.

⁷ Neryo Moabũ asyalira. Abosĩ bʼeMoabũ basyalira. Mwasyasĩmba busana nʼotutole twʼebĩnyũ twʼeKĩrĩ-haresetĩ, ngʼabandu abakagalawa nabi.

⁸ Kusangwa amalima wʼeHesĩbonĩ akuma, nʼemĩrĩkĩ yʼebĩnyũ yʼeSĩbũma; abakama bʼebihanda babĩrĩbũnangira emitahi eyowene yako yʼahisi eyahĩka eYazerĩ, nʼeriganga-ganga nʼerĩhĩka oko mbwarara; amasasa wayo abiripanzikana hali, abirisoka engetsi.

⁹ Neryo nasyalira ekiriro busana nʼeYazerĩ busana nʼomũlĩkĩ wʼeSĩbũma. Nasyakũtũlĩra kwʼemĩsonĩa yage ngʼamagetsi, uwe Hesĩbonĩ, nʼeEleale, kusangwa olukuko busana nʼebĩgũma byawe byʼomugulu gʼomwisi nʼamagese wawe lwabĩrĩũmbya.

¹⁰ Obutseme nʼeritsanga byabĩrĩlũsĩbwa okwʼirima erĩboyĩre; kandi sihali eriimba omo malima wʼebĩnyũ, kutse omulenge wʼobogo wʼobutseme. Sihali omũkamĩ oyukakama ebĩnyũ omo mihe, kusangwa nabĩrĩhũnerya erĩũta obogo.

¹¹ Kikaleka omutima wage ĩnĩahũma ngʼekinanga busana nʼeMoabũ, nʼomutima wage akahũma omwisi busana nʼeKĩrĩ-heresĩ.

¹² Neryo omugulu Moabũ akayireta, omugulu akayĩlũhaya eriya ahʼendata huwe nʼerĩhĩka ahabũyĩrĩre huwe erisaba, siendisyatoka.

¹³ Ekĩ nĩ kĩnywa ekyo Mwami Mukulu abũga busana na Moabũ kera.

¹⁴ Nĩkwa lino Omwami Mukulu akabũga ati, Omo mugulu wʼemyaka ĩsatu, ngoko omũhĩngĩ akaganzayo, olukengerwa lwʼeMoabũ lwasyaponwa, haguma nʼendeko nene yiwe yosĩ. Abakasĩgala buwe basyabya bake kũndũ isibawite maka.