Ĩsaya 14 - AMASAKO ABOYTRTRE WA NYAMUHANGA AWAKAHULAWA MO BIBLIA

Erisuba lya Ĩsraelĩ

¹ Omugulu Omwami Mukulu asyaganyira Yakobo, nʼeriswayisoga Ĩsraelĩ, nʼerĩhĩrabo omo kihugo kyabokyabo. Neryo abʼehandi basyayitomeka kubo nabo basyamatana oko kĩtũnga kya Yakobo.

² Ebihanda byasyĩmyabo nʼeriretabo aho wabo. Ekihanda kya Ĩsraelĩ kyasyasĩgalyabo mo mwandu omo kihugo kyʼOmwami Mukulu ngʼabagombe bʼobulume, na busana nʼabatsana; kandi basyĩmya abanyegabo eribya abanyegwa babo; kandi basyatabalira abanũbayabo.

Olwimbo lwʼerĩkĩnda eBabelĩ

³ Neryo oko kiro ekyo, Omwami Mukulu asyakũlũhũkya oko bwagalĩ bwawe, nʼoko mwaga wawe, nʼoko munubo owakalĩre ogo bakũnũbayamo.

⁴ Wasyatwa omũsyo oyũ, busana nʼomwami wʼeBabelĩ, uti, Oyũkanũbaya amatsira ati! Nʼerihitana lyamatsira liti!

⁵ Omwami Mukulu abĩrĩbũnanga omũtso wʼababi, omũtso wʼabatabalĩ,

⁶ Abo basiba bakaswĩrya ebihanda omwʼihitana, omwʼĩswĩrya erĩtyũmbaya, abakĩnda ebihanda omwʼihitana, nʼerĩendererya erĩtakakĩrĩbawa.

⁷ Ekihugo kyosĩ kikaluhuka, kĩkere bũkũtũ. Nʼerĩũta obogo bwʼobutseme.

⁸ Ega, ebĩlagũ bikakutsemera, nʼemĩerezĩ yʼeLebanonĩ yiti, kusangwa wabĩrĩhĩrwa ahisi, Sihali omũbatsĩ oyũkatũhĩkako eritukonda.

⁹ Ekũlĩmũ, ikakutsemera, erĩhĩndana nawe okwʼĩhĩka lyawe; ĩkahanganaya ebĩrĩmũ byʼabaholĩ busana nawe, abasondolĩ bosĩ bʼekihugo, ĩkahanganaya abami bosĩ bʼebihanda, oko bĩtũmbĩ byabo byʼobwami.

¹⁰ Abo bosĩ basyakũsũbũlya ibakubwira bati, Nawe wabiriyirwa mo molo nga twe! Nawe wabiribya nga twe!

¹¹ Obubuya bwawe, nʼemirenge yʼesyonanga syawe. Byabĩrĩandagalĩrĩbwa eKũlĩmũ. Emihuka yabiriseswa eyĩkwa kuwe ngʼengyingo, nʼemihuka yabere ekĩkũnĩngo kyawe.

¹² Wamatoga uti erĩlũa elubula, uwe ngũnũnũ yʼengyakya-ngyakya, omugala wʼomusakala! Wabĩrĩtũbwa ahisi oko kitaka, uwe wolobaya ebihanda!

¹³ Nĩkwa mowabũga omo mutima wawe, uti, Nasyahetukira elubula, nasyasumbira ekĩtũmbĩ kyage kyʼobwami endata oko syongũnũnũ sya Nyamuhanga, nasyĩkala oko kitwa, kyʼamahĩndano, omo bihande byʼendũlĩ yʼelutambi lwʼendata.

¹⁴ Nasyahetukira endata kwilaba obuli bwʼebĩtũ, nasyayĩrĩngĩrĩranĩa nʼOwendata Kutsibu.

¹⁵ Nĩkwa wasyandagalĩbwa erĩhĩka eKũlĩmũ, oko mbande syʼendũlĩ syʼobuhya.

¹⁶ Abakakulolako basyakuhanda kwʼameso, basyakũganĩrya, bati, Oyũ ni mundu oyo watĩtĩmanaya ekihugo, Oyo wasũka-sũkanaya amami kwehĩ?

¹⁷ Oyo wayira ekihugo mo mbwarara, nʼerĩkĩnda emĩyĩ yamo, oyutabohola abandu bʼomũlĩkĩ buwe erĩkũlũka ewabo kwehĩ?

¹⁸ Abami bosĩ bʼebihanda babirilambama ahisi omo lukengerwa. Obuli mundu omo nyũmba yiwe, ĩyowene-wene ye yisinda.

¹⁹ Nĩkwa uwe wabiriguswa eyĩhya okwʼisinda yawe, ngʼomutahi owakwĩrwe nye, iwambite olukimba ngʼabandu bĩtawa, Abatsimitawa omo mũyalĩ, Abakandagala oko mabwe wʼobuhya, Ngʼekĩnda ekĩryatangĩrĩrwe omo bisando.

²⁰ Siwendisyasangana nabo omwʼitabwa, Kusangwa wabĩrĩtsandya ekihugo kyawe, wabĩrĩta abandu bawe. Abana bʼabakola-nabi, sibahulawe kera na kera.

²¹ Ũkokotaye engwĩro, busana nʼabana buwe, busana nʼebibi byʼabotata wabo. Sibahangane bakasĩgalya ekihugo, nʼerĩũsũlya ekihugo mwʼemĩyĩ.

²² Omwami Mukulu wʼemilondo ati, Nasyahangana erilwa nabo, nʼerĩtwa erĩna nʼabasĩgalira bʼeBabelĩ, nʼabana, nʼomwitsikulu, Omwami Mukulu akabũga atya.

²³ Nasyahĩraho obwĩkalo bwʼendĩko, nʼekisesa kyʼamagetsi, nasyabĩryaho omo lũbĩryo lwʼerĩherya. Omwami Mukulu wʼemilondo atya.

Erisuyira Asũrĩa

²⁴ Omwami Mukulu wʼemilondo abĩrĩlahĩrya ati, Kwenene, ngoko nabĩrĩganĩrya, ko kyabiribererera kitya. Kandi ngoko nabirikandayirira ko kyasyahangana kitya.

²⁵ Nyiti nasyabũnanga Asũrĩa omo kihugo kyage, kandi nasyamulyatangirira oko bitwa byage. Neryo engomo yiwe yasyalũsĩbwa kubo, nʼomuheke wuwe asyalũsĩbwa oko kitigo kyabo.

²⁶ Erĩ ni ʼkandayirira eryakandayirirawa busana nʼekihugo kyosĩ; nʼebĩ ni byala byabirisumbwa erilwa nʼebihanda byosĩ.

²⁷ Kusangwa Omwami Mukulu wʼemilondo abirikandayirira, kandi nindi wasyalĩba-lĩbanĩalyo kwehĩ? Ebyala biwe byabirisumbwa, kandi nindi yo wasyasũbyabyo enyũma kwehĩ?

Eriminyerera busana nʼAbafĩlĩstĩnĩ

²⁸ Oko mwaka ogo mwami Ahazĩ aholako eriminyerera erĩ molyahĩka.

²⁹ Uwe Fĩlĩstĩa, Sutseme, ĩnywe bosĩ, kusangwa engonĩ eyakũswĩraya yabĩrĩtwĩka; kusangwa enzwira yasyalũa omo mũlĩhĩ wʼenzoka, nʼehyana hyayo hyasyabya enzoka eyikaguluka yʼomuliro.

³⁰ Nʼakambere kʼabera kasyalya, abandu abo abatawite erĩwatĩkĩbwa basyalya, nʼabandu bʼobwaga basyagotsera buholo. Nage nasyĩta omũlĩhĩ wawe nʼenzala, nʼenzala yasyĩta abandu bawe abakabala.

³¹ Ulire, uwe lũkyo, ulire, uwe mũyĩ, wabirisendekerera uwe Fĩlĩstĩa, ĩnywe bosĩ, kusangwa omũkĩ akasira elutambi lwʼendata, kandi sihali oyũsĩgalĩre omo milondo yiwe.

³² Neryo omundu asyasũbĩrya abakwenda bʼekihanda bo ati kwehĩ? Ngoko Mwami Mukulu abirihanda eSĩonĩ, bʼabandu buwe abagalawa basyasagirayo.