Ĩsaya 1 - AMASAKO ABOYTRTRE WA NYAMUHANGA AWAKAHULAWA MO BIBLIA

Obutsibu bwʼabandu ba Nyamuhanga

¹ Obũlĩme bwa Ĩsaya mugala wa Amosĩ, obo alangira busana nʼeYũda nʼeYerũsalema, omo biro bya Ũzĩa, Yotamũ, Ahazĩ, na Hezekĩa, abami bʼeYũda.

² Mũhũlĩkĩrĩraye, ĩnywe kyanya, mutege amatwĩ ĩnywe kihugo, kusangwa Omwami Mukulu abĩrĩbũga ati, Nabirilembera nʼerĩkũlya abana, kandi babirihona kwĩngye.

³ Enume yʼende ĩnasĩ omwenyeyo, nʼepunda ĩnasĩ olugo lwʼomwenyeyo, nĩkwa Ĩsraelĩ sĩasĩ, nʼabandu bage sibeminya.

⁴ Ĩlolo, uwe kihanda kyʼebibi, abandu bakalĩtoherawa nʼamalolo, abana bʼabakola-nabi, abana bʼerĩtsandya! Babĩrĩsĩganĩa Omwami Mukulu, babiripona Oyũbũyĩrĩre wa Ĩsraelĩ, babirimutswako.

⁵ Ko ni hahi mwasyaswasuyirwa, imukinahona kwehĩ? Omutwe gosĩ alwere, nʼomutima gosĩ akalembera.

⁶ Erĩtsũka oko buliatiro bwʼekisando erĩhĩka oko mutwe omubiri gosĩ siali ndeke; bye nʼebironda, nʼamakũbũke, nʼemĩbĩbũ mihya-mihya. Sibyetasengwa, kutse eribohwa, kutse erĩheherĩbwa omo magũta.

⁷ Ekihugo kyenyũ nĩ kĩma; emĩyĩ yenyũ yahĩre omo muliro. Amalima wenyũ, abakalũa ehandi babiriryago embere syʼameso wenyũ, nago nĩ kĩma ngʼekĩkaherĩbawa nʼabandu abalũa ehandi.

⁸ Kandi mwali wʼeSĩonĩ abĩrĩsĩgala ngʼakategeryo omwʼirima lyʼebĩnyũ, ngʼekirindiro omwʼirima lyʼebyobe, ngʼomũyĩ agoterwe.

⁹ Kumbe Omwami Mukulu Wʼemilondo, atalĩtũsĩgĩra akasakĩrya kake kutsibu, nga twabiribya ngʼeSodomo, nga twabiribya ngʼeGomora.

¹⁰ Mowe ekĩnywa kyʼOmwami Mukulu, ĩnywe batabalĩ bʼeSodomo; mutege amatwĩ oko bihano bya Nyamuhanga wetu, ĩnywe bandu bʼeGomora.

¹¹ Omwami Mukulu ati, Erikanyirira ryʼamahere wenyũ nĩkĩ ũkwʼĩngye kwehĩ? Bibye bingaho, amahere wʼerĩokererya wʼesyombangale busana nage, nʼebĩsabũ byʼesyonyama sĩnenehĩre. Sinditsemera omusasi wʼesyonume syʼesyonde, kutse owʼehyana hyʼesyombũlĩ, kutse owʼesyombaya.

¹² Omugulu mukasa erĩyĩkangya embere syage, nindi yuliababwira ati mulyatange omo bibuga byage kwehĩ?

¹³ Simusyereta esyohongo syenyũ sya busa; obukwa ni nye ũkwʼĩngye. Omugenda muhya-muhya nʼeSabato, nʼeribirikira amahĩndano, sinangabegera obubi haguma nʼerĩhĩndana lĩbũyĩrĩre.

¹⁴ Omutima wage akagalirawa oko migenda mihya-mihya yenyũ, nʼebiro bikulu byenyũ ebĩhamwĩre bĩkanyĩrĩtohera. Ngaluha erihekabyo.

¹⁵ Omugulu mukasumba ebyala byenyũ, nasyababĩsa ameso wage. Ega, omugulu mũkakanyĩrĩraya erisaba lingi, sĩndĩendĩowa. Ebyala byenyũ byoswĩre nʼomusasi.

¹⁶ Mũyeraye, muyikose. Mũlũsaye obubi bwʼerikola lyenyũ embere syʼameso wage. Mũmbaye okwʼikola ebibi.

¹⁷ Mwige erikola ndeke. Mũsonda-sondaye erĩbanza litunganene, mũwatĩkaye oyũkanũbĩbawa, mũlekeraye engũbĩ, mwimire omũkwakalĩ.

¹⁸ Omwami Mukulu ati, Mwase lino, tũkanaye haguma. Nomo ebibi byenyũ byangabya ngʼengula, byasyabya byeru ngʼenzururu. Nomo byangabya ngʼomunyama, byasyabya ngʼobweya bwʼesyombũlĩ.

¹⁹ Mwamalĩga nʼerĩowa, mwasyalya ebibuya byʼekihugo.

²⁰ Nĩkwa mwamagana nʼerihona, mwasyalibwa nʼomũyalĩ. Kusangwa obuno bwʼomwami Mukulu bo bwabĩrĩbũgakyo.

²¹ Ko mũyĩ owateregula amahinduka ati eribya mũsĩngĩrĩ, owabya oswĩre mwʼerĩbanza lyʼekwenene! Ebitunganene byabya bĩkere mugo, nĩkwa lino muli abĩtĩ.

²² Ebĩtsĩpa byawe byamabya mahungu, nʼebĩnyũ byawe, byamatũlũngana nʼamagetsi.

²³ Abatabalĩ bawe ni bandu bakahona, nĩ bĩra bʼabĩbĩ. Obuli mundu anzĩre esigulo, bakakwama ebihembo. Sĩberekeraya esyongũbĩ, kandi olubanza lwʼabakwakalĩ sĩlũlĩhĩka embere syabo.

²⁴ Busana nʼekyo, Omukama, Omwami Mukulu Wʼemilondo, Ogʼobũtokĩ bwa Ĩsraelĩ ati, Ega, nasyayĩlũsya oko nzĩgũ syage, nʼerĩyĩkĩsya oko nzĩgũ syage.

²⁵ Kandi nasyahĩra ebyala byage eribya bũyĩgũ ukʼuwe, nʼerĩtsũya amahungu wawe go ndeke omo lũtũtũ, kandi nasyakũlũsya kwʼebĩkokyo byʼekyuma.

²⁶ Kandi nasyasũbya abatswerĩ bawe ngoko babya erĩmbere, nʼabahanĩ bawe ngoko babya okwʼĩtsũka. Enyũma wʼaho wasyahulwa mo mũyĩ wʼeritunganene, mo mũyĩ owateregula.

²⁷ Sĩonĩ asyatongolĩbwa omwʼĩbanza litunganene, nʼababĩndũkĩre erireka ebibi basyatongolĩbwa omo litunganene.

²⁸ Nĩkwa abakahalaya nʼabakola-nabi basyahĩnokala haguma-guma, nʼabakasĩganaya. Omwami Mukulu basyahwa.

²⁹ Kusangwa basyakwa esĩsonĩ busana nʼemiti yʼeterebĩntĩ yʼesyosanamu esyo mwayĩtsũtsa, kandi mwasyahemuka busana nʼamalima wʼemiti mwayisoga.

³⁰ Kusangwa mwasyabya ngʼomuti wʼeterebĩntĩ ebikoma byago bikuma, kandi ngʼeririma erite mo magetsi.

³¹ Embangĩ yasyabya ngʼembũmba, nʼomũbĩrĩ wuwe ngʼengulukira, litya abosĩ babiri basyahya haguma, isihali oyo wasyalĩmĩryabo.