Hosea 9 - AMASAKO ABOYTRTRE WA NYAMUHANGA AWAKAHULAWA MO BIBLIANyamuhanga asyasuyira Ĩsraelĩ busana nʼamalolo wabo 1 Uwe Ĩsraelĩ, Sutseme busana nʼeritsema, ngʼebihanda! Kusangwa wabĩrĩsĩngĩra erĩlũa uku Nyamuhanga wawe; wabirianza erĩkondesya oko buli kibuga kyʼengano. 2 Ekibuga kyʼerĩhũmbĩrako, nʼekikamiro kyʼebĩnyũ sĩbyendĩsyalĩsyabo, nʼebĩnyũ bihya-bihya byasyamubulako. 3 Sĩbendĩsyĩkala omo kihugo kyʼOmwami Mukulu; nĩkwa Efũraĩmũ asyasuba eMĩsĩrĩ, kandi eAsũrĩa basyalya akalyo katowene. 4 Sĩbendĩsyũtũlĩra amahere wʼebĩnyũ oko Mwami Mukulu, amahere wabo sĩendĩsyamũtsemesya; obundu bwabo bwasyabya kubo ngʼakalyo kʼabandu abakalira; abosĩ abakalya kuko basyatsanda; kusangwa akalyo kabo kasyabya busana nʼengumbu yabo; sikendisyingira omo nyũmba yʼOmwami Mukulu. 5 Mwasyakolakĩ oko kiro kyʼerĩhĩndana lĩbũyĩrĩre, oko kiro kikulu kyʼOmwami Mukulu kwehĩ? 6 Kusangwa, lebaya, basyagenda busana nʼerihera; eMĩsĩrĩ yasyakuma-kumabo, Memfĩsĩ asyatabo; ebiti byasyaheka ebindu byabo byʼebĩtsĩpa; emisakisaki yasyabya omo mahema wabo. 7 Ebiro byʼerisuyira byahĩkĩre, ebiro byʼerĩtũhũlya byahĩkĩre; Ĩsraelĩ baminye omwatsi oyũ, omũmĩnyererĩ nĩ mũkĩrũ, omundu wʼekĩrĩmũ oyũ nĩ mũsĩre, busana nʼobungi bwʼebibi byawe, na kusangwa obũyĩgũ ni bunene. 8 Efũraĩmũ abya mũteya haguma na Nyamuhanga wage; abya mũmĩnyererĩ, nĩkwa ekitego kyʼoyukahamba enyonyũ kiri omo syonzira siwe syosĩ, kandi obũyĩgũ buli omo nyũmba ya Nyamuhanga wuwe. 9 Babĩrĩyĩtsandya kutsibu, ngʼomo biro bya Gĩbea; Nyamuhanga asyibuka ebibi byabo, asyasuyira amalolo wabo. 10 Moneya Ĩsraelĩ ngʼebĩgũma byʼebĩnyũ omo mbwarara; monalangira abotata-kulu wenyũ ngʼamayilula wʼomuti wʼomũtĩnĩ owakatsũka eriheta. Nĩkwa mobasa eBaalĩ-peorĩ, mobayihigula oko kindu kyʼesĩsonĩ, mobabya nye ngʼekyo banzĩre. 11 Nĩkwa Efũraĩmũ, olukengerwa lwabo lwasyaguluka ngʼenyonyũ. Sihendisyabya eributa kutse omukule, kutse oyũkahekĩbawa obukule. 12 Nomo bangakũlya abana babo, nĩkwa nasyaholĩabo, isihali mundu oyo wasyasĩgala; ega, obũlĩge kubo omugulu nasyalũa kubo! 13 Efũraĩmũ ngoko nalangira, ahandĩrwe omo kiharo kyowene; nĩkwa Efũraĩmũ asyahũlũkya abana buwe busana nʼerĩkwa. 14 Uhebo, uwe Mwami Mukulu wasyaha bokĩ kwehĩ? Uhebo enda yʼerĩtesya nʼamabere awũmĩre. 15 Ebibi byabo byosĩ biri eGĩlĩgalĩ; kwenene eyo monakwabo obusu! Busana nʼobubi bwʼemikolere yabo nasyahigabo balũe omo nyũmba yage; sindiendisyanzabo kandi; abanya-mwami babo bosĩ nĩ bahonĩ. 16 Efũraĩmũ abĩrĩkwa, omũlĩhĩ wabo abiriuma, sibendisyabuta ebĩgũma; ega, nomo bangabuta abana, nĩkwa nasyĩta abana babuya abanzĩrwe bʼenda yabo. 17 Nyamuhanga wage asyagusabo, kusangwa sibetamuhulikirira; nabo basyabya baganga-gangĩ omo katĩkatĩ kʼebihanda. |
Bible in Kinandi © Bible Society of the Democratic Republic of Congo, and Bible Society of Uganda, 1980.
Bible Society of the Democratic Republic of Congo