Hosea 7 - AMASAKO ABOYTRTRE WA NYAMUHANGA AWAKAHULAWA MO BIBLIA

Eritsanda lya Ĩsraelĩ

¹ Omugulu nyanzĩre erĩlamya Ĩsraelĩ, neryo ebibi bya Efũraĩmũ bikaswikulawa, nʼebibi byʼeSamarĩa; kusangwa bakakola nʼeriteba, nʼomũrahĩ akingiramo, nʼomulondo wʼabanyeyĩ bakahũnga eyĩhya.

² Ĩsĩbeganĩraya omo mitima yabo ngoko ngibuka ebibi byabo byosĩ; lino emikolere yabo yabĩrĩtĩmba kubo; bali embere syʼobũsũ bwage.

³ Bakatsemesaya omwami omo bibi byabo, nʼabanyamwami omo mabehĩ wabo.

⁴ Abosĩ nĩ basĩngĩrĩ; bali ngʼerĩokeryo erĩhũhĩbwe nʼomũtsũmbĩ wʼobundu; akaleka erĩtũnda omuliro, erĩtsũka okwʼitsumba ekyanga, erĩhĩka aho bwamabĩhamĩbwa.

⁵ Oko kiro kyʼOmwami wetu abanya-mwami mobayĩlwalya omwʼĩhũhana lyʼebĩnyũ; mwasumba ebyala biwe haguma nʼabakasekereraya.

⁶ Kusangwa emitima yabo iri ngʼerĩokeryo, omugulu bakasegera oko mbĩta yabo erihitana lyabo lĩkatũmba omo kiro kyosĩ; omo ngyakya likaka ngʼekirimi kyʼomuliro. Abosĩ bahũhĩre ngʼerĩokeryo, kandi bakabũga ngʼabatabalĩ babo.

⁷ Abami babo bosĩ babiritera; sihali muguma wa kubo oyukanyilakira.

Abaĩsraelĩ sibesuba uku Nyamuhanga

⁸ Efũraĩmũ, akayĩtũlũnganaya omo bihanda; Efũraĩmũ ni mbiga ĩtabĩndwĩre.

⁹ Abʼehandi bakabuga amaka wuwe, nĩkwa ĩsĩasĩkyo; akayira esyombwĩ nĩkwa sĩasĩkyo.

¹⁰ Nomo eriyiheka lya Ĩsraelĩ likamuhandikirira; nĩkwa sibetasuba oko Mwami Mukulu, Nyamuhanga wabo, kutse erĩmũsonda-sondya busana nʼebĩ byosĩ.

¹¹ Neryo Efũraĩmũ abiribya ngʼakalĩkũkũ kakĩrũ, akate nʼobowĩka; bakabirikira eMĩsĩrĩ, ibakaya eSũrĩa.

¹² Omugulu basyagenda, nasyasanza obutaha-taha bwage endata kubo; nasyandagalyabo ngʼesyonyonyũ syʼekyanya; nasyasuyirabo nʼerĩtũlago oko ndeko yabo.

¹³ Obũlĩge kubo, kusangwa babiritala hali kwʼĩngye! Olũkũ kubo, kusangwa babiriyisamambula ũkwʼĩngye! Nanganza erĩtongolyabo, nĩkwa babirinyisingika kwʼamabehĩ.

¹⁴ Kandi sibetanyilakira nʼomutima wabo, omugulu bakamĩraya oko syongyingo syabo; bakahĩndana busana nʼengano nʼebĩnyũ bihya-bihya; bakanyĩlũako.

¹⁵ Nomo nanabĩrĩkangĩrĩryabo nʼerĩkalya amaboko wabo, nĩkwa bakahimbika ebibi busana nage.

¹⁶ Bakabinduka nĩkwa butsira erĩlolya endata; bali ngʼobuta obukateba; abakulu babo basyawa omo mũyalĩ busana nʼeritsatsuha lyʼolulimi lwabo. Ekĩ kyasyabya erisekwa lyabo omo kihugo kyʼeMĩsĩrĩ.