Hosea 6 - AMASAKO ABOYTRTRE WA NYAMUHANGA AWAKAHULAWA MO BIBLIA

Eriminya Nyamuhanga lĩlabĩre amahere

¹ Mwase tusube oko Mwami Mukulu; kusangwa abiritutulanga, nĩkwa akandĩtũlamya; abĩrĩswĩrya, naye akandisyatusenga-senga.

² Enyũma wʼebiro bibiri asyatũsũbya; nʼoko kiro kyʼakasatu asyatũhanganĩa, itwatoka eribyaho embere siwe.

³ Neryo tuminye, tukwamirire eriminya Omwami Mukulu. Erihongoka liwe nĩ kũndũ ngʼomo ngyakya-ngyakya; naye asyatũhĩkako ngʼembũla, ngʼembũla yʼenyũma eyĩkaheheraya ekitaka.

⁴ Uwe Efũraĩmũ, ngandisyakukolakĩ kwehĩ? Uwe Yũda nasyakukolakĩ kwehĩ? Kusangwa obubuya bwawe buli ngʼekĩtũ kyʼengyakya-ngyakya, kandi ngʼekimi ekĩkalũaho omo tũtũtũ.

⁵ Busana nʼekyo nabiritemabo mo bitswe-bitswe omo byala byʼabamĩnyererĩ; nabĩrĩtabo omo bĩnywa byʼobuno bwage; nʼesyonzwere ukʼuwe siri ngʼekyakakala ekikahuluka.

⁶ Kusangwa ngasonda obubuya, butsira amahongo; kandi eriminya Nyamuhanga kwilaba amahere wʼerĩokererya.

⁷ Nĩkwa ibo nga Adamu babĩrĩhalya endagano. Aho babirinyikola nabi nʼerinyiteba.

⁸ Gĩleadĩ nĩ mũyĩ wʼabakakola nabi; awite olugobe olwʼomusasi.

⁹ Ngʼemilondo yʼabandu abakahũnga bakalindirira omundu, litya endeko yʼabahererĩ ĩkĩta omo nzira eyikalola eSekemũ; kwenene, bakakola ebĩtĩsĩrĩre.

¹⁰ Omo nyũmba ya Ĩsraelĩ nabirilangira ekindu kibi kutsibu; obũmalaya bwa Efũraĩmũ buliho. Ĩsraelĩ abĩrĩyĩtsandya.

¹¹ Nibya, uwe Yũda, hali erigesa eryabiritegekwa busana nawe, omugulu nasyasũbũlya abanyegwa bʼabandu bage.