Hosea 4 - AMASAKO ABOYTRTRE WA NYAMUHANGA AWAKAHULAWA MO BIBLIA

Nyamuhanga akakunga Abaĩsraelĩ

¹ Ĩnywe bana ba Ĩsraelĩ, mowe ekĩnywa kyʼOmwami Mukulu; kusangwa Omwami Mukulu ali nʼomwatsi haguma nʼesyondũlanĩ syʼekihugo, kusangwa sihali kwenene, kutse obubuya, kutse eriminya Nyamuhanga omo kihugo.

² Hali eritsuma nʼeriteba, nʼerĩĩta, nʼerĩĩba, nʼerĩsĩngĩra; bakakola nʼomwaga, nʼerĩũta omusasi likakwama erĩũta omusasi.

³ Kikaleka ekihugo ikyalira, nʼobuli mundu oyo wĩkeremo akabonda, haguma nʼesyonyama syʼomolĩ, nʼesyonyonyũ syʼekyanya; ega, nʼamahere wʼomo ngetsi akabulirana.

⁴ Sihabye mundu oyukalwa; kutse Sihabye mundu oyukakunga; kusangwa abandu bawe bali ngʼabakalwa nʼomũhererĩ.

⁵ Nawe wasyatwĩkala omwʼitungi, nʼomũmĩnyererĩ asyatwĩkala haguma nawe omo kiro; nage nasyatogotya koyo wawe.

⁶ Abandu bage bamaherĩbwa eribula eriminya. Kusangwa wabirigana eriminya, nage nasyakugana nibya, eribya mũhererĩ wage. Kusangwa wabiribirirwa emigambo ya Nyamuhanga wawe, nasyibirirwa abana bawe nibya.

⁷ Omugulu bakanyirira kutsibu, mobanvĩhalĩrya kutsibu; nasyabindula olukengerwa lwabo mwʼĩsonĩ.

⁸ Bakalya omo malolo wʼabandu bage, nʼerĩhĩra omutima wabo oko bubi bwabo.

⁹ Neryo ngoko abandu bali, abahererĩ ko bali batya; nage nasyasuyirabo busana nʼesyonzira syabo, nasyalihabo busana nʼemikolere yabo.

¹⁰ Nabo basyalya, ĩsĩbendĩsyũgũta; basyakola obũmalaya, isibendisyakanya; kusangwa babirireka erĩlandya ameso oko Mwami Mukulu.

¹¹ Obũsĩngĩrĩ, nʼebĩnyũ, nʼebĩnyũ bihya-bihya bĩkalũsaya eriminya.

¹² Abandu bage bakabũlaya esanamu yabo yʼomuti, nʼomũtso wabo wʼobũkũmũ akabwirabo; kusangwa omutima wʼeriteta abĩrĩtalyabo, babirikola obũmalaya, erĩlũa uku Nyamuhanga wabo.

¹³ Bakahongera amahere oko syosingi syʼebitwa, nʼerĩhĩsya obukwa oko hitwa, nʼomo ndĩna yʼomwelo, nʼesyʼomulubwa, nʼomũerezĩ, kusangwa ekyũtsũtsũ kyayo kyowene; busana nʼekyo abali benyũ bakakola obũmalaya, nʼabaherũkĩ benyũ bakakola oluteto.

¹⁴ Sindiendisyasuyira abana-bato benyũ omugulu bakakola obũmalaya, kutse abaherũkĩ benyũ omugulu bakateta; kusangwa abalume ĩbobene bakayisolola haguma nʼabatetĩ, kandi bakahonga mahere haguma nʼabamalaya; nʼabandu bateminya basyaherĩbwa.

¹⁵ Nawe Ĩsraelĩ, nomo wangakola obũmalaya, nĩkwa Suleke Yũda akabana omusango; kandi Simugende eGĩlĩgalĩ, kutse simuhetukire eBetĩ-awenĩ, kutse sĩmũlahĩraye muti, Ngoko Mwami Mukulu aliho.

¹⁶ Kusangwa Ĩsraelĩ akalĩre, ngʼenyana yʼende ĩkalĩre; lino Omwami Mukulu angatoka erĩrĩsyabo ngʼekyana kyʼembũlĩ omo lũlĩsĩryo lunene kwehĩ?

¹⁷ Efũraĩmũ abĩrĩyĩhĩra oko syosanamu, mumuleke ĩyowene.

¹⁸ Ebĩkakũndaya byabo byabirihwa, bakakola obũmalaya emigulu yosĩ; abatabalĩ babo banzĩre esĩsonĩ kutsibu.

¹⁹ Erihunga lyabiriswikabo omo bĩpũpa byalyo; kandi basyahemuka busana nʼamahongo wabo.