Hosea 11 - AMASAKO ABOYTRTRE WA NYAMUHANGA AWAKAHULAWA MO BIBLIA

Olwanzo lwa Nyamuhanga busana na Ĩsraelĩ

¹ Omugulu Ĩsraelĩ abya mwana, monamwanza oko mugulu oyo, monabirikira mugala wage erĩlũa eMĩsĩrĩ.

² Omugulu abamĩnyererĩ babirikirabo kutsibu, mobalenga kutsibu erĩlũa kubo; mobahongera Baalĩ, mobahĩsya obukwa busana nʼesyosanamu.

³ Nĩkwa ĩngye monĩgĩsya Efũraĩmũ eribasula, monatelulabo; nĩkwa mobataminya ko nalamayabo.

⁴ Monakurabo omo ngoba syʼomundu, nʼomo bikono byʼolwanzo; monabya kubo ngʼomundu Oyukasumba engomo omo mikese yabo; monũnama nʼerĩrĩsyabo.

⁵ Sibendisyasuba omo kihugo kyʼeMĩsĩrĩ; nĩkwa Omũsũrĩa asyabya mwami wabo kusangwa bagana erinyisubako.

⁶ Omũyalĩ asyawa oko mĩyĩ yabo, asyaherya esyongomo syʼolũkyo lwabo, nʼeribugabo busana nʼamahano wabo.

⁷ Nʼabandu bage abahatikene erĩnyĩlũako; nomo abamĩnyererĩ bangabirikirabo oko yuli endata, sihali oyũkamũhamaya.

⁸ Uwe Efũraĩmũ nasyakuleka nyiti kwehĩ? Uwe Ĩsraelĩ, nasyakugana nyiti kwehĩ? Nasyakuyira nga Adama nyiti kwehĩ? Nasyakukola nga Zeboĩmũ nyiti kwehĩ? Omutima wage abĩndwĩrwe omwisi wage, amaganĩryo wage abiriaka haguma.

⁹ Sindiendĩsyaberererya obukali bwʼerihitana lyage, sĩndĩendĩsyaswaherya Efũraĩmũ kandi. Kusangwa ĩngye indi Nyamuhanga, Sindi mundu; Oyũbũyĩrĩre omo katĩkatĩ kawe; kandi sindiendisyasa omwʼihitana.

¹⁰ Basyakwamirira Omwami Mukulu, asyaruruma ngʼendale; kwenene asyaruruma, nʼabagala buwe basyasa bakalũa ebwanga bwʼeyĩkwa nʼerititimana.

¹¹ Basyasa bakatitimana ngʼesyonyonyũ esĩkalũa eMĩsĩrĩ, kandi ngʼehĩrĩkũkũ ehĩkalũa omo kihugo kyʼeAsũrĩa; kandi nasyĩkalyabo omo manyũmba wabo, Omwami Mukulu akabũga atya.

¹² Efũraĩmũ akanyĩtĩmbako nʼamabehĩ, nʼekĩtũnga kya Ĩsraelĩ kĩkanyĩtĩmbako omwʼiteba; Yũda naye akaleta omwaga uku Nyamuhanga, akaleta omwaga oko Yũbũyĩrĩre, oyuteregula.