Hosea 10 - AMASAKO ABOYTRTRE WA NYAMUHANGA AWAKAHULAWA MO BIBLIA

Eririha lyʼamalolo

¹ Ĩsraelĩ nĩ mũlĩkĩ owabogĩre, akahetaya ebĩgũma busana naye. Ngʼobungi bwʼebĩgũma byago abĩrĩkanyĩa amaherero wuwe; nʼomo bubuya bwʼekihugo kiwe abiriyira obubuya bwʼesyondũyĩ sĩbũyĩrĩre.

² Omutima wabo abirilegula; lino bakandisyaheka omusango wabo. Omwami Mukulu asyatũndũla amaherero wabo, asyaherya esyondũyĩ syabo sĩbũyĩrĩre.

³ Kwenene lino basyabũga bati, Situwite mwami; kusangwa situlikenga Omwami Mukulu; nʼomwami naye, angatukolerakĩ kwehĩ?

⁴ Bakabũga ebĩnywa bya busa, ĩbakalahĩraya nʼamabehĩ eriyira esyondagano; Ukwʼekyo eritswera likahangana ngʼomuhokolo omo mahya wʼeririma.

⁵ Esyondũlanĩ syʼeSamarĩa syasyubaha kutsibu busana nʼekyana kyʼende kyʼeBetĩ-awenĩ; kusangwa abandu bako basyalirakyo nʼabahererĩ bako abatsemerakyo busana nʼolukengerwa lwakyo, kusangwa lwamalũa kukyo.

⁶ Ekindu ekyo kyasyatwalwa oko Asũrĩa eribya engemu oko mwami Yereba; Efũraĩmũ asyasyĩtwa esĩsonĩ, na Ĩsraelĩ asyĩtwa esĩsonĩ busana nʼebihano biwe.

⁷ NʼeSamarĩa yasyakwa haguma nʼomwami wako, ngʼomuti endata wʼamagetsi.

⁸ Nʼahʼendata hʼeAwenĩ nibya, bye bibi bya Ĩsraelĩ, hasyaherĩbwa; emisakisaki nʼamatolũ byasyalasa oko maherero wabo; nabo basyabwira ebitwa bati, Mutuswike! Nʼoko hitwa bati, Mututerereko!

⁹ Uwe Ĩsraelĩ, wabĩrĩhalya, erĩtsũka ebiro byʼeGĩbea; eyo mukahangana! Amalwa oko bana bʼebibi siendisyatangabo eGĩbea kwehĩ?

¹⁰ Omugulu kĩkanyĩtsemesaya nasyasuyirabo; nʼebihanda byasyahĩndanĩbwa erilwa nabo, omugulu babohĩrwe nʼebibi byabo kabiri.

¹¹ Neryo Efũraĩmũ ni nyana eyakangĩrĩrĩbawa, eyikanza eriryatangirira engano; nĩkwa nasyahĩka oko bĩkya bibuya byayo omo ngomo; nasyahĩra omũgendya uku Efũraĩmũ; Yũda asyalima, Yakobo asyatulanga ebirongwe biwe.

Ni mugulu wʼerisonda-sonda Nyamuhanga

¹² Muyibibire omo litunganene, mugese omo bubuya; mulima-lime ekitaka ekĩtalĩmĩre; kusangwa ni mugulu wʼerisonda-sonda Omwami Mukulu, erĩhĩka aho asyasira nʼerĩbaheherya omo mbũla yʼekitunganene.

¹³ Mwabiririma ebibi, mwabirigesa ebitatunganene; mwabirirya ebĩgũma byʼamabehĩ, kusangwa mowayiketera enzira yawe, omo bungi bwʼesyombangĩ syawe.

¹⁴ Busana nʼekyo olukanda lwasyahangana omo katĩkatĩ kʼabandu bawe, nʼebikongotere byawe byosĩ byasyaherĩbwa, ngoko Salmanĩ aheraya eBetĩ-arbelĩ oko kiro kyʼamalwa; omugulu abokoyo bagusawa mo bitswebitswe haguma nʼabana babo.

¹⁵ Ko kyasyakolwa kitya busana nʼebibi binene byenyũ. Omo mwĩtsange omwami wa Ĩsraelĩ asyatogotĩbwa.