Hosea 1 - AMASAKO ABOYTRTRE WA NYAMUHANGA AWAKAHULAWA MO BIBLIA

Hosea akahĩkaya Omũmalaya erĩkangya Ĩsraelĩ epono yabo

¹ Ekĩnywa kyʼOmwami Mukulu mokyahĩka uku Hosea, mugala wa Beerĩ, omo biro bya Ũzĩa, Yotamũ, Ahazĩ, na Hezekĩa, abami bʼeYũda, omo biro bya Yeroboamũ, mugala wa Yoasĩ, omwami wʼeĨsraelĩ.

² Omugulu Omwami Mukulu abũga na Hosea, Omwami Mukulu mwabwira Hosea ati, Ugende, ũyĩhĩkĩraye omũkalĩ wʼoluteto nʼabana bʼobũtetĩ; kusangwa ekihugo kikakola obũsĩngĩrĩ bunene, erĩlũa oko Mwami Mukulu.

³ Neryo Hosea mwagenda mwĩmya Gomerĩ mwali wa Dĩblaĩmũ; naye mwaheka obukule mwamubutira mugala.

⁴ Neryo Omwami Mukulu mwamubwira ati, Wahule erĩna liwe mo Yezreelĩ; kusangwa oko kandi katambĩ, nasyakĩsya omusasi wa Yezreelĩ oko kĩtũnga kya Yehũ, nasyatsĩrĩsya obwami bwʼekĩtũnga kya Ĩsraelĩ.

⁵ Neryo kyasyabya oko kiro ekyo nasyabũna obuta bwa Ĩsraelĩ omo musya wa Yezreelĩ.

⁶ Neryo omũkalĩ mwaswaheka obukule, mwabuta mwali. Neryo Omwami Mukulu mwabwira Hosea ati, Umwahule mo Lorũhama; kusangwa Sindiendisyaganyira kandi ekĩtũnga kya Ĩsraelĩ, eribuyirabo nʼahake.

⁷ Nĩkwa nasyaganyira ekĩtũnga kya Yũda, nasyalamyabo oko Mwami Mukulu Nyamuhanga wabo, ĩsĩndĩendĩsyalamyabo omo buta, kutse omo mũyalĩ, kutse omo malwa, kutse omo syosabayĩrĩ, kutse omo bagendya bʼesyosabayĩrĩ.

⁸ Neryo omugulu omũkalĩ amabĩtsĩrĩsya Lorũhama erionga, neryo mwaswaheka obukule, mwabuta mugala.

⁹ Neryo Omwami Mukulu mwabũga ati, Wahule erĩna liwe mo Loamĩ; kusangwa Simuli kihanda kyage, nage Sindiendisyabya Nyamuhanga wenyũ.

¹⁰ Nĩkwa emiganzo yʼabana ba Ĩsraelĩ yasyabya ngʼomusege wʼengetsi, owate angatoka erirengwa kutse eriganzwa; neryo kyasyabya, aho bakabwirawa, ambu Simuli bandu bage, basyabwirwa, muli bagala ba Nyamuhanga oyuliho.

¹¹ Nʼabana ba Yũda nʼabana ba Ĩsraelĩ basyahĩndanĩbwa haguma, basyahĩra omũsondolĩ muguma, kandi basyahetuka bakalũa omo kihugo; kusangwa ekiro kya Yezreelĩ kyasyabya kikulu.