Hagaĩ 2 - AMASAKO ABOYTRTRE WA NYAMUHANGA AWAKAHULAWA MO BIBLIA

Omwami Mukulu akasĩkaya emitima yʼabahĩmbĩ

¹ Oko mukera wʼeyirinda, oko kiro kyʼamakũmĩ abiri nʼekiguma kyʼomukera, ekĩnywa kyʼOmwami Mukulu mokyahĩka oko mũmĩnyererĩ Hagaĩ kiti,

² Lino ubwire Zerũbabelĩ mugala wa Salatĩele, omũtabalĩ wʼeYũda, na Yosũa mugala wa Yosadakĩ omũhererĩ mukulu, nʼoko bandu abasĩgalirako ũbũge, uti,

³ Nindi yukiri omo katĩkatĩ kenyũ oyo walola oko Hekalũ eyĩ omo lukengerwa lwayo lwʼerĩmbere kwehĩ? Na lino mukalangirayo muti kwehĩ? Omo meso wenyũ erĩrĩngĩrĩranĩasyo haguma, siri nga buyira kwehĩ?

⁴ Nĩkwa lino uwe Zerũbabelĩ, Ũsĩkaye omutima, Omwami Mukulu atya; nawe Yosũa, mugala wa Yosadakĩ, omũhererĩ mukulu, Ũsĩkaye omutima; nʼĩnywe bandu bosĩ bʼekihugo, mũsĩkaye emitima, mukole, Omwami Mukulu atya; kusangwa indi haguma nenyũ, Omwami Mukulu atya.

⁵ Nĩkwa ngʼekĩnywa ekyo nalagana nenyũ, omugulu mwalũa eMĩsĩrĩ, Omũlĩmũ wage ĩkere omo katĩkatĩ kenyũ; simubahe!

⁶ Kusangwa Omwami Mukulu Wʼemilondo ati, Hakĩsĩya ngendo nguma, nĩ katambĩ kake, ĩnasũkanĩa olubula, nʼekihugo nʼengetsi, nʼekitaka kyũmĩre.

⁷ Omwami Mukulu Wʼemilondo ati, Nasyasũkanĩa ebihanda byosĩ; nabo basyasa nʼobũsokĩ bwʼebihanda byosĩ; nage nasyũsũlya enyũmba eyĩ nʼolukengerwa.

⁸ Ebĩtsĩpa ni byage, nʼesyamagetsi ni syage, Omwami Mukulu atya.

⁹ Olukengerwa lwʼerĩnyũma lwʼenyũmba eyĩ lwasyabya lunene kwilaba olwʼerĩmbere, Omwami Mukulu Wʼemilondo atya; nʼOmwami Mukulu Wʼemilondo ati, Omo mwanya oyũ nasyaha Obuholo.

Erĩtĩndatũla oko bĩtsandĩre

¹⁰ Oko kiro kyʼamakũmĩ abiri nʼebini kyʼomukera wʼomwenda, oko mwaka wʼakabiri wa Darĩo ekĩnywa kyʼOmwami Mukulu mokyasa oko mũmĩnyererĩ Hagaĩ, kiti,

¹¹ Omwami Mukulu Wʼemilondo ati, Ũbũlaye abahererĩ lino busana nʼomugambo, uti,

¹² Omundu amaheka esĩswĩ sĩbũyĩrĩre omo kisimbiri kyʼolukimba luwe, nʼekisimbiri kiwe kĩkatũla oko bundu, kutse omuto, kutse ebĩnyũ, kutse amagũta, kutse akalyo kahi, syasyabya sĩbũyĩrĩre kwehĩ? Nʼabahererĩ mobasũbĩrya bati, Iyihi.

¹³ Neryo Hagaĩ mwabũga ati, Omundu amabya ahalĩre busana nʼekĩnda, amatũla oko kiguma kyʼũkwʼebĩ, byasyabya ebĩtĩsĩrĩre kwehĩ? Nʼabahererĩ mobasũbĩrya bati, Kyasyabya kĩtĩsĩrĩre.

¹⁴ Neryo Hagaĩ mwasũbĩrya ati, Abandu aba ko bali batya, nʼekihanda ekĩ ko kiri kitya embere syage, Omwami Mukulu atya; nʼobuli mũbĩrĩ wʼebyala byabo kwʼali atya; nʼebyo bakahongeraho bĩtĩsĩrĩre.

¹⁵ Na lino, ngabalemba-lemba, mũganĩraye erĩtsũka mũnabwĩre nʼebiro ebyabirilaba, erĩbwe lite lyahĩrwa oko lindi omo Hekalũ yʼOmwami Mukulu.

¹⁶ Oko mugulu oyo gosĩ, omugulu omundu ahĩka oko kilundo kyʼamagabo makũmĩ abiri, mohabya ĩkũmĩ risa; nʼomugulu omundu ahĩka oko kikamiro eriteha amalega makũmĩ atanu, ihali makũmĩ abiri masa.

¹⁷ Monabaswĩrya nʼobuli mũbĩrĩ wʼebyala byenyũ; omo lihunga lyʼerĩhĩsya, nʼekihondo, nʼamatwa, nĩkwa momutanyibindukira, Omwami Mukulu atya.

¹⁸ Ngabalemba-lemba, mũganĩraye, erĩtsũka mũnabwĩre nʼebiro byabirilaba, erĩtsũka ekiro kyʼamakũmĩ abiri nʼebini kyʼomukera wʼomwenda, erĩtsũka ekiro ekibanza kyʼeHekalũ yʼOmwami Mukulu kyahandawa, mũganĩrayekyo.

¹⁹ Embuto ikine omo mbĩso kwehĩ? Ega, omũlĩkĩ wʼebĩnyũ, nʼomuti wʼomũtĩnĩ, nʼomukomamanga, nʼomuti wʼomũzeĩtũnĩ mwataheta. Nĩkwa erĩtsũka ekiro ekĩ kya mũnabwĩre nasyabatsumula.

Eritswerwa lyʼamami

²⁰ Neryo ekĩnywa kyʼOmwami Mukulu mokyahĩka uku Hagaĩ engendo yʼakabiri oko kiro kyʼamakũmĩ abiri nʼebini kyʼomukera kiti,

²¹ Ubwire Zerũbabelĩ, omũtabalĩ wʼeYũda uti, Nasyasũkanĩa olubula nʼekihugo.

²² Kandi nasyatoya ebĩtũmbĩ byʼamami; kandi nasyaherya amaka wʼamami wʼebihanda; kandi nasyagusa esyogalĩ, nʼabakagenda kusyo; nʼesyosabayĩrĩ nʼabakagenda kusyo; basyatogera ahisi, obuli mundu omo mũyalĩ wa mugala wabo.

²³ Oko kiro ekyo, Omwami Mukulu ati, Nasyakuwatako uwe Zerũbabelĩ, omugombe wage, mugala wa Salatĩele, Omwami Mukulu atya, kandi nasyakuyira ngʼembũka eyikaboha omwatsi; kusangwa Omwami Mukulu Wʼemilondo ati, Nabiriyisoga we.