Hagaĩ 1 - AMASAKO ABOYTRTRE WA NYAMUHANGA AWAKAHULAWA MO BIBLIA

Hagaĩ akahana abandu erĩswahĩmba eHekalũ

¹ Oko mwaka wʼakabiri wʼOmwami Darĩo, oko mukera wʼendatu, nʼoko kiro kyʼerĩtsũka omukera, ekĩnywa kyʼOmwami Mukulu mokyahĩka uku Zerũbabelĩ mugala wa Salatĩele, omũtabalĩ wʼeYũda, nʼuku Yosũa, mugala wa Yosadakĩ, omũhererĩ mukulu omo buno bʼomũhererĩ Hagaĩ, kiti,

² Omwami Mukulu Wʼemilondo akabũga, ati, Abandu aba bakabũga bati, Omugulu sialitahĩka, omugulu wʼerĩhĩmba enyũmba yʼOmwami Mukulu.

³ Neryo ekĩnywa kyʼOmwami Mukulu mokyasa oko mũmĩnyererĩ Hagaĩ, kiti,

⁴ Ko ni mugulu busana nenyũ erĩĩkala omo manyũmba awasakere omugulu enyũmba eno ine kĩhũma kwehĩ?

⁵ Neryo Omwami Mukulu Wʼemilondo ati, Mũganĩraye esyonzira syenyũ.

⁶ Mwabiribiba bingi, mwabirigesa bike; mukalya nĩkwa sihali ekyangũgũtya; mũkapũlaya, nĩkwa sihali ekyangahumwa; mukambala, esyongimba, nĩkwa sihali oyũkahũha ndeke; nʼoyukakolera oluhembo akabana obũhĩngĩ erĩhĩrabo omo ngunza ĩtobokĩre.

⁷ Omwami Mukulu Wʼemilondo ati, Mũganĩraye esyonzira syenyũ.

⁸ Muhetukire oko kitwa mulete emiti, mũswehĩmba eHekalũ; nage nasyatsemerayo, kandi nasyapipwa, Omwami Mukulu atya.

⁹ Mowayiketera ebingi, nĩkwa lebaya, mobyabya bike; nʼomugulu mukaletabyo eka, ngagũlũkayabyo. Omwami Mukulu ati, Busana nakĩ kwehĩ? Busana nʼenyũmba yage eyabere kĩhũma, nenyũ mukatibita obuli mundu omo nyũmba yiwe.

¹⁰ Busana nenyũ olubula lwabĩrĩkakĩrya ekimi, nʼekitaka kyabĩrĩkakĩrya ebĩgũma byakyo.

¹¹ Monabirikira enzala oko kitaka, nʼoko bitwa, nʼoko ngano, nʼoko bĩnyũ bihya-bihya, nʼoko magũta, nʼebyo ekitaka kĩkalasaya, nʼoko bandu, nʼoko syonde, nʼoko mĩbĩrĩ yosĩ eyikakolawa omo byala byenyũ.

¹² Neryo Zerũbabelĩ mugala wa Salatĩele, na Yosũa mugala wa Yosadakĩ omũhererĩ mukulu, haguma nʼabandu abasĩgalirako, mobowa omulenge wʼOmwami Mukulu Nyamuhanga wabo, nʼebĩnywa byʼomũmĩnyererĩ Hagaĩ, ngoko Mwami Mukulu Nyamuhanga wabo amutuma. Nʼabandu mobakenga Omwami Mukulu.

¹³ Neryo Hagaĩ, omukwenda wʼOmwami Mukulu mwabũga omo hamũlĩ yʼOmwami Mukulu oko bandu ati, Omwami Mukulu ati, Indi haguma nenyũ.

¹⁴ Neryo Omwami Mukulu mwabũkya ekĩrĩmũ kya Zerũbabelĩ, mugala wa Salatĩele, omũtabalĩ wʼeYũda, kandi mwabũkya ekĩrĩmũ kya Yosũa mugala wa Yosadakĩ, omũhererĩ mukulu, nʼekĩrĩmũ kyʼabandu bosĩ abasĩgalirako; neryo mobasa mobakola omũbĩrĩ oko nyũmba yʼOmwami Mukulu Wʼemilondo, Nyamuhanga wabo.

¹⁵ Neryo mokyabya oko kiro kyʼamakũmĩ abiri nʼebini kyʼomukera, oko mukera wʼendatu oko mwaka wʼakabiri wʼOmwami Darĩo.