Habakũkĩ 3 - AMASAKO ABOYTRTRE WA NYAMUHANGA AWAKAHULAWA MO BIBLIA

Erisaba lya Habakũkĩ

¹ Erisaba lyʼomũmĩnyererĩ Habakũkĩ likayirawa mo lwimbo.

² Uwe Mwami Mukulu, nabĩrĩowa esyongulu syawe, neryo ngubaha: Uwe Mwami Mukulu ũswehanganaya omũbĩrĩ wawe omo myaka, Omo myaka ũmĩnyĩsayego; Omwʼihitana Wibuke eriganyira.

³ Nyamuhanga akalũa eTemanĩ, Nʼomũbũyĩrĩre akalũa oko kitwa kyʼeParanĩ. Ulinde! Olukengerwa luwe lukaswika ekyanya, Nʼekihugo hĩkũsũla nʼeripipa liwe.

⁴ Nʼerĩkangabasanĩa liwe liri ngʼekyakakala kyʼeryuba; Awite amasalalĩ awakahenaya omo byala biwe; Aho ho habĩsĩre obũtokĩ buwe.

⁵ Akasũsũ kakaya embere siwe, Nʼakasũsũ kakamukwama.

⁶ Mwahangana, mwatĩtĩmanĩa ekihugo; Mwasamalira, mwasĩsĩrya ebihanda; Ega, ebitwa byʼerikota mobyatulangika; Nʼehitwa hya kera mohyũnama ahisi. Esyonzira siwe ni syʼerikota.

⁷ Monalangira amahema wʼAbanũbĩ iniali mʼobũlĩge; Esyongimba esĩrerembĩre syʼehema syʼekihugo kyʼeMĩdĩanĩ syabya sikatitimana.

⁸ Omwami Mukulu mwahitana busana nʼesyonyũsĩ kwehĩ? Kutse erihitana lyawe lyabya oko syonyũsĩ kwehĩ? Kutse eriagalirwa lyawe oko ngetsi kwehĩ? Kyaleka iwagenda oko syosabayĩrĩ syawe kwehĩ? Nʼoko syogalĩ syawe syʼomulamo kwehĩ?

⁹ Obuta bwawe mobwakũndũlwa kwenene; Erĩlahĩrya lyawe busana nʼerisuyira ebihanda molyabya kĩnywa kyʼekwenene. Mowatula omo kihugo mwʼesyonyũsĩ.

¹⁰ Ebitwa mobyakulangira, mobyatitimana; Erigunga lyʼamagetsi molyatwangana; Emirindi moyahũlũkya erihuha lyayo, Moyasumbira ebyala byayo endata.

¹¹ Eryuba nʼomukera mobyahangana omo myanya yabyo, Oko kyakakala kyʼemisoha yawe mobyalũaho, Okwʼĩkangabasanĩa lyʼerĩtũmo lyawe erĩkahenaya.

¹² Mowatwangana omo kihugo omwʼihitana; Mowalyatanga ebihanda omwʼihitana.

¹³ Mowahuluka busana nʼomulamo wʼabandu bawe, Busana nʼomulamo wʼomũhakabĩbwa wawe; Mowahũtalya omutwe wʼekĩtũnga kyʼomundu mubi, Erimutula erĩtsũka omo kihinga erĩhĩka oko bĩkya.

¹⁴ Mowatsimita emitwe yʼabalwĩ buwe omo matũmo wuwe. Mobasa ngʼakanyabungu eritupanzapanza; Eritsema lyabo lyabya ngʼabandu bakabuga abakanũbĩbawa omo bũbĩsobĩso.

¹⁵ Mowalyatangirira engetsi omo syosabayĩrĩ syawe, Omo bisunda byʼamagetsi mangi.

¹⁶ Monowa, neryo eribunda lyage molyatitimana, Emĩnywa yage moyatitimana busana nʼomulenge oyo; Erihonda molyingira omo makũha wage, kandi ngasũka-sũkanira aho wage. Kusangwa litolere inalinda ekiro kyʼobũlĩge kyʼobũkũtũ, Busana nʼerihetuka lyʼabandu abakatubambira.

¹⁷ Kusangwa nomo muti wʼomũtĩnĩ ateheta, Kutse ebĩgũma bitendisyabya omo mĩrĩkĩ yʼebĩnyũ; Nomo ebĩgũma byʼeMĩzeĩtũnĩ bĩkakũba, Nʼamalima sialĩeraya kalyo; Nomo ekĩhyo kyasyahwera omo kĩyĩte, Kandi sihali esyonde omo kibungo.

¹⁸ Nomo byangabya bitya, nasyatsemera Omwami Mukulu, Nasyatsema umu Nyamuhanga wʼerilama lyage.

¹⁹ Omukama, Omwami Mukulu ni maka wage; Akayira ebisando byage ngʼebisando byʼengabi, Akaleka inalaba oko bitwa. Busana nʼomwĩmbĩrĩrĩ oyuwite esyonanga syage syʼemĩsĩsa.