Habakũkĩ 2 - AMASAKO ABOYTRTRE WA NYAMUHANGA AWAKAHULAWA MO BIBLIA

Erĩtũlera lĩkalũa okwʼĩkĩrĩrya Nyamuhanga

¹ Ngandihangana oko bũteya bwage, ngandihangana endata oko musunguliko, nasyatungerera nʼerĩrebya ebyo asyambwira, nʼebyo nasyasũbĩrya omugulu ngakungawa.

² Neryo Omwami Mukulu mwanyĩsũbĩrya ati, Usake esyonzolĩ esyo nʼerĩmĩnyĩkalyasyo ndeke oko bisayi byʼamabwe, oyukasomasyo atoke erianguha.

³ Kusangwa esyonzolĩ sikine busana nʼomugulu ategekawa, nasyo sikanguha erĩhĩka oko ndũlĩ yasyo, nasyo sisyendisyabiha; nomo syangalinda, ulindesyo; kusangwa sĩkandĩsyahĩka kwenene, sisyendisyamala.

⁴ Lebaya, busana nʼoyukayiheka; omutima wuwe siatunganene omwisi wuwe; nĩkwa omutunganene embere sya Nyamuhanga asyabyaho busana nʼerĩkĩrĩrya liwe.

⁵ Kandi, ebĩnyũ bikateba omundu wʼeriyiheka, neryo sialisiba eka; akakanyĩrĩraya esyongumbu siwe ngʼeKũlĩmũ, alingene nʼoluholo, sialitoka erĩũgũtĩbwa. Nĩkwa akayĩhĩndanayako ebihanda byosĩ, nʼerĩyĩhĩndanĩako ebĩtũnga byosĩ.

⁶ Aba bosĩ sibendisyimba Olwimbo lwʼerimuseka, erĩmũsekererya, nʼerimulega kwehĩ? Bati, Obũlĩge okwʼoyukayitomekera ebite biwe! Erĩkolyahi kwehĩ? Kandi akayiyira mo muteke iniakayibweka!

⁷ Abakakubweka sibendisyahangana lũba-lũba, nʼabakakũlĩhĩsaya sibendisyabuka kwehĩ? Kwenene, wasyabya bunyegwa busana nabo.

⁸ Kusangwa wabĩrĩhũnga ebihanda binene, nʼabasĩgalira bosĩ bʼebihanda basyakunyega, busana nʼomusasi wʼabandu, na busana nʼobutsatsuhe obo wakola oko kihugo, nʼoko mũyĩ, nʼoko bosĩ bĩkere mugo.

Obũlĩge oko Bakaldea

⁹ Obũlĩge ukwʼoyukatundira ekĩtũnga kiwe endũndĩ nyibi, ati ayĩhĩre ahate obwĩko atoke erĩlamĩbwa omo byala byʼerĩkwa!

¹⁰ Wabirihimbika ebyʼesĩsonĩ busana nʼekĩtũnga kyawe, uti ũkatĩnda abandu bangi, kandi wabĩrĩyĩhalya oko mutima wawe.

¹¹ Kusangwa erĩbwe lyasyalakira omo lũhĩmbo, nʼomugamba asyasũbĩryalyo omo miti.

¹² Obũlĩge ukwʼoyũkahĩmba omũyĩ omo musasi, nʼerisingika omũyĩ omo mwaga!

¹³ Lebaya, ekĩ sĩkyelũa oko Mwami Mukulu Wʼemilondo kwehĩ? Kiti, Abandu bakakola busana nʼerĩhĩsya lyʼomuliro, nʼebihanda bĩkayĩlũhaya busa.

¹⁴ Kusangwa ekihugo kyasyũsũla nʼeriminya lyʼolukengerwa lʼOmwami Mukulu, ngoko amagetsi akũsũla omo ngetsi nʼeriswikayo.

¹⁵ Obũlĩge ukwʼoyukaha mũlĩkyabo erĩlũmba, imukatomeka obuti bwenyũ mubo, erĩmũkũndĩsyabo nibya, neryo imwatoka erilola oko ndũmbũ yabo!

¹⁶ Mwasyũsũla nʼesĩsonĩ butsira erĩsĩkya; nawe lino Ũpũlaye nibya, ũkangaye endũmbũ yawe; olũtehĩ omo byala byʼamali byʼOmwami Mukulu lwasyatĩmba nʼerĩkũhĩkako, nʼesĩsonĩ sĩkalĩre syasyabya oko lukengerwa lwawe.

¹⁷ Kusangwa omwaga akolawa busana nʼeLebanonĩ asyakwĩta, nʼerĩherĩbwa lyʼesyonyama eryũbahayasyo, busana nʼomusasi wʼabandu, na busana nʼomwaga akolawa busana nʼekihugo, na busana nʼomũyĩ, na busana nʼabosĩ abĩkere mugo.

¹⁸ Esanamu ikaleta ndũndĩ yahi omũbatsĩ wayo amabibatsayo kwehĩ? Kutse esanamu yʼerĩnũnĩa, oko mũkangĩrĩrya wʼamabehĩ kwehĩ? Kusangwa oyo wakokotayayo iniakayiketera omũbĩrĩ wuwe omugulu akabumba esyosanamu esitetoka erĩbũga.

¹⁹ Obũlĩge ukwʼoyukabwira omuti ati, Ubuke! Nʼoko lĩbwe lyʼemũmũ, ati, Hangana! Kandi ati, Omũkangĩrĩrya wawe yoyũ kwehĩ? Lebaya, kĩswĩkĩrwe omo syamagetsi nʼebĩtsĩpa, kandi omuka siali mulyo nʼahake.

²⁰ Nĩkwa Omwami Mukulu ali omo Hekalũ yiwe ĩbũyĩrĩre. Ekihugo kyosĩ kibye bũkũtũ embere siwe.