Ezera 9 - AMASAKO ABOYTRTRE WA NYAMUHANGA AWAKAHULAWA MO BIBLIA

Ezera akasabira Abayũda abahĩkaya abakalĩ bʼebihanda

¹ Neryo emyatsi eyĩ yabere yabihwa, abanya-mwami mobambĩkako bati, Abandu ba Ĩsraelĩ nʼabahererĩ nʼAbalawĩ sibetayisolola oko bandu bʼebihugo oko syonye syabo, esyʼAbanya Kanana, nʼAbahĩtĩ, nʼAbaperezĩ, nʼAbayebũsĩ, nʼAbaamonĩ, nʼAbamoabũ, nʼAbanya Mĩsĩrĩ, nʼAbaamorĩ.

² Kusangwa babĩrĩhĩkya abana-bato bʼebihanda, kandi babĩrĩmya abandi bana-bato busana nʼeribya bakalĩ bʼabana babo bʼobulume. Kyalekĩre ekihanda kĩbũyĩrĩre ĩkyatũlũngana nʼabandu bʼekihugo. Ega, kandi abanya-mwami nʼabatabalĩ, bo babya bakakola batya kutsibu omwʼĩhalya erĩ.

³ Nʼomugulu nowa omwatsi oyũ, monasatangya esyongimba syage nʼekanzu yage, monakula esyonzwiri syʼomutwe wage, nʼoko nderũ syage, monĩkala nʼerisweka.

⁴ Neryo obuli mundu oyo watitimana busana nʼebĩnywa bya Nyamuhanga wa Ĩsraelĩ busana nʼerĩlolo lyʼabanyegawa mobayĩhĩndanĩa ũkwʼĩngye. Nage monĩkala ngasweka erĩhĩka oko buhere bwʼerĩgologolo.

⁵ Nʼoko buhere bwʼerĩgolo-golo monahangana aho nabya ngahemukira, olukimba lwage nʼekanzu yage ĩbyamabĩsatangĩbwa; monawira oko marwĩ wage, nʼerisumba ebyala byage oko Mwami Mukulu Nyamuhanga wage.

⁶ Monabũga, nyiti, Uwe Nyamuhanga wage, namakwa esĩsonĩ nʼerĩkũta-kũta erikusumbira obũsũ bwage, Nyamuhanga wage; kusangwa amalolo wetu amakanya endata oko mitwe yetu, nʼomusango wetu amakanyirira erĩhĩka omo kyanya.

⁷ Erĩtsũka oko biro byʼabotata wetu twabiribya nʼomusango munene erĩhĩka mũnabwĩre; na busana nʼamalolo wetu ĩtwe nʼabami betu nʼabahererĩ betu twabĩrĩhĩrwa omo byala byʼabami bʼebihugo nʼoko mũyalĩ nʼoko bunyegwa, nʼokwʼĩhũngwa, nʼokwʼĩkũtakũtya obũsũ ngoko biri mũnabwĩre.

⁸ Neryo lino busana nʼakatambĩ kake Omwami Mukulu Nyamuhanga wetu abĩrĩkangya olukogo erĩtũsĩgĩra abasĩgala nʼeribala, nʼerituha ekibute aho wuwe ahabũyĩrĩre, Nyamuhanga wetu atoke erĩkolerya ameso wetu, nʼerĩtũsũbya hake omo bukobe bwetu.

⁹ Kusangwa tuli bakobe; nĩkwa Nyamuhanga wetu sialitatũsĩganĩa omo bukobe bwetu, nĩkwa abĩrĩtũkangya obubuya buwe bʼolwanzo omo meso wʼabami bʼePersĩa, erituha erisuba, erĩhanganĩa enyũmba ya Nyamuhanga wetu, nʼerĩsũbya ahahera, nʼerituha olũhĩmbo eYũda nʼeYerũsalema.

¹⁰ Na lino, uwe Nyamuhanga wetu, twasyabũgakĩ enyũma wʼemyatsi eyĩ kwehĩ? Kusangwa twabĩrĩsĩganĩa ebihano byawe,

¹¹ ebyo wategekera abamĩnyererĩ abagombe bawe, uti, Ekihugo ekyo mũkayasĩgalaya, ni kihugo kĩtsandĩre busana nʼobũtsandĩrya bwʼebihanda byʼebihugo, busana nʼesyonye syabo, esyo bũsũlaya mukyo erĩtsũka oko ndũlĩ nʼerĩhĩka oko yindi ndũlĩ nʼobũtsandĩrya bwabo.

¹² Neryo lino simuhe abana babo bo bali benyũ erĩhĩkyabo, kutse sĩmũhĩkĩraye abana-bato babo oko bana benyũ, kutse erisonda-sondya Obuholo bwabo kutse omũyĩsa wabo kera na kera; imwatoka eribya nʼamaka, nʼerirya ebibuya byʼekihugo, nʼerĩsĩgĩrakyo abana benyũ mo mwandu kera na kera.

¹³ Nʼenyũma wʼemyatsi yosĩ eyabĩrĩtũhĩkako busana nʼemĩbĩrĩ yetu mibi, nʼomusango wetu munene, twamalebya ngoko uwe Nyamuhanga wetu mogutetatusuyira ngʼebibi byetu ko bitolere, iwabirituha abakasĩgala.

¹⁴ Tukete kandi ebihano byawe nʼerĩherũkanĩa nʼabandu abakakola esyonye esĩ kwehĩ? Siwangatuhitanako erĩhĩka aho wabĩrĩtũhererya, isihangabya abakasĩgala, kutse nʼomundu oyukabala kwehĩ?

¹⁵ Uwe Mwami Mukulu Nyamuhanga wa Ĩsraelĩ, uwe utunganene, kusangwa twamasĩgala mo basĩgalĩra ababala, ngoko bali mũnabwĩre; lebaya, tuli embere syawe omo musango wetu; kusangwa sihali nʼomuguma oyukatoka erihangana embere syawe busana nʼekĩ.