Ezera 6 - AMASAKO ABOYTRTRE WA NYAMUHANGA AWAKAHULAWA MO BIBLIA

Erihamula lya Kĩro likabanika nʼerĩhĩmba eHekalũ likahwa

¹ Neryo omwami Darĩo mwahamula, neryo mobasonda-sonda omo nyũmba yʼebitabu, aho ebindu byabikawa eBabelĩ.

² Neryo mobeya eAkĩmeta, omo nyũmba yʼOmwami eyiri omo kihugo kyʼeMedĩa, omũlĩngo wʼakaratasi, na mugo ĩhasakĩrwe eryĩbũkya liti,

³ Omo mwaka wʼerĩtsũka lyʼOmwami Kĩro, omwami Kĩro mwahamula ati, Busana nʼenyũmba ya Nyamuhanga eyiri eYerũsalema, enyũmba ĩhĩmbawe, aho bakahonga amahere, nʼebibanza byayo bĩhĩrawe nʼamaka; obuli bwʼendata bwayo bubye metere 31, nʼobugali bwayo metere 31;

⁴ emilondo ĩsatu yʼamabwe manene manene, nʼomulondo muguma wʼemiti mihya-mihya; nʼeririha lyayo lĩlũe omo nyũmba yʼembĩso yʼOmwami.

⁵ Nʼebindu byʼesyamagetsi nʼebĩtsĩpa byʼeHekalũ ya Nyamuhanga nibya, ebyo Nebũkadeneza alũsaya omo Hekalũ eyiri eYerũsalema, ebyo aleta eBabelĩ, bĩsũbũlĩbawe, nʼeriretwa kandi omo Hekalũ eyiri eYerũsalema, obuli kiguma aho wakyo; kandi Wasyahĩrabyo omo nyũmba ya Nyamuhanga.

⁶ Neryo lino, Tatenaĩ omũtabalĩ wʼeyisirya wʼolũsĩ Efũratĩ, na Setarĩ-bozenaĩ, nʼabalĩkyenyũ abakulu bʼebihugo ebiri eyisirya wʼolũsĩ Efũratĩ, muyigelule kuho.

⁷ Muleke omũbĩrĩ wʼenyũmba eyĩ ya Nyamuhanga akoleke, muleke, omũtabalĩ wʼAbayũda nʼabakulu bʼAbayũda bahĩmbe enyũmba eyĩ ya Nyamuhanga aho yanabya.

⁸ Kandi ngahamula ngoko mwasyakolera bakulu aba bʼAbayũda busana nʼerĩhĩmba enyũmba eyĩ ya Nyamuhanga; nyiti, erĩhĩmba lyʼeHekalũ libanike omo ngemu yʼembĩso yʼOmwami omo bihugo byʼeyisirya oko lũsĩ Efũratĩ. Kandi abandu aba balihawe batya nʼomũhwa sĩbakakĩrĩbawe.

⁹ Nʼebyo bali nabyo bwaga, esyonume ndere syʼesyonde, nʼesyombangale, nʼebyana byʼesyombũlĩ, busana nʼamahere wʼerĩokererya uku Nyamuhanga wʼelubula; nʼengano, nʼomũnyũ, nʼebĩnyũ, nʼamagũta wʼerĩhakabya, ngʼekĩnywa kyʼabahererĩ abali eYerũsalema, bahabawe obuli kiro butsira eribula;

¹⁰ batoke erihonga mahere wʼerikumba ndeke busana na Nyamuhanga wʼelubula, kandi musabire engebe yʼOmwami, nʼabagala buwe.

¹¹ Kandi nabirihamula nibya nyiti, Omundu oyo wasyabindula ekĩnywa ekĩ, omugamba alũsĩbawe omo nyũmba yiwe, naye asumbawe nʼeriboherwa kugo; nʼenyũmba yiwe yibye kyabũ busana nʼomwatsi oyũ.

¹² Na Nyamuhanga oyo waleka erĩna liwe ĩrĩkala aho, akĩnde abami bosĩ nʼebihanda, abakandisyasumba ebyala byabo eribindula omwatsi oyũ, nʼerĩtsandya enyũmba eyĩ ya Nyamuhanga eyiri eYerũsalema. Ĩngye Darĩo nabirihamula; likolawe nʼomũhwa gosĩ.

¹³ Neryo Tatenaĩ omũtabalĩ wʼeyisirya wʼolũsĩ Efũratĩ, na Setarĩbozenaĩ, nʼabalĩkyabo, busana nʼebyo mwami Darĩo alayira, mobakola batya nʼomũhwa gosĩ.

¹⁴ Neryo abakulu bʼAbayũda mobahĩmba nʼeritoka, busana nʼeriminyerera lya Hagaĩ omũmĩnyererĩ, na Zakarĩa mugala wa Ĩdo. Mobahĩmba nʼeribugayo ngʼerihana lya Nyamuhanga wa Ĩsraelĩ, kandi ngʼerihamula lya Kĩro, na Darĩo, na Artasasta, omwami wʼePersĩa.

¹⁵ NʼeHekalũ eyĩ moyahwa oko kiro kyʼebisatu kyʼomukera wa Adarĩ, owabya oko mwaka wʼendatu wʼeritabala lyʼOmwami Darĩo.

Abana ba Ĩsraelĩ bakahongera Nyamuhanga nʼobutseme

¹⁶ Nʼabana ba Ĩsraelĩ, abahererĩ nʼAbalawĩ nʼabandi bʼoko banyegawa, mobahigula enyũmba eyĩ ya Nyamuhanga nʼobutseme.

¹⁷ Kandi mobahonga okwʼihigula lyʼenyũmba eyĩ ya Nyamuhanga esyonume erĩgana nʼesyombangale magana abiri, nʼebyana byʼesyombũlĩ magana ani; na busana nʼobuhere bwʼamalolo busana nʼAbaĩsraelĩ bosĩ, esyombaya ĩkũmĩ nʼesĩbĩrĩ, ngʼemiganzo yʼebihanda bya Ĩsraelĩ.

¹⁸ Mobahĩra abahererĩ oko bĩtũto, nʼAbalawĩ oko bũteya bwabo, busana nʼomũbĩrĩ wa Nyamuhanga, owali eYerũsalema; ngoko kĩsakĩre omo kitabu kya Musa.

Erirya ĩnene lyʼErikiruka

¹⁹ Neryo abandu abanyegawa mobalya Erikiruka oko kiro kyʼerĩkũmĩ nʼebini kyʼomukera wʼerĩtsũka.

²⁰ Kusangwa abahererĩ nʼAbalawĩ mobayihigula haguma; abosĩ mobatũkũla; neryo mobĩta Erikiruka busana nʼabandu bosĩ abanyegawa, na busana nʼabagala babo abahererĩ, na busana nabo ĩbobene-bene.

²¹ Neryo abana ba Ĩsraelĩ abasa bakalũa oko bunyegwa, abosĩ abayihigula busana nabo erĩlũa oko bubi bwʼebihanda byʼekihugo, erisonda-sonda Omwami Mukulu, Nyamuhanga wa Ĩsraelĩ, mobalya Erikiruka.

²² Kandi mobateya ebiro bikulu byʼobundu obute mo kĩhamya ebiro birinda nʼobutseme; kusangwa Omwami Mukulu mwatsemesyabo nʼeribindula omutima wʼOmwami wʼeAsũrĩa busana nabo, erĩsĩkya ebyala byabo omo mũbĩrĩ wʼenyũmba ya Nyamuhanga, Nyamuhanga wa Ĩsraelĩ.