Ezera 10 - AMASAKO ABOYTRTRE WA NYAMUHANGA AWAKAHULAWA MO BIBLIA

Abaĩsraelĩ bakakanganaya amalolo wabo

¹ Neryo omugulu Ezera abya akasaba nʼeritsira ebibi, iniakalira nʼeriyigusanga ahisi embere wʼenyũmba ya Nyamuhanga, endeko nene kutsibu moyahĩndana aho ali erĩlũa omo Baĩsraelĩ, abalume nʼabakalĩ nʼabana; kusangwa abandu mobalira kutsibu.

² Na Sekanĩa mugala wa Yehĩelĩ, omuguma gʼoko bagala ba Elamũ mwasũbĩrya mwabũga na Ezera ati, Twabĩrĩhalya uku Nyamuhanga wetu, erĩhĩkya abakalĩ bʼehandi bʼebihanda byʼekihugo; nĩkwa lino hali amaha busana na Ĩsraelĩ omo mwatsi oyũ.

³ Neryo lino tuyire endagano na Nyamuhanga wetu erihiga abakalĩ bosĩ nʼababutawa kubo, ngʼerihana lyʼomukama wage, nʼerihana lyʼabakatitimana busana nʼerihana lya Nyamuhanga wetu; kandi likolawe ngoko emigambo yĩkabũga.

⁴ Hangana! Kusangwa omwatsi oyũ ni wawe, netu tuli haguma nawe; uhande omutima, ukolekyo.

⁵ Neryo Ezera mwahangana mwalahĩrĩsya abakulu bʼabahererĩ, nʼAbalawĩ, nʼAbaĩsraelĩ bosĩ bakole ngʼekĩnywa ekĩ. Neryo mobalahĩrya batya.

⁶ Neryo Ezera mwahangana erĩlũa embere syʼenyũmba ya Nyamuhanga, mwingira ekatĩ ka Yehohananĩ mugala wa Elĩasĩbũ; nʼomugulu ahĩkamo mwatalya kutse erĩpũlya magetsi; kusangwa abya akalira busana nʼerĩhalya lyʼabandu abanyegawa.

⁷ Neryo mobatũlaganĩago eYũda nʼeYerũsalema oko bandu bosĩ, abanyegawa ati, bayĩhĩndanaye eYerũsalema.

⁸ Kandi ati omundu oyũtendĩhĩka oko biro bisatu, ngʼerihana lyʼabasondolĩ nʼabakulu, bati, Ebindu biwe byosĩ byasyasagulwa kwiye, naye iniahigwa oko ndeko yʼabandu abanyegawa.

⁹ Neryo abandu bosĩ ba Yũda na Benyamĩna mobayĩhĩndanĩa eYerũsalema omo biro bisatu ebyo. Omwatsi oyũ abya oko mukera wʼomwenda, nʼoko kiro kyʼamakũmĩ abiri kyʼomukera. Neryo abandu bosĩ mobĩkala omo kibuga embere syʼenyũmba ya Nyamuhanga, bakatitimana busana nʼomwatsi oyũ, na busana nʼembũla nene.

¹⁰ Neryo omũhererĩ Ezera mwahangana mwabwirabo ati, Mwamalegula, erĩhĩkya oko bakalĩ bʼehandi, erĩkanyĩrĩrya omusango wa Ĩsraelĩ.

¹¹ Neryo lino mubikulire Omwami Mukulu, Nyamuhanga wʼabotata wenyũ, mukole ebĩkamũtsemesaya; muyisolole oko bihanda byʼekihugo, nʼoko bakalĩ bʼehandi.

¹² Neryo endeko yosĩ mobasũbĩrya mobabũga nʼomulenge munene bati, Ngoko wamabĩbũga busana netu, litolere itwakola tutya.

¹³ Nĩkwa abandu ni bangi, kandi ni mugulu wʼembũla nyingi, Sitwangatoka erihangana eyĩhya; kutse oyũ sĩ mũbĩrĩ wʼekiro kiguma kutse bibiri; kusangwa twabĩrĩhalya kutsibu omo mwatsi oyũ.

¹⁴ Lino abasondolĩ betu bahangane omo mwanya wʼendeko yosĩ, nʼabosĩ abali omo mĩyĩ abahĩkaya abakalĩ bʼehandi, base oko mugulu owahamulawa, haguma nʼabakulu bʼobuli mũyĩ, nʼabatswerĩ bago, erĩhĩka aho erihitana lĩkalĩre lya Nyamuhanga wetu busana nʼomwatsi oyũ lyasyatũlũĩrako.

¹⁵ Yonatana mugala wa Asahelĩ, na Yazeya mugala wa Tĩkwa mobahangana erigana omwatsi oyũ; na Mesũlamũ na Sabetayĩ Omũlawĩ mobimirabo.

¹⁶ Nĩkwa abanyegawa mobakola batya. Na Ezera omũhererĩ mwayisoga abandu ababya bakulu bʼebĩtũnga byʼabotatakulu, omo bĩtũnga byʼabotata-kulu wabo, abosĩ omo mena wabo. Neryo mobĩkala oko kiro kyʼerĩtsũka kyʼomukera wʼerĩkũmĩ erisonda-sondya omwatsi oyũ.

¹⁷ Neryo mobabugago erisonda-sondya abalume bosĩ abahĩkaya abakalĩ bʼehandi oko kiro kyʼerĩtsũka kyʼomukera wʼerĩtsũka.

¹⁸ Neryo omo katĩkatĩ kʼabagala bʼabahererĩ mohabanika abahĩkaya abakalĩ bʼehandi. Oko bagala ba Yesũa, mugala wa Yozadakĩ, nʼabagala babo, ye Maseya, na Elĩezerĩ, na Yarĩbũ, na Gedalĩa.

¹⁹ Neryo mobalahĩrya omo byala byabo bati basyahiga abakalĩ babo; neryo kusangwa babya nʼomusango, mobahanula embangale yʼekihangulo busana nʼerĩhalya lyabo.

²⁰ Nʼoko bagala ba Ĩmerĩ habya Hananĩ na Zebadĩa.

²¹ Nʼoko bagala ba Harĩmũ habya Masea, na Elĩa, na Semaya, na Yehĩelĩ, na Ũzĩa.

²² Nʼoko bagala ba Pasũrĩ habya Elĩyoenayĩ, na Masea, na Ĩsmaelĩ, na Netanelĩ, na Yozabadĩ, na Elasa.

²³ Nʼoko Balawĩ habya Yozabadĩ, na Sĩmeĩ, na Kelaya yo Kelĩta, na Petahĩa, na Yũda, na Elĩezerĩ.

²⁴ Nʼoko bĩmbĩ habya Elĩasĩbũ. Nʼoko bateya bʼesyongyo Salumu, na Telemũ, na Ũrĩ.

²⁵ Nʼoko Baĩsraelĩ: oko bagala ba Parosĩ: ye Ramĩa, na Ĩzĩa, na Malkĩa, na Mĩamĩnũ, na Eleazarĩ, na Malkĩa, na Benaya.

²⁶ Nʼoko bagala ba Elamũ habya Matanĩa, na Zakarĩa, na Yehĩelĩ, na Abũdĩ, na Yeremotĩ, na Elĩa.

²⁷ Nʼoko bagala ba Zatũ habya Elĩoenayĩ, na Eleasĩbũ, na Matanĩa, na Yeremotĩ, na Zabadĩ, na Azĩza.

²⁸ Nʼoko bagala ba Bebayĩ; ye Yohananĩ, na Hanania, na Zabayĩ, na Atĩlayĩ.

²⁹ Nʼoko bagala ba Banĩ ye Mesũlamũ, na Lalũkũ, na Adaya, na Yasũbũ, na Sealĩ, na Yeremotĩ.

³⁰ Nʼoko bagala ba Pahatĩ-moabũ ye Adĩna, na Kelalĩ, na Benaya, na Maseya, na Matanĩa, na Besalelĩ, na Bĩnũyĩ, na Manase.

³¹ Nʼoko bagala ba Harĩmũ: ye Elĩezerĩ, na Ĩsĩa, na Malkĩa, na Semaya, na Sĩmeonĩ,

³² na Benyamĩna, na Malũkũ, na Semarĩa.

³³ Nʼoko bagala ba Hasũmũ: ye Matanayĩ, na Matata, na Zabadĩ, na Elĩfeletĩ, na Yeremayĩ, na Manase, na Sĩmeyĩ.

³⁴ Nʼoko bagala ba Banĩ: ye Maadaĩ, na Amũramũ, na Ũelĩ,

³⁵ na Benaya, na Bedĩa, na Kelũhĩ,

³⁶ Wanĩa, na Meremotĩ, na Elĩasĩbũ,

³⁷ na Matanĩa, na Matenayĩ, na Yasũ,

³⁸ na Banĩ, na Bĩnũĩ, na Sĩmeĩ,

³⁹ na Selemĩa, na Natana, na Adaya,

⁴⁰ na Makĩna-debayĩ, na Sasayĩ, na Sarayĩ,

⁴¹ na Azaraelĩ, na Selenĩa, na Semarĩa,

⁴² na Salumu, na Amarĩa, na Yosefũ.

⁴³ Oko bagala ba Nebo: ye Yielĩ, na Matatĩa, na Zabadĩ, na Zebĩna, na Ĩdo, na Yoelĩ, na Benaya.

⁴⁴ Abosĩ aba babya ĩbabĩrĩhĩkya abakalĩ bʼehandi, nʼabandi ba kubo babya nʼabakalĩ ababiributirabo abana.