Ezera 1 - AMASAKO ABOYTRTRE WA NYAMUHANGA AWAKAHULAWA MO BIBLIA

Omwami Kĩro akahamula erĩhĩmba eHekalũ eYerũsalema

¹ Oko mwaka wʼerĩtsũka lyʼOmwami wʼePersĩa ye Kĩro, ekĩnywa kyʼOmwami Mukulu ekyabũgawa omo buno bwa Yeremĩa kitoke erĩberererĩbwa, Omwami Mukulu mwatsũmbũkya omutima wa Kĩro omwami wʼePersĩa, kyaleka iniatuma omwatsi omo bwami buwe bosĩ, kandi mwasakago ati,

² Kĩro omwami wʼePersĩa akabũga ati, Omwami Mukulu Nyamuhanga wʼelubula abirimba amami gosĩ wʼekihugo; kandi abirinyihamula ati nyĩmũhĩmbĩre enyũmba eYerũsalema, eyiri eYũda.

³ Omundundi oyuli omo katĩkatĩ kenyũ oko bandu buwe bosĩ, Nyamuhanga wuwe abye haguma naye, kandi ahetukire eYerũsalema, eyiri eYũda, erĩhĩmba enyũmba yʼOmwami Mukulu, Nyamuhanga wa Ĩsraelĩ, iye yo Nyamuhanga oyuli eYerũsalema.

⁴ Nʼomundundi oyũkandĩsĩgala, hahi eyo akabungira, abandu baho bamũwatĩkaye omo bĩtsĩpa, nʼesyamagetsi, nʼebindu, nʼesyonyama, haguma nʼerĩhĩtya lyʼolwanzo busana nʼenyũmba ya Nyamuhanga eyiri eYerũsalema.

Ebindu ebyatwalawa eYerũsalema bĩkalũa eBabelĩ

⁵ Neryo abakulu bʼebĩtũnga byʼabotata-kulu ba Yũda na Benyamĩna, nʼabahererĩ nʼAbalawĩ, abosĩ abo Nyamuhanga atsũmbũkaya emitima yabo erĩyahĩmba enyũmba yʼOmwami Mukulu eyiri eYe­rũsalema.

⁶ Nʼabosĩ ababya oko mbande syosĩ syabo mobasĩkya ebyala byabo omo bindu byʼekĩtsĩpa, nʼesyamagetsi, haguma nʼobuteke, nʼesyonyama, nʼebindu byʼobũgũlĩ, ebyosĩ ebyahabawa mo luhembo lwʼolwanzo biteko.

⁷ Kandi omwami Kĩro mwahũlũkya ebindu byʼenyũmba yʼOmwami Mukulu, ebyo Nebũkadeneza alũsaya eYerũsalema, ebyo ahĩra omo nyũmba yʼesyonyamuhanga siwe;

⁸ bye nʼebyo Kĩro omwami wʼePersĩa ahũlũkaya omo byala bya Mĩtĩredatĩ omũbĩkĩ wʼesyombĩso siwe, kandi mwaganzabyo uku Sesĩbazarĩ, omukulu wʼAbayũda.

⁹ Nʼeyĩ ye miganzo yabyo: ebibindi byʼesyamagetsi, amakũmĩ asatu (30), nʼebibindi byʼebĩtsĩpa, elfu nguma (1,000), nʼebindi bindu makũmĩ abiri nʼomwenda (29),

¹⁰ nʼamatũba wʼesyamagetsi amakũmĩ asatu (30), nʼamatũba wʼekĩtsĩpa wʼomuhanda wʼakabiri amagana ani nʼerĩkũmĩ (410), nʼesindi ndehĩ elfu nguma (1,000).

¹¹ Nʼebindu byosĩ byʼesyamagetsi nʼekĩtsĩpa byabya elfu ĩtanu nʼamagana ani (5,400). Ebyosĩ ebĩ Sesĩbazarĩ mwaletabyo, omugulu abanyegawa batwalawa eYerũsalema bakalũa eBabelĩ.