Ezekĩelĩ 9 - AMASAKO ABOYTRTRE WA NYAMUHANGA AWAKAHULAWA MO BIBLIA

Erihitanira eYerũsalema

¹ Neryo mwabirikira ĩnyĩnowĩre nʼomulenge munene, ati, Musegere hakũhĩ, ĩnywe mukasuyira omũyĩ, obuli mundu nʼekindu kiwe kyʼerĩĩta omo byala biwe.

² Neryo lebaya, abandu ndatu mobasa bakahuluka omo nzira yʼolũkyo lwʼendata, olũlolĩre ebwanga bwʼelutambi lwʼendata, obuli mundu nʼekindu kiwe kyʼerĩĩta omo byala biwe. Omundu muguma omo katĩkatĩ kabo iniambite omusohe wʼekĩtanĩ, iniawite engunza yʼerisaka ebarua hakũhĩ nʼembindi yiwe. Neryo mobingira mobahangana hakũhĩ nʼekiherero kyʼomulinga.

³ Nʼolukengerwa lwa Nyamuhanga wa Ĩsraelĩ molwahetuka lũkalũa oko kerũbĩ, aho lwabya, erĩhĩka oko kĩsekũ kyʼeHekalũ. Naye mwabirikira oko mundu oyo wambite ekĩtanĩ, oyo wabya nʼengunza yʼebarua hakũhĩ nʼembindi yiwe.

⁴ Neryo Omwami Mukulu mwamubwira ati, Ulabe omo mũyĩ, Ulabe omo Yerũsalema, ũhĩre ekiminyikalo omo syombũmo syʼabandu abakahumulikana nʼerĩsĩmba busana nʼesyonye syosĩ esikakolawa omo katĩkatĩ kago.

⁵ Nĩkwa mwabwira abandi ĩnyĩnowĩre ati, Mulabe omo mũyĩ enyũma siwe, mwĩte. Erĩso lyenyũ siriganyire, kutse simusasire.

⁶ Mwĩte ndeke abasyakulu nʼabalwana, nʼabambesa, nʼabana balere nʼabakalĩ, nĩkwa sĩmũtũle oko mundu oyuwite ekiminyikalo. Kandi mwasyatsũka ahabũyĩrĩre hage. Neryo mobatsũka oko bakulu ababya embere syʼeHekalũ.

⁷ Kandi mwabwirabo ati, Mũtsandaye eHekalũ, mũsũlaye ebibuga mwʼabandu abĩtawa. Muhuluke! Nabo mobahuluka, mobĩta abandu omo mũyĩ.

⁸ Neryo, omugulu babya bakatsimitanga, nage monasĩgala ĩngyowene, monawa kibiri-biri, nʼeribirikira nyiti, ĩyo-o-o, Omukama Iye Omwami Mukulu! Wamaherya abasĩgalira bosĩ ba Ĩsraelĩ ĩnũkũtũlĩra erihitana lyawe oko Yerũsalema kwehĩ?

⁹ Neryo mwabũga nage ati, Ebibi byʼekihanda kya Ĩsraelĩ na Yũda ni bingi kutsibu kũndũ, nʼekihugo kyoswĩre nʼomusasi, nʼomũyĩ amũsũla nʼerĩkũnya-kũnya omusango, kusangwa bakabũga bati, Omwami Mukulu abirireka ekihugo ekĩ, kandi Omwami Mukulu sialilangira!

¹⁰ Nĩkwa ĩngye, erĩso lyage siryendisyaganyira, kutse sindiendisyasasira, nĩkwa nasyaleta emĩbĩrĩ yabo oko mitwe yabo.

¹¹ Neryo, lebaya, omundu oyo wambite ekĩtanĩ oyo wabya nʼengunza yʼebarua omo mbindi yiwe, mwaleta engulu ati, Nabirikola ngoko wanyihana ndeke.