Ezekĩelĩ 7 - AMASAKO ABOYTRTRE WA NYAMUHANGA AWAKAHULAWA MO BIBLIA

Erisuyira Ĩsraelĩ

¹ Kandi, ekĩnywa kyʼOmwami Mukulu mokyambĩkako kiti,

² Nawe, omugala wʼomundu, Omukama, Iye Omwami Mukulu akabwira ekihugo kya Ĩsraelĩ ati, Nĩ ndũlĩ Endũlĩ ĩkahĩka oko nũnga ĩnĩ syʼekihugo.

³ Na lino endũlĩ yamakũhĩkako, nage nasyakutuma kwʼerihitana lyage, nasyakutswera ngʼesyonzira syawe. Nasyakũhĩnganĩa kwʼesyonye syawe syosĩ.

⁴ Erĩso lyage siryendisyakusasira, kutse sindiendisyakũbalya. Nĩkwa nasyakũsũbya kwʼesyonzira syawe, nʼesyonye syawe syasyabya omo katĩkatĩ kawe. Neryo wasyaminya ko ndi Mwami Mukulu.

⁵ Omukama Iye Omwami Mukulu ati, Erĩkwa, erĩkwa ĩryolyene; lebaya likasa.

⁶ Endũlĩ ĩkahĩka, endũlĩ yabĩrĩhĩka! Yabirikubukako. Lebaya, yabĩrĩhĩka!

⁷ Uwe ndũlanĩ yʼekihugo, erĩkwa lyawe lyamakũhĩkako. Omugulu amahĩka, ekiro kiri hakũhĩ, olukanda, kwilaba obogo bwʼobutseme oko bitwa.

⁸ Lino hakĩsĩya hake ĩnũta erihitana lyage ukʼuwe, nʼerĩhĩkererya erihitana lyage ukʼuwe, nasyakutswera ngʼesyonzira syawe ko siri. Nasyakũhĩra kwʼesyonye syawe syosĩ.

⁹ Erĩso lyage siryendisyakuganyira, kutse sindiendisyakusasira. Nasyakuliha ngʼesyonzira syawe ko siri omugulu esyonye syawe siri omo katĩkatĩ kawe. Nenyũ mwasyaminya kwʼindi nĩ ngye Mwami Mukulu, ngaswĩraya.

¹⁰ Lebaya, ekiro ekyo! Lebaya, kikasa! Erihera lyawe lyabirihuluka. Omũtso abĩrĩsoya, eriyipipa lyamakondola.

¹¹ Omwaga abirihangana eribya mũtso wʼebibi. Sihali mundu wabo oyo wasyasĩgalira, kutse wʼendeko yabo, kutse wʼebindu byabo, kutse sihendisyabya kindu kikulu omo katĩkatĩ kabo.

¹² Omugulu amahĩka, ekiro kyamahĩka. Oyukagula siatseme, kutse oyũkagũlaya syalire, kusangwa erihitana lyamahĩka oko ndeko yosĩ yako.

¹³ Kusangwa oyũkagũlaya siendisyaswabana ebyo alĩagũlaya omugulu abosĩ babiri bakineho, kusangwa esyonzolĩ busana nʼendeko yosĩ yako, sisyendisyabulirana. Kutse sihali mundu wabo oyo wasyayĩbanĩsya engebe yiwe omo bibi biwe.

¹⁴ Babiribuha engubi, babĩrĩtegekanĩa ebyosĩ, nĩkwa sihali Oyukaya oko malwa. Kusangwa erihitana lyage lyabiribya oko ndeko yosĩ yabo.

¹⁵ Omũyalĩ ali eyĩhya, nʼendwala yʼakasũsũ, nʼenzala, biri omwisi. Oyuli omolĩ asyakwa omo mũyalĩ, nʼoyuli omo mũyĩ, enzala nʼendwala yʼakasũsũ byasyamulya.

¹⁶ Nĩkwa omugulu abandu babo abakabala basyatibita nʼeribala, basyabya oko bitwa ngʼehĩrĩkũkũ hyʼomo misya, abosĩ ibanemulira, obuli mundu busana nʼebibi biwe.

¹⁷ Ebyala byosĩ byasyogokala, nʼamarwĩ gosĩ asyakonongoka ngʼamagetsi.

¹⁸ Basyayihanga emisarandwe, nʼerititimana lyasyasĩngabo. Nʼesĩsonĩ syasyabya oko mũsũ gosĩ, nʼesyombala oko mitwe yabo yosĩ.

¹⁹ Basyagusa ebĩtsĩpa byabo omo nzira, nʼesyamagetsi syabo syasyabya ngʼekindu kĩtĩre nye. Ebĩtsĩpa byabo nʼesyamagetsi syabo sibyendisyatoka erĩlamyabo oko kiro kyʼerihitana lyʼOmwami Mukulu. Sibendĩsyũgũtya emitima yabo, kutse erĩũsũlya esyonda syabo, kusangwa ebibi byabo byabiribya ndwĩkale.

²⁰ Kandi babiribindula erikanga lyʼebyambalo biwe bibuya omwʼiyiheka, kandi mobayira esyosanamu syʼesyonye syabo nʼebindu byabo ebĩtĩre nye musyo. Busana nʼekyo, nabiriyirakyo ngʼekindu kĩtĩre nye kubo.

²¹ Kandi nasyahakyo omo byala byʼabandu bʼehandi eribya bunyegwa, nʼoko babi bʼekihugo eribya ekĩkahũngawa nabo basyatsandyakyo.

²² Nasyabindula obũsũ bwage eritendikeberabo, nabo basyatsandya aho wage ahabĩsamĩre. Nʼabarahĩ basyingiramo nʼerĩtsandyamo.

²³ Uhese obuhulula, kusangwa ekihugo kyoswĩre nʼerikola ebibi byʼerĩũta omusasi, nʼomũyĩ oswĩre mʼobutsibu.

²⁴ Busana nʼekyo, nasyaleta ebihanda bibi kutsibu nabyo byasyasĩgalya amanyũmba wabo. Kandi nasyaleka eriyiheka lyʼabandu bʼamaka iriahwa, nʼahabũyĩrĩre habo hasyatsandĩbwa.

²⁵ Omugulu obũlĩge bũkahĩka, basyasondya Obuholo, nĩkwa sibwendisyabanika.

²⁶ Erĩkwa lyasyahĩka oko bũlĩge, nʼeriambuka lyasyabya okwʼambuka. Neryo basyasondya erilota oko mũmĩnyererĩ, nĩkwa emigambo yasyabula oko mũhererĩ, nʼerihana lyasyabula oko bakulu.

²⁷ Omwami asyalira, nʼomunya-mwami asyambalĩbwa omwʼeriubaha, nʼebyala byʼabandu bʼekihugo byasyatitimana. Nasyakolabo ngʼemikolere yabo, kandi nasyatswerabo ngʼeritswera lyabo. Nabo basyaminya ko ndi Mwami Mukulu.