Ezekĩelĩ 48 - AMASAKO ABOYTRTRE WA NYAMUHANGA AWAKAHULAWA MO BIBLIA

Amena wʼebihanda erĩkũmĩ nʼebibiri

¹ Amena wʼebihanda waya: Erĩtsũka oko ndũlĩ yʼelutambi lwʼendata, hakũhĩ nʼenzira yʼeHetĩlonĩ erĩhĩka oko bwingiriro bwʼeHamatĩ na Hazarĩ-Enanĩ oko mutano wʼeDamasekĩ, erĩlolya elutambi lwʼendata hakũhĩ nʼeHamatĩ, erĩtsũka endata nʼeriya eyĩkwa, olubibi luguma ni lwa Danĩ.

² Nʼoko mutano wa Danĩ, erĩtsũka oko luhande lwʼendata erĩhĩka oko luhande lwʼeyĩkwa, olubibi luguma ni lwa Aserĩ.

³ Nʼoko mutano wa Aserĩ, erĩtsũka oluhande lwʼendata erĩhĩka oko luhande lwʼeyĩkwa, Nafũtalĩ, olubibi luguma.

⁴ Nʼoko mutano wa Nafũtalĩ, erĩtsũka oko luhande lwʼendata erĩhĩka oko luhande lwʼeyĩkwa, Manase olubibi luguma.

⁵ Nʼoko mutano wa Manase erĩtsũka oko luhande lwʼendata erĩhĩka oko luhande lwʼeyĩkwa, Efũraĩmũ olubibi luguma.

⁶ Nʼoko mutano wa Efũraĩmũ, erĩtsũka oko luhande lwʼendata erĩhĩka oko luhande lwʼeyĩkwa, Rũbenĩ olubibi luguma.

⁷ Nʼoko mutano wa Rũbenĩ, erĩtsũka oko luhande lwʼendata erĩhĩka oko luhande lwʼeyĩkwa, Yũda, olubibi luguma.

⁸ Nʼoko mutano wa Yũda, erĩtsũka oko luhande lwʼendata erĩhĩka oko luhande lwʼeyĩkwa, hasyabya erĩgabo eryo mwasyasolola, ni metere 12,955 oko bugali bwalyo, nʼobuli bwalyo ngʼolubibi luguma, erĩtsũka oko luhande lwʼendata erĩhĩka oko luhande lwʼeyĩkwa. Nʼahabũyĩrĩre hasyabya omo katĩkatĩ kalyo.

⁹ Erĩgabo eryo mwasyasolola busana nʼOmwami Mukulu lyasyabya omo buli bwalyo metere 12,955, nʼobugali bwalyo metere 5,182.

¹⁰ Neryo erĩgabo lĩbũyĩrĩre lyasyabya busana nʼabahererĩ, erĩlolya elutambi lwʼendata obuli bwʼemetere 12,955, nʼobugali erĩlolya eluhande lwʼeyĩkwa ni metere 5,182, nʼobugali erĩlolya oko luhande lwʼendata ni metere 5,182, nʼobuli erĩlolya elutambi lwʼeyĩkwa ni metere 12,955. Nʼahabũyĩrĩre hʼOmwami Mukulu hasyabya omo katĩkatĩ kalyo.

¹¹ Lyasyabya busana nʼabahererĩ abagala ba Zadokĩ ababirihigulwa, ababĩrĩteya erihana lyage, abatatswa omugulu abana ba Ĩsraelĩ batswa, ngʼAbalawĩ abatala.

¹² Nalyo lyasyabya erĩgabo busana nabo omo magabo wʼekitaka, omwanya abũyĩrĩre kutsibu, oko mutano wʼAbalawĩ.

¹³ Nʼerĩhereranĩa oko mutano wʼabahererĩ, Abalawĩ basyabya nʼemetere 12,955 mo buli, nʼobugali bwʼemetere 5,182. Obuli bosĩ bwasyabya metere 12,955, nʼobugali bwʼemetere 5,182.

¹⁴ Sĩbasyegũlaya kũlyo nʼahake, kutse erĩhĩnganĩalyo kutse erĩhĩtyalyo, kusangwa lĩbũyĩrĩre oko Mwami Mukulu.

¹⁵ Nʼemetere 2,591 eyĩsakĩre omo bugali bwalyo, nʼemetere 12,955 yʼobuli, byasyabya busana nʼabandu bosĩ busana nʼomũyĩ, na busana nʼamanyũmba wʼerĩĩkala na busana nʼemyanya buyira, nʼomũyĩ asyabya omo katĩkatĩ kalyo.

¹⁶ Nʼolulengo lwalyo lolũ: oko luhande lwʼelutambi lwʼendata metere 2,332, nʼoluhande lwʼolundi lutambi lwʼeyĩkwa ni metere 2,332, nʼoko luhande lwʼendata ni metere 2,332, nʼoko luhande lwʼeyĩkwa ni metere 2,332.

¹⁷ Nʼomũyĩ asyabya nʼemyanya, erĩlolya elutambi lwʼendata, ni metere 130, nʼoko lundi lutambi lwʼeyĩkwa, ni metere 130, nʼoko luhande lwʼendata ni metere 130, nʼoko luhande lwʼeyĩkwa, ni metere 130.

¹⁸ Nʼolwasĩgalira oko buli bwago bũhererenĩe nʼerĩgabo lĩbũyĩrĩre, bwasyabya metere 5,182 erilola ebwanga bwʼendata, ni metere 5,182 erilola ebwanga bwʼeyĩkwa, kandi lyasyahereranĩa nʼerĩgabo lĩbũyĩrĩre. Nʼebyalya ebikeramo byasyabya kalyo busana nʼabakakola omũbĩrĩ abʼomũyĩ.

¹⁹ Nʼabakola omũbĩrĩ bʼomũyĩ, abʼebihanda byosĩ bya Ĩsraelĩ basyalimalyo.

²⁰ Obuli bwʼerĩgabo lyosĩ bwasyabya metere 12,955, nʼobugali bwalyo ha nʼaho. Mwasyasolola erĩgabo lĩbũyĩrĩre, eriringirirene oko mbande ĩnĩ, haguma nʼekitaka kyʼomũyĩ.

Olubibi lwʼomunya-mwami

²¹ Nʼolwasyasĩgalira lwasyabya busana nʼomunya-mwami, oko luhande luguma nʼoko lundi lwʼerĩgabo lĩbũyĩrĩre haguma nʼekitaka, kyʼomũyĩ. Embere syʼemetere 12,955 yʼerĩgabo erilola oko mutano wʼendata, kandi ebwanga bwʼeyĩkwa embere syʼemetere 12,955, erilola oko mutano wʼeyĩkwa, nʼerĩhereranĩa nʼamagabo, lyasyabya busana nʼomunya-mwami. Nʼerĩgabo lĩbũyĩrĩre, nʼabahũyĩrĩre hʼenyũmba byasyabya omo katĩkatĩ kalyo.

²² Kandi eyĩhya oko kitaka kyʼAbalawĩ, nʼeyĩhya oko kitaka kyʼomũyĩ, kusangwa ebiri omo katĩkatĩ kʼolubibi lwʼomunya-mwami, ebyosĩ omo katĩkatĩ kʼomutano wa Yũda nʼomutano wa Benyamĩna, byasyabya busana nʼomunya-mwami.

Esyombibi syʼebindi bihanda bitanu

²³ Nĩkwa busana nʼebindi bihanda: erĩtsũka oko luhande lwʼendata erĩhĩka oko luhande lwʼeyĩkwa, busana na Benyamĩna olubibi luguma.

²⁴ Nʼoko mũsĩke wʼomutano wa Benyamĩna, erĩtsũka oko luhande lwʼendata erĩhĩka oko luhande lwʼeyĩkwa, busana na Sĩmeonĩ olubibi luguma.

²⁵ Nʼoko mũsĩke wʼomutano wa Sĩmeonĩ, erĩtsũka oko luhande lwʼendata erĩhĩka oko luhande lwʼeyĩkwa, busana na Ĩsakara olubibi luguma.

²⁶ Nʼoko mũsĩke wʼomutano wa Ĩsakara erĩtsũka oko luhande lwʼendata erĩhĩka oko luhande lwʼeyĩkwa, busana na Zebũlũnĩ olubibi luguma.

²⁷ Nʼoko mũsĩke wʼomutano wa Zebũlũnĩ erĩtsũka oko luhande lwʼendata erĩhĩka oko luhande lwʼeyĩkwa, busana na Gadĩ olubibi luguma.

²⁸ Nʼoko mũsĩke gʼomutano wa Gadĩ, oko luhande lwʼelutambi lwʼeyĩkwa erilola elutambi, omutano asyabya erĩtsũka eTamarĩ erĩhĩka oko magetsi wʼeMerĩbatĩ-Kadesĩ, erĩhĩka oko Kũsĩ kʼeMĩsĩrĩ, oko Ngetsi Nene.

²⁹ Ekĩ ni kitaka mwasyagabakyo omwʼigereka oko bihanda bya Ĩsraelĩ eribya mwandu nʼaya ni magabo wabo, Omukama Iye Omwami Mukulu atya.

Esyongyo syʼomũyĩ

³⁰ Esĩ sye syongyo syʼomũyĩ esyʼerĩlũamo: oko luhande lwʼelutambi lwʼendata erirenga ni metere 2,250.

³¹ Syasyabya esyongyo syʼomũyĩ esikahulawa omo mena wʼebihanda bya Ĩsraelĩ, esyongyo ĩsatu oko luhande lwʼelutambi lwʼendata: olũkyo luguma lwa Rũbenĩ; olũkyo luguma lwa Yũda; olũkyo luguma lwa Lawĩ.

³² Nʼoko luhande lwʼendata metere 2,250, hasyabya esyongyo ĩsatu: olũkyo luguma lwa Yosefũ; olũkyo luguma lwa Benyamĩna; olũkyo luguma lwa Danĩ.

³³ Nʼoko lundi luhande lwʼelutambi lwʼeyĩkwa, omo lulengo ni metere 2,250; hasyabya, esyongyo ĩsatu: olũkyo luguma lwa Sĩmeonĩ; olũkyo luguma lwa Ĩsakarĩ; olũkyo luguma lwa Zebũlũnĩ.

³⁴ Nʼoko luhande lwʼeyĩkwa metere 2,250, hasyabya esyongyo ĩsatu: olũkyo luguma lwa Gadĩ; olũkyo luguma lwa Aserĩ; olũkyo luguma lwa Nafũtalĩ.

³⁵ Erĩtĩmba oko mũyĩ hasyabya metere 9,000; nʼerĩna lyʼomũyĩ oyo erĩtsũka ekiro ekyo lyasyabya: Omwami Mukulu ali aho.