Ezekĩelĩ 47 - AMASAKO ABOYTRTRE WA NYAMUHANGA AWAKAHULAWA MO BIBLIA

Olũsĩ olukahuluka erĩlũa omo hekalũ

¹ Neryo mwaswanyireta oko lũyĩ lwʼenyũmba. Neryo lebaya, amagetsi akahuluka eyĩkwa oko kibanza kyʼenyũmba erĩlolya endata kusangwa enyũmba yabya ĩlolĩrye ebwanga bwʼendata. Nʼamagetsi abya akasenda akalũa eyĩkwa, oko luhande lwʼamali, lwʼenyũmba, oko lutambi lwʼeyĩkwa lwʼekiherero.

² Neryo mwanyĩhũlũkya eyĩhya omo nzira yʼolũkyo lwʼelutambi lwʼendata, neryo mwanyĩtĩmbya omo nzira yʼeyĩhya erĩhĩka oko lũkyo lwʼeyĩhya, omo nzira eyĩkalolaya endata. Neryo lebaya, amagetsi abya akasenda akalũa oko luhande lwʼelutambi lwʼeyĩkwa.

³ Omugulu omundu oyo aya ebwanga bwʼendata nʼolukoba omo byala biwe, neryo mwalenga metere 519, neryo mwanyĩlabya omo magetsi ayo, nʼamagetsi mwahĩka oko makongũlo.

⁴ Kandi mwalenga metere 519, neryo mwanyĩlabya omo magetsi ayo, nʼamagetsi mwahĩka oko marwĩ. Kandi mwalenga metere 519, mwanyĩlabya omo magetsi, nʼamagetsi mwahĩka omo mbindi.

⁵ Nʼenyũma wʼaho mwalenga metere 519, mohabya olũsĩ Isinangatoka erisoka; kusangwa amagetsi mũsũla, amagetsi wʼeritsihamo, olũsĩ olutelwangatoka erisokwa.

⁶ Neryo mwabũga nage ati, Omugala wʼomundu wanamalangira ekĩ kwehĩ? Neryo mwanyireta mwanyĩsũbya oko mukyingyi wʼolũsĩ.

⁷ Neryo omugulu nasubula, lebaya, oko mukyingyi wʼolũsĩ ihali emiti mingi kutsibu oko mukyingyi oyũ nʼoko gundi olya.

⁸ Neryo mwambwira ati, Amagetsi aya akahuluka nʼeriya oko kihugo kyʼendata, nʼeriandagalira omo Araba. Neryo akalolaya omo ngetsi. Amagetsi akasendĩbawa omo ngetsi, nʼamagetsi wʼengetsi akabya mahya-mahya.

⁹ Neryo obuli kihangikwa ekiriho, ekikakanyirira ehosĩ eyo lũsĩ lukaya, byasyabyaho. Kandi lwasyabya mwʼesĩswĩ nene, kusangwa amagetsi aya akayaho, nʼawandi magetsi akabya mahya-mahya, nʼobuli kindu kyasyabyaho ehosĩ olũsĩ lukaya.

¹⁰ Neryo, abasohĩ basyahangana hakũhĩ nago, erĩtsũka eEngedĩ erĩhĩka eEnglaĩmũ hasyabya obusanzo bwʼamataha-taha. Esĩswĩ syabo syasyabya omo mihanda yasyo, ngʼesĩswĩ syʼeNgetsi Nene, esyonyingi kutsibu.

¹¹ Nĩkwa obutimba bwaho, nʼekisesa kyaho, sibyendisyabya bihya-bihya. Hasyasĩgwa busana nʼomũnyũ.

¹² Nʼahakũhĩ nʼolũsĩ oko mukyingyi walo oko luhande olũ nʼoko luhande lulya, hasyalasa obuli muti busana nʼakalyo. Ebikoma byayo sibyendisyuma, kutse ebĩgũma byayo sibyendisyabula. Yasyahetya ebĩgũma obuli mukera, kusangwa amagetsi waho akasenda akahuluka ahabũyĩrĩre. Nʼebĩgũma byayo byasyabya busana nʼakalyo nʼebikoma byayo byasyabya busana nʼerĩlamya.

Erigaba ekihugo oko bihanda erĩkũmĩ nʼebibiri

¹³ Omukama Iye Omwami Mukulu ati, Oyũ asyabya mutano ogo mwasyagabira kwʼekihugo eribya omwandu omo katĩkatĩ kʼebihanda ĩkũmĩ nʼebibiri bya Ĩsraelĩ. Yosefũ asyabya na mbibi ĩbĩrĩ.

¹⁴ Mwasyagabakyo mo mwandu ogundi ngʼogundi, kusangwa nalahĩraya erihakyo abotata wenyũ. Nʼekihugo ekĩ kyasyabya kyenyũ mo mwandu.

¹⁵ Nʼoyũ go mutano wʼekihugo: Oko luhande lwʼelutambi lwʼendata, erĩtsũka oko Ngetsi Nene, omo nzira yʼeHetĩlonĩ, erĩhĩka oko bwingiriro bwʼeZedada;

¹⁶ Hamatĩ, Berota, Sĩbraĩmũ, ekiri omo katĩkatĩ kʼomutano wʼeDamasekĩ nʼomutano wʼeHamatĩ: Hazorĩ-Hatĩkonĩ, owali oko mutano wʼeHaũranĩ.

¹⁷ Nʼomutano erĩtsũka oko ngetsi, asyabya eHazorĩnonĩ oko mutano wʼeDamasekĩ, nʼelutambi erĩlolya elutambi lwʼendata ni mutano wʼeHamatĩ. Oyũ go mutano wʼelutambi lwʼendata.

¹⁸ Nʼoluhande lwʼendata, erĩtsũka omo katĩkatĩ kʼeHaũranĩ nʼeDamasekĩ nʼeGĩleadĩ nʼekihugo kya Ĩsraelĩ, hasyabya eYorodanĩ, erĩtsũka oko mutano wʼelutambi lwʼendata erĩhĩka oko ngetsi yʼendata mwasyalengaho. Olũ lo luhande lwʼendata.

¹⁹ Nʼoluhande lwʼelutambi lwʼeyĩkwa erĩlolya elutambi lwʼeyĩkwa asyalaba erĩtsũka eTamarĩ erĩhĩka oko magetsi wʼeMerĩbotĩ-Kadesĩ, erĩhĩka oko Kũsĩ kʼeMĩsĩrĩ, erĩhĩka oko Ngetsi Nene. Oyũ ni mutano wʼelutambi lwʼeyĩkwa erĩlolya elutambi lwʼeyĩkwa.

²⁰ Nʼoluhande lwʼeyĩkwa lwasyabya Ngetsi Nene, erĩtsũka oko mutano wʼelutambi lwʼeyĩkwa erĩhĩka eyisirya wʼeLebo-hamatĩ. Olũ lo luhande lwʼeyĩkwa.

²¹ Ko mwasyayigabira ekihugo ekĩ kyo mutya omo katĩkatĩ kenyũ, ngʼebihanda bya Ĩsraelĩ ko biri.

²² Neryo mwasyagabakyo omwʼigereka busana nʼomwandu omo katĩkatĩ kenyũ nʼoko bʼehandi nʼomo katĩkatĩ kʼabʼehandi abakabungira omo katĩkatĩ kenyũ, abasyabuta abana omo katĩkatĩ kenyũ. Nabo basyabya ũkwʼĩnywe ngʼababutwa bʼeka omo katĩkatĩ kʼabana ba Ĩsraelĩ. Basyalya omwandu haguma nenyũ omo bihanda bya Ĩsraelĩ.

²³ Neryo kyasyabya, omo kihanda ekyo owʼehandi akabungira, ye nʼeyo mwasyamuha omwandu wuwe, Omukama iye Omwami Mukulu atya.