Ezekĩelĩ 44 - AMASAKO ABOYTRTRE WA NYAMUHANGA AWAKAHULAWA MO BIBLIA

Omwatsi wʼabahererĩ babi

¹ Neryo mwanyĩsũbya omo nzira yʼolũkyo lwʼeyĩhya lwʼahabũyĩrĩre olũlolĩrye ebwanga bwʼendata. Nalo lwabya ĩlũkĩngĩre.

² NʼOmwami Mukulu mwabũga nage ati, Olũkyo olũ lwasyakingwa. Silwendisyakingulwa, kutse sihali mundu wasyingira mulo, kusangwa Omwami Mukulu Nyamuhanga wa Ĩsraelĩ, abiriingira mulo, neryo busana nʼekyo lwasyakingwa.

³ Nĩkwa busana nʼomunya-mwami, asyĩkalamo ngʼomunya-mwami eririra akalyo embere syʼOmwami Mukulu. Asyingira omo nzira yʼobũsekũ bwʼolũkyo, kandi asyaswahuluka omo nzira eyo.

⁴ Neryo mwanyireta omo nzira yʼolũkyo lwʼelutambi lwʼendata embere syʼenyũmba. Nage monalebya, neryo lebaya, olukengerwa lwʼOmwami Mukulu molũsũlya enyũmba yʼOmwami Mukulu. Nage monawa kibiri-biri.

⁵ Neryo Omwami Mukulu mwambwira ati, Omugala wʼomundu Ũlebaye ndeke, ulangire nʼameso wawe, wowe nʼamatwĩ wawe ebyosĩ ebyo ngakubwira busana nʼebihano byosĩ byʼenyũmba yʼOmwami Mukulu, nʼemigambo yosĩ yayo, kandi, Ũlebaye ndeke oko bwingiriro bwʼenyũmba, haguma nʼobuli buhulukiro bwʼahabũyĩrĩre.

⁶ Kandi wasyabwira abakahona, oko kihanda kya Ĩsraelĩ uti, Omukama Iye Omwami Mukulu ati, Ĩnywe kihanda kya Ĩsraelĩ, esyonye syenyũ syosĩ sibye singaho,

⁷ omugulu mwĩngĩraya abʼehandi, abatabwene omo mitima, nʼabatabwene omo mubiri, eribya omwisi wʼahabũyĩrĩre hage, erĩhalyaho, ye nyũmba yage, omugulu mwahonga akalyo kage, ebĩsabũ nʼomusasi, kusangwa babĩrĩtwa endagano yage eritomeka kwʼesyonye syenyũ syosĩ.

⁸ Kandi sĩmwetateya ebindu byage bĩbũyĩrĩre, nĩkwa mwabĩrĩĩhĩra abʼehandi erĩteya ahabũyĩrĩre hage.

⁹ Omukama Iye Omwami Mukulu ati, Sihali owʼehandi, oyutabwene omo mutima nʼoyutabwene omo mubiri oyo wasyingira ahabũyĩrĩre hage, oko bʼehandi abali omo katĩkatĩ kʼabagala ba Ĩsraelĩ.

¹⁰ Nĩkwa Abalawĩ abanyitswako, omugulu Ĩsraelĩ atswa, abanyitswako nʼerikwama esyosanamu syabo, basyaheka erisuyira lyʼebibi byabo.

¹¹ Nĩkwa basyabya abakakola omo habũyĩrĩre hage, ĩbakategaya esyongyo syʼenyũmba, nʼerikola omo nyũmba. Basyakera obuhere bwʼerĩokererya nʼesyohongo busana nʼabandu, kandi basyahangana embere wabo nʼerikolerabo.

¹² Kusangwa bakolerabo embere wʼesyosanamu syabo, mobabya ekyʼerĩtwĩkalya kyʼebibi busana nʼekihanda kyʼeĨsraelĩ. Busana nʼekyo nabĩrĩlahĩrya busana nʼerilwa nabo, Omukama Iye Omwami Mukulu atya. Ati, Basyaheka erisuyira busana nʼebibi byabo.

¹³ Nabo sibendisyasegera hakũhĩ nage, erinyikolera omũbĩrĩ ngʼomũhererĩ, kutse erisegera hakũhĩ nʼebindu byage bĩbũyĩrĩre, oko bindu ebĩbũyĩrĩre kutsibu. Nĩkwa basyaheka esĩsonĩ syabo, nʼesyonye syabo esyo babirikola.

¹⁴ Nĩkwa nasyayirabo mo bateya bʼenyũmba, busana nʼomũbĩrĩ wayo gosĩ, na busana nʼebyosĩ byasyakolwamo.

Emĩbĩrĩ yʼabahererĩ

¹⁵ Nĩkwa abahererĩ Abalawĩ, abagala ba Zadokĩ, abategaya ahabũyĩrĩre hage omugulu abana ba Ĩsraelĩ banyitswako, basyanyisegerako erinyikolera. Basyahangana embere syage erinyiherera ebĩsabũ nʼomusasi, Omukama Iye Omwami Mukulu atya.

¹⁶ Basyingira ahabũyĩrĩre hage basyahĩka hakũhĩ nʼemesa yage, erinyikolera, basyateya omũbĩrĩ wage.

¹⁷ Neryo kyasyabya omugulu bakingira omo syongyo syʼekibuga kyʼomwisi, basyambalĩbwa esyongimba syʼekĩtanĩ. Sihali obweya bwʼembũlĩ bwasyahĩka kubo omugulu bakakola omo syongyo syʼekibuga kyʼomwisi, nʼomo nyũmba.

¹⁸ Basyambala otũkofĩa twʼekĩtanĩ oko mitwe yabo, kandi basyambala ehiputula byʼomwisi ehyʼekĩtanĩ oko bihinga byabo. Sibendisyayikyika omo kindu ekyangaleta olũnza.

¹⁹ Nʼomugulu bakahuluka omo kibuga kyʼeyĩhya, kye kibuga kyʼeyĩhya oko bandu, basyambula esyongimba syabo esyo bakakoleramo, nʼeribikasyo omo byumba bĩbũyĩrĩre. Ibambala esindi ngimba, sibatwalire abandu ekĩbũyĩrĩre omo syongimba syabo.

²⁰ Nibya sĩbendĩsyasĩsa emitwe yabo, nĩkwa sĩbendĩsyakotya esyonzwiri syabo. Basyasura oko nzwiri syʼemitwe yabo lisa.

²¹ Kutse sihali omũhererĩ oyo wasyalya ebĩnyũ, omugulu bakingira omo kibuga kyʼomwisi.

²² Kandi sĩbendĩsyahĩkya omũkalĩ mũkwakalĩ, kutse oyuliakomolawa. Nĩkwa basyĩmya oko bana-bato abana bʼekihanda kya Ĩsraelĩ, kutse omũkwakalĩ oyũlĩakwĩrawa nʼomũhererĩ.

²³ Kandi, basyakangĩrĩrya abandu bage erisombola omo katĩkatĩ kʼebĩbũyĩrĩre nʼebĩtabũyĩrĩre, nʼerĩmĩnyĩsyabo eriminya ekĩtowene nʼekyerĩre.

²⁴ Kandi omo buhaka basyahangana nʼeritswera. Basyatswerago ngʼebihano byage. Kandi basyabika emigambo yage nʼebihano byage omo biro bikulu byage byosĩ ebyalagawa, kandi basyakenga esyo Sabato syage.

²⁵ Kandi sĩbasyehĩka hakũhĩ nʼekĩnda erĩyĩtsandya. Nĩkwa, banganayĩtsandya busana nʼĩse kutse nyĩnya, kutse busana nʼomugala, kutse busana nʼomwali, busana nʼomugala wabo, kutse busana nʼomwali wabo oyũtahĩkĩbwe.

²⁶ Kandi amabiera basyamuganzira ebiro birinda.

²⁷ Nʼoko kiro akingira ahabũyĩrĩre, omo kibuga kyʼomwisi, erikola omo habũyĩrĩre, asyahera obuhere buwe bwʼebibi, Omukama Iye Omwami Mukulu atya.

²⁸ Neryo busana nʼomwandu busana nabo, ĩngye indi mwandu wabo. Kandi simwendisyahabo nzĩgalya omo Ĩsraelĩ. Ingye indi nzĩgalya yabo.

²⁹ Basyalya obuhere bwʼeyĩsyano yʼengano nʼobuhere bwʼebibi, nʼobuhere bwʼolubanza, kandi obuli kindu ekyahigulawa omo Ĩsraelĩ kyasyabya kyabo.

³⁰ Nʼobuyilula obwʼerĩmbere bʼobuli mbuto syosĩ, nʼobuli buhere bʼobuli kindu oko syohongo syenyũ syosĩ, byasyabya busana nʼomũhererĩ; nibya mwasyaha abahererĩ erĩgabo lyʼerĩmbere lyʼesĩsyano mbisi, erituma omũyĩsa iniabya oko nyũmba yawe.

³¹ Abahererĩ sibasyerya enyonyũ kutse nyama eyiryayiholera, kutse eyabĩrĩhũtalĩbwa.