Ezekĩelĩ 42 - AMASAKO ABOYTRTRE WA NYAMUHANGA AWAKAHULAWA MO BIBLIA

Erirenga ebyumba byʼekibuga

¹ Neryo mwanyireta omo kibuga kyʼeyĩhya, enzira eyikalola elutambi lwʼendata. Neryo mwanyireta omo kyumba ekyabya eyisirya oko mwanya buyira nʼeyisirya oko nyũmba eyĩlolĩrye elutambi lwʼendata.

² Obuli bwakyo bwabya metere 52, nʼobugali bwabya metere 26.

³ Eyisirya oko metere 6 eyo yʼekibuga kyʼomwisi, nʼeyisirya oko kibanza kyʼamabwe ekyʼekibuga kyʼeyĩhya, habya enzira ngʼeyindi nzira omo manyũmba asatu awalabĩre endata.

⁴ Nʼembere wʼebyumba ebyo habya enzira yʼobugali bwʼemetere 6 oko luhande lwʼomwisi; enzira yʼemetere 52. Nʼesyonyũyĩ syayo syabya sĩlolĩrye elutambi lwʼendata.

⁵ Nĩkwa ebyumba byʼendata byabya bĩkũhĩ kusangwa esyonzira esyo mosyaheka omwanya wasyo kwilaba esyʼeyĩkwa, nʼesyʼomo katĩkatĩ, omo nyũmba eyo.

⁶ Kusangwa syabya omo manyũmba asatu erĩlolya endata, isisiwite esyondũyĩ, ngʼesyondũyĩ syʼebibuga. Neryo ebyumba byʼendata byabya ĩbyabĩrĩhĩrwa enyũma kwilaba ebyumba byʼomo katĩkatĩ nʼebyʼeyĩkwa erĩtsũka oko kitaka.

⁷ Nʼolũhĩmbo lwʼeyĩhya oko mũsĩke wʼebyumba olũlolĩrye omo kibuga kyʼeyĩhya embere wʼebyumba, obuli bwalo bwabya metere 26.

⁸ Kusangwa obuli bwʼebyumba ebyabya omo kibuga kyʼeyĩhya bwabya metere 26. Neryo lebaya, obuli bwʼebyumba ebyabya embere wʼeHekalũ bwabya metere 52.

⁹ Kandi eyĩkwa oko byumba ebĩ habya ahʼeriingirira oko luhande lwʼendata, omugulu omundu akingira mubyo akalũa omo kibuga kyʼeyĩhya.

¹⁰ Kandi omo bunene bwʼolũhĩmbo lwʼekibuga erĩlolya oko luhande lwʼendata embere wʼomwanya buyira nʼembere wʼenyũmba, mohabya ebyumba.

¹¹ Nʼenzira eyabya embere wʼebyumba yabya ngʼerisosa lyʼebyumba ebyabya oko luhande lwʼelutambi lwʼendata, omo buli bwabyo bwabya ngʼobugali bwabyo. Nʼahʼerihulukira habyo hosĩ habya ngʼolulengo lwabyo, kandi ngʼesyonyũyĩ syabyo.

¹² Kandi ngʼesyonyũyĩ syʼebyumba ebyabya bĩlolĩrye oko luhande lwʼelutambi lwʼeyĩkwa habya Olũyĩ oko mutwe wʼenzira, yenzira embere wʼolũhĩ oko luhande lwʼendata, aho mundu akingirira mubyo.

¹³ Neryo mwambwira ati, Ebyumba byʼoluhande lwʼelutambi lwʼendata nʼebyumba byʼolundi lutambi lwʼeyĩkwa, ebiri eyisirya oko mwanya buyira, ebyo ni byumba bĩbũyĩrĩre, aho abahererĩ abali hakũhĩ nʼOmwami Mukulu basyalira ebindu bĩbũyĩrĩre kutsibu. Omo, basyahĩra ebindu bĩbũyĩrĩre kutsibu, nʼobuhere bwʼeyĩsyano yʼengano, nʼobuhere bwʼebibi, nʼobuhere bwʼolubanza, kusangwa habũyĩrĩre.

¹⁴ Omugulu abahererĩ bakayamo, sibendisyahuluka eriya omo kibuga kyʼeyĩhya, bakalũa ahabũyĩrĩre bate babikayo esyongimba syabo esyo bakakolamo, kusangwa sĩbũyĩrĩre. Kandi basyambala esindi ngimba. Ibaminya erĩyĩtũnda ahali abandu.

¹⁵ Neryo omugulu amabibuga erirenga enyũmba yʼomwisi, mwanyireta eyĩhya omo nzira yʼolũkyo olũlolĩrye eluhande lwʼendata, neryo mwalengalo oko mbande syosĩ.

¹⁶ Mwalenga oko luhande lwʼendata omo luseke lʼolulengo metere 1,555, omo luseke lwʼerirenga.

¹⁷ Mwalenga oluhande lwʼelutambi lwʼendata omo luseke metere 1,555 omo luseke lwʼerirenga.

¹⁸ Neryo mwalenga oko luhande lwʼolundi lutambi lwʼeyĩkwa metere 1,555 omo luseke lwʼerirengamo.

¹⁹ Neryo mwabindukira oko luhande lwʼeyĩkwa, mwalenga metere 1,555 omo luseke lwʼerirengamo.

²⁰ Mwalengayo oko mbande ĩnĩ syosĩ. Yabya oko lũhĩmbo olũtĩmbĩre ehosĩ. Obuli bwalo ini metere 1,555, nʼobugali metere 1,555, erigaba ahabũyĩrĩre nʼahatabũyĩrĩre.