Ezekĩelĩ 4 - AMASAKO ABOYTRTRE WA NYAMUHANGA AWAKAHULAWA MO BIBLIA

Omũsyo wʼeribambira eYerũsalema

¹ Nawe nibya omugala wʼomundu, ũyĩmĩraye erĩtofalĩ, ũhĩreryo embere syawe, Usake kulyo ekĩsosekanĩo kyʼomũyĩ wʼeYerũsalema.

² Neryo ubambirego, ũhĩmbe olũhĩmbo lwʼeribambirago, ũhĩmbeko ebilundo byʼekitaka, nʼerĩhĩra esyonganda, nʼerĩhĩra emigogo yʼerisambulaho erĩtĩmba oko mbande syosĩ.

³ Neryo ũyĩmĩraye oluyo lwʼekyuma, ũhĩrelo ngʼolũhĩmbo lwʼekyuma omo katĩkatĩ kawe nʼomũyĩ, kandi ũlolaye obũsũ bwawe boko, nako ikwabambirwa, nawe wasyabambirago. Ekĩ ni kiminyikalo busana nʼekihanda kya Ĩsraelĩ.

⁴ Nĩkwa uwe ugotserere oko luhande lwawe lwʼamalembe, ũhĩre ebibi byʼekihanda kya Ĩsraelĩ byo kulo. Wasyaheka ebibi byabo ngʼemiganzo yʼebiro ebyo wasyagotsera kulo.

⁵ Kusangwa nabĩrĩkwahũlĩrya emyaka yʼebibi byabo eribya ukʼuwe emiganzo yʼebiro, byo biro magana asatu nʼamakũmĩ mwenda (390). Litya wasyaheka ebibi byʼekihanda kya Ĩsraelĩ.

⁶ Kandi omugulu wamabĩberererya ebyo, wasyagotserera engendo yʼakabiri, nĩkwa oko lukanga lwawe lwʼamali, wasyaheka ebibi byʼekihanda kya Yũda. Nabĩrĩkwahũlĩryakyo ebiro makũmĩ ani, obuli kiro busana nʼomwaka muguma.

⁷ Nawe wasyalolya obũsũ bwawe ebwanga bwʼeribambira lyʼeYerũsalema, nʼokuboko kwawe ĩkũnasũkwĩre, neryo wasyaminyerera busana nako.

⁸ Neryo lebaya, nasyakũhĩra kwʼebikoba, isiwendisyabindukira oko luhande luguma erĩlũa oko lundi luhande, erĩhĩka aho wasyaberererya ebiro byawe byʼeribambirako.

⁹ Nĩkwa uwe, ũyĩmĩraye engano, nʼekisusu, nʼobũhotĩ, nʼebĩtsalĩ, nʼobulo, nʼobuhemba, ũhĩrebyo omo nyungu, uyitsumbirebyo mo bundu. Wasyalyabo ngʼebiro ebyo wasyagotserera oko lukanga lwawe, byo biro magana asatu nʼamakũmĩ mwenda (390).

¹⁰ Nʼakalyo kawe ako wasyalya kasyalengwa omo kĩlo, esekelĩ makũmĩ abiri oko kiro kiguma. Wasyalyako oko mugulu muguma muguma.

¹¹ Wasyapũlya amagetsi omo lulengo, ekitswe kiguma ekyʼendatu kyʼetsũpa. Wasyapũlyago omugulu muguma muguma.

¹² Wasyalyako ngʼekitole kyʼekisusu, kandi wasyokyako embere syʼameso wabo nʼamabĩ wʼomundu.

¹³ Kandi Omwami Mukulu mwabũga ati, Litya abana ba Ĩsraelĩ basyalya akalyo kabo akatsandĩrya omo katĩkatĩ kʼebihanda eyo nasyahigirabo.

¹⁴ Nĩkwa monabũga nyiti, Ĩlolo, Omukama Iye Omwami Mukulu! Lebaya, sinditatsanda na kera, kusangwa erĩtsũka oko bũlwana bwage erĩhĩka na lino, sinditalya ekyayiholera, kutse ekĩtawa nʼesyonyama, kutse esĩswĩ esĩtsandĩrya sisyetingira omo buno bwage.

¹⁵ Neryo mwambwira ati, Lebaya, nasyakuha ebise byʼende omo mwanya wʼamabĩ wʼomundu, nawe wasyatsumba akalyo kawe endata kubyo.

¹⁶ Nʼakandi mwambwira ati, Omugala wʼomundu lebaya, nasyakehya akalyo omo Yerũsalema. Basyalya akalyo oko kĩlo, haguma nʼerĩhanga-hangya, kandi basyapũlya amagetsi oko lulengo, nʼomwʼisweka,

¹⁷ kusangwa akalyo nʼamagetsi, byasyakeha. Kandi basyaswekerana, nʼeribonda omo bibi byabo.