Ezekĩelĩ 39 - AMASAKO ABOYTRTRE WA NYAMUHANGA AWAKAHULAWA MO BIBLIA

Erĩkwa lya Gogĩ

¹ Nawe, mugala wʼomundu, uminyerere busana nʼeGogĩ, ũbũge uti, Omukama Iye Omwami Mukulu ati, Lebaya, uwe Gogĩ ngalwa nawe, uwe munya-mwami wʼeRosĩ, eMesekĩ nʼeTũbalĩ,

² Nasyakubindula, nʼerĩkũkũna, nʼerĩkũhetũkya erĩlũa oko bihande byʼendũlĩ byʼelutambi lwʼendata, nʼerikuleta erilwa nʼebitwa bya Ĩsraelĩ.

³ Nasyaswĩrya obuta bwawe erĩlũsyabo omo byala byawe byʼamalembe, nʼerĩtoya emisoha yawe omo byala byawe byʼamali.

⁴ Wasyawa oko bitwa bya Ĩsraelĩ, uwe nʼemilondo yawe yosĩ yʼabasĩrĩkanĩ, nʼebihanda ebiri haguma nawe. Nasyakuha oko syonyonyũ mo kalyo esĩkalĩre esyʼemihanda yosĩ nʼoko syonyama syʼomolĩ.

⁵ Wasyawa omolĩ, kusangwa nĩ ngye, Omukama Iye Omwami Mukulu oyo wabĩrĩbũgakyo.

⁶ Nasyatumira Magogĩ omuliro, nʼukwʼabo abĩkere buholo omo mĩsĩke yʼengetsi. Nabo basyaminya ko ndi Mwami Mukulu.

⁷ Nasyamĩnyĩsya erĩna lyage lĩbũyĩrĩre omo katĩkatĩ kʼabandu bage Ĩsraelĩ. Kandi sindiendisyaswaleka erĩna lyage lĩbũyĩrĩre likatsumwa. Nʼebihanda byasyaminya ko ndi Mwami Mukulu, Oyũbũyĩrĩre omo Ĩsraelĩ.

⁸ Lebaya, kikasa, kandi kyasyakolwa, Omukama Iye Omwami Mukulu akabũga. Ekyo ni kiro ekyo nahula.

⁹ Neryo abĩkere omo mĩyĩ ya Ĩsraelĩ basyahuluka, basyakya omuliro gʼomo bindu byʼamalwa nʼerĩhĩsyabyo, esyongabo nʼesyongabo nyike-nyike, amata nʼemisoha, nʼemyũtso, nʼamatũmo, basyakya omuliro mubyo emyaka irinda.

¹⁰ Neryo isibendisyasenya esyongwĩ omolĩ, kutse erikuma-kuma esyongwĩ omo mũsĩtũ, kusangwa basyakya omuliro gʼomo bindu byʼamalwa ebyo. Kandi basyahũnga abahũngabo, nʼerinyega abanyegabo, Omukama Iye Omwami Mukulu atya.

¹¹ Neryo kyasyahĩka oko kiro ekyo nasyaha Gogĩ ahʼerita abandu omo Ĩsraelĩ, omusya wʼabagendĩ abakalaba ebwanga bwʼendata oko ngetsi, nʼaho hasyakakĩrya abakalaba. Nʼaho basyata Gogĩ nʼendeko yiwe yosĩ, neryo basyahulaho mo musya wa Hamonĩ-Gogĩ.

¹² Ekihanda kya Ĩsraelĩ kyasyatabo oko mikera irinda, busana nʼerĩbĩrya ekihugo.

¹³ Ega, abandu bosĩ bʼekihugo ekyo basyatabo. Neryo kyasyabya erihalambwa kubo oko kiro ekyo nasyayikenga, Omukama Iye Omwami Mukulu atya.

¹⁴ Nabo basyasombola abandu, abakandisyalaba omo kihugo erita abandu ababya bakalaba omo kihugo, ba nʼababya bakasĩgala oko kitaka erĩbĩryakyo. Basyasondasondabo enyũma wʼemikera irinda.

¹⁵ Neryo omugulu abakalaba omo kihugo basyalabamo, nʼomundu akalangira okwʼĩkũha lyʼomundu, neryo asyahĩra ekiminyikalo hakũhĩ nalyo, erĩhĩka aho abakata abandu basyatalyo omo musya wa Hamonĩ-Gogĩ.

¹⁶ Na Hamonĩ lyasyabya erĩna lyʼomũyĩ. Ko basyabĩrya ekihugo kyo batya.

¹⁷ Nawe, mugala wʼomundu, Omukama Iye Omwami Mukulu ati, Ũbũge nʼesyonyonyũ syʼemihanda yosĩ, nʼoko buli nyama yʼomolĩ uti, Mũyĩhĩndanaye, mwase, mũyĩhĩndanaye oko mbande syosĩ oko hongo yage, eyo ngahonga busana nenyũ, yo hongo nene oko bitwa bya Ĩsraelĩ, imwaminya erirya esĩswĩ nʼerĩpũlya omusasi.

¹⁸ Mwasyalya esĩswĩ syʼesyombangĩ, nʼerĩpũlya omusasi wʼabanya-mwami bʼekihugo, ngʼababya esyombangale, nʼehyana hyʼesyombũlĩ, nʼesyombene-hene, nʼesyonume, esyosĩ ebisabwe byʼeBasanĩ.

¹⁹ Nenyũ mwasyalya ebĩsabũ erĩhĩka aho mwasyũgũtĩra, nʼerĩpũlya omusasi erĩhĩka aho mwasyakũndĩra, oko hongo yage eyo nabirihonga busana nenyũ.

²⁰ Kandi mwasyũgũtĩra oko mesa yage omo syosabayĩrĩ nʼabandu bʼesyogalĩ syʼamalwa, nʼomo mbangĩ, nʼomo bandu bosĩ bʼamalwa, Omukama Iye Omwami Mukulu atya.

²¹ Nage nasyahĩra olukengerwa lwage omo bihanda. Nʼebihanda byosĩ byasyalangira eritswera lyage eryo ngatswera, nʼebyala byage ebyo nabĩrĩhĩra kubo.

²² Nʼekihanda kya Ĩsraelĩ kyasyaminya ko ndi Mwami Mukulu Nyamuhanga wabo, erĩtsũka ekiro ekyo nʼembere kwʼaho.

²³ Nʼebihanda byasyaminya ngoko ekihanda kya Ĩsraelĩ mokyaya omo bunyegwa busana nʼebibi byakyo kusangwa banyikola nʼomwaga, nage monabĩsa obũsũ bwage kubo. Ko nahabo omo byala byʼesyonzĩgũ syabo nyitya, nabo abosĩ mobawa omo mũyalĩ.

²⁴ Monakolabo ngʼesyonye syabo, kandi ngʼerĩhalya lyabo, kandi monabĩsa obũsũ bwage bo kubo.

²⁵ Neryo Omukama Iye Omwami Mukulu ati, Lino ngandĩsũbya ebibuya bya Yakobo, nʼeriganyira ekihanda kyosĩ kya Ĩsraeli. Nasyabya nʼobũha busana nʼerĩna lyage lĩbũyĩrĩre.

²⁶ Nabo basyibirirwa esĩsonĩ syabo nʼeriteba lyabo lyosĩ, eryo banyĩhalayako, omugulu bĩkere omo buholo omo kihugo kyabo, isihali oyo wasyũbahyabo.

²⁷ Omugulu nasyasũbyabo erĩlũa oko bihanda, nʼerĩhĩndanĩabo erĩlũa omo bihugo byʼesyonzĩgũ syabo, neryo nasyahigulwa mubo omo meso wʼebihanda bingi.

²⁸ Neryo basyaminya ko ndi Mwami Mukulu Nyamuhanga wabo, kusangwa naleka ibaya omo bunyegwa omo bihanda, neryo ngandĩsyahĩndanĩabo omo kihugo kyabo. Kandi sĩndĩendĩsyasĩganĩa omuguma wa kubo kandi eyo.

²⁹ Kandi sĩndĩendĩsyaswabĩsa obũsũ bwage bo kubo, kusangwa nasyũtũlĩra Omũlĩmũ wage oko kihanda kya Ĩsraelĩ Omukama Iye Omwami Mukulu atya.