Ezekĩelĩ 37 - AMASAKO ABOYTRTRE WA NYAMUHANGA AWAKAHULAWA MO BIBLIAEsyonzolĩ syʼamakũha awũmĩre 1 Ebyala byʼOmwami Mukulu mobyanyibyako, kandi mwanyĩhũlũkya omo Mũlĩmũ wʼOmwami Mukulu, mwanyĩkĩrya omo katĩkatĩ kʼomusya. Nago ĩnĩoswĩre mwʼamakũha. 2 Naye mwanyĩlabya omo katĩkatĩ kago ehosĩ, neryo lebaya, habya mangi omo musya. Neryo lebaya, abya ũmĩre kutsibu. 3 Neryo mwambwira ati, Mugala wʼomundu, amakũha aya anganatoka eribyaho kwehĩ? Nage monamũsũbĩrya nyiti, Uwe Omukama Iye Omwami Mukulu ũnasĩ. 4 Kandi mwabũga nage ati, Uminyerere busana nʼamakũha aya, ubwirego uti, Ĩnywe makũha ũmĩre, muhulikirire ekĩnywa kyʼOmwami Mukulu. 5 Omukama Iye Omwami Mukulu akabwira amakũha aya ati, Lebaya, nasyaleka omuka iningira omwisi wenyũ imwatoka eribyaho. 6 Kandi nasyabahĩra kwʼemĩsĩsa nʼerĩbasũbya kwʼemĩnyokũ, nʼeribaswika kwʼesyongoba, nʼerĩhĩra omuka omwisi wenyũ, nenyũ imwatoka erisuba. Kandi mwasyaminya ko ndi Mwami Mukulu. 7 Neryo monaminyerera ngoko nahanawa. Neryo omugulu nabya ngaminyerera mohabya olukanda, neryo lebaya, habya olukanda lwʼegasa-gasa. Nʼamakũ ha mwahĩndana haguma, erĩkũha oko lindi. 8 Neryo monasamalira, neryo lebaya, emĩsĩsa moyabya kugo, nʼemĩnyokũ moyalasa. Nʼesyongoba mosyayibamba kugo. Nĩkwa Simwabya muka. 9 Neryo mwambwira ati, Uminyerere busana nʼomuka, uminyerere, mugala wʼomundu, Ubwire omuka uti, Omukama Iye Omwami Mukulu ati, Uwe muka, wase ũkalũa oko mahunga ani, uhumulire oko bĩtawa aba, babane eribyaho. 10 Neryo ko naminyerera nyitya ngoko anyihana, nʼomuka mwahĩka mugo, nago mwabyaho, mwahangana omo bisando byago, omulondo munene kutsibu wʼabasĩrĩkanĩ. 11 Neryo mwambwira ati, Mugala wʼomundu, amakũha aya ni kihanda kyosĩ kya Ĩsraelĩ. Lebaya, bakabũga bati, Amakũha wetu abiriuma, nʼamaha wetu abiritutalako. Twabirihwa. 12 Neryo uminyerere, ubwirebo uti, Omukama Iye Omwami Mukulu ati, Lebaya, ĩnywe bandu bage, nasyalĩbũla amasinda wenyũ, nasyabahũlũkya omo masinda wenyũ. Kandi nasyabaleta omo kihugo kya Ĩsraelĩ. 13 Neryo mwasyaminya ko ndi Mwami Mukulu, omugulu namabikingula amasinda wenyũ, nʼerĩbahũlũkya omo mahero wenyũ, ĩnywe bandu bage. 14 Nasyahĩra Omũlĩmũ wage omwisi wenyũ, nenyũ mwasyasuba nʼeribyaho, nasyabahĩra omo kihugo kyenyũ. Neryo mwasyaminya kwʼindi nĩ ngye Mwami Mukulu, nabĩrĩbũgakyo nʼerikolakyo, Omwami Mukulu atya. 15 Ekĩnywa kyʼOmwami Mukulu mokyambĩkako kandi kiti, 16 Nawe, mugala wʼomundu, wĩmaye omuti muguma, Usake kugo, uti Busana na Yũda, na busana nʼabalĩkyabo abana ba Ĩsraelĩ. Neryo wĩmaye ogundi muti, Usake kugo uti, Busana na Yosefũ, omuti wa Efũraĩmũ, nʼabalĩkyabo, ekihanda kyosĩ kya Ĩsraelĩ. 17 Ũmatĩkanayeyo mo muguma busana nawe, iyabana eribya muguma omo byala byawe. 18 Nʼomugulu abana bʼabandu bawe basyabũga nawe bati, Sĩwendĩtũkangya enzumwa yawe busana nʼekĩ kwehĩ? 19 ubwirebo uti, Omukama Iye Omwami Mukulu akabũga ati, Lebaya, nasyĩmya omuti wa Yosefũ, owali omo byala bya Efũraĩmũ nʼebihanda bya Ĩsraelĩ abalĩkyabo. Kandi nasyahĩrabo haguma nago, haguma nʼomuti wa Yũda, nʼeriyirabo mo muti muguma, nabo basyabya muguma omo byala byage. 20 Nʼemiti eyo wasakako yasyabya omo byala byawe omo meso wabo. 21 Ubwirebo uti, Omukama Iye Omwami Mukulu akabũga ati, Lebaya, nasyahamba abana ba Ĩsraelĩ erĩlũa omo bihanda, eyo baya, nasyakuma-kumabo oko mbande syosĩ, nʼeriretabo omo kihugo kyabo. 22 Nage nasyayirabo mo kihanda kiguma omo kihugo, oko bitwa bya Ĩsraelĩ. Nʼomwami muguma asyabya mwami wabo abosĩ; neryo ibataswabya bihanda bibiri, kutse sibendisyaswagabwa mo mami abiri nʼahake. 23 Kandi sĩbendĩsyaswayĩtsandya omo syosanamu syabo, kutse omo bindu bibi byabo, kutse omo kiguma kyʼamalolo wabo; nĩkwa nasyalamyabo omo myanya yabo eyo bakola ebibi, nasyeryabo. Ko basyabya bandu bage batya, nage nasyabya Nyamuhanga wabo. 24 Nʼomugombe wage Dawĩdĩ asyabya mwami kubo nabo basyabya nʼomũlĩsya muguma. Basyalendera omo bilayiro byage, nʼeribika ebihano byage, nʼerikolabyo. 25 Nabo basyĩkala omo kihugo ekyo naha omugombe wage Yakobo, eyo abotata wenyũ bĩkala. Umwʼekyo basyĩkala, ibo nʼabana babo, nʼabitsikulu babo, kera na kera. Na Dawĩdĩ omugombe wage asyabya munya-mwami wabo kera na kera. 26 Kandi nasyahĩra endagano eyʼobuholo haguma nabo. Nayo yasyabya endagano ya kera na kera haguma nabo; nage nasyahĩrabo, nʼerĩkanyĩrĩryabo, nʼerĩhĩra ahabũyĩrĩre hage omo katĩkatĩ kabo erĩhĩka kera na kera. 27 Ahʼerĩĩkala hage hasyabya haguma nabo. Nage nasyabya Nyamuhanga wabo, nabo basyabya bandu bage. 28 Nʼebihanda byasyaminya ko ndi Mwami Mukulu oyukahigula Ĩsraelĩ, omugulu ahabũyĩrĩre hage hasyabya omo katĩkatĩ kabo kera na kera. |
Bible in Kinandi © Bible Society of the Democratic Republic of Congo, and Bible Society of Uganda, 1980.
Bible Society of the Democratic Republic of Congo