Ezekĩelĩ 36 - AMASAKO ABOYTRTRE WA NYAMUHANGA AWAKAHULAWA MO BIBLIA

Obutseme oko bitwa bya Ĩsraelĩ

¹ Nawe omugala wʼomundu, uminyerere oko bitwa bya Ĩsraelĩ, ũbũge, uti, Ĩnywe bitwa bya Ĩsraelĩ, muhulikirire ekĩnywa kyʼOmwami Mukulu.

² Omukama Iye Omwami Mukulu ati, Kusangwa enzĩgũ ĩkabũga amalwa busana nenyũ iti, Ha! nʼakandi iti, Ahendata ha kera habiribya hetu mo nzĩgalya,

³ neryo uminyerere ũbũge uti, Omukama Iye Omwami Mukulu ati, Busana nʼomwatsi owene babirikuyira mo kĩma nʼerĩkũhĩmata oko mbande syosĩ, imwatoka eribya nzĩgalĩbwa oko basĩgalira bʼebihanda, imukatongawa nʼemĩnywa yʼabatsotsya, nʼengulu nyibi yʼabandu.

⁴ Busana nʼekyo, ĩnywe bitwa bya Ĩsraelĩ, muhulikirire ekĩnywa kyʼomukama Iye Omwami Mukulu. Omukama Iye Omwami Mukulu, akabwira ebitwa nʼehitwa, nʼemigende, nʼemisya, nʼebĩma byʼemilala, nʼemĩyĩ eyasĩganĩbawa, eyabiribya minyegwa nʼerĩsekererĩbwa nʼoko bindi bihanda ebĩtĩmbĩre kugo.

⁵ Neryo, Omukama Iye Omwami Mukulu ati, Kwenene omo muliro wʼobũha bwage nabĩrĩbũga oko bindi bihanda, nʼoko Edomũ yosĩ, abayihambira ekitaka kyage eribya nzĩgalĩbwa haguma nʼobutseme bwʼemitima yabo yosĩ, haguma nʼepono yʼekĩrĩmũ, erĩĩmya obũlĩsĩryo mo bunyegwa.

⁶ Neryo uminyerere busana nʼekihugo kya Ĩsraelĩ, Ubwire ebitwa nʼehitwa, nʼemigende nʼemisya, uti, Omukama Iye Omwami Mukulu ati, Lebaya, nabĩrĩbũga omo bũha bwage nʼerihitana lyage kusangwa mwabĩrĩyĩyĩnĩa omo bĩtsũmĩ byʼebihanda.

⁷ Busana nʼekyo, Omukama Iye Omwami Mukulu ati, Nabĩrĩlahĩrya nyiti, Kwenene ebihanda ebĩbatĩmbĩreko, byasyaheka ebĩtsũmĩ byabyo.

⁸ Nĩkwa ĩnywe bitwa bya Ĩsraelĩ, mwasyalasya emitahi yenyũ nʼeributira abandu bage Ĩsraelĩ ebĩgũma byenyũ, kusangwa bali hakũhĩ nʼeriasa.

⁹ Kusangwa, lebaya, indi busana nenyũ, nasyabakebera, nenyũ mwasyalimirwa nʼeribibwa.

¹⁰ Nage nasyabatomekera kwʼabandu, ekihanda kyosĩ kya Ĩsraelĩ, ega ekyosĩ. Nʼemĩyĩ yasyĩkalwamo, nʼemilala yasyaswahĩmbwamo.

¹¹ Nasyabatomekera kwʼabandu nʼesyonyama, nasyo syasyakanya nʼeributa. Nasyaleka imwabya kwʼabandu ngʼomugulu wenyũ wa kera, kandi nasyabakola ndeke kwilaba erĩmbere. Nenyũ mwasyaminya ko ndi Mwami Mukulu.

¹² Ega, kandi nasyaleka abandu ibalendera endata kuwe—ba bandu bage Ĩsraelĩ—basyakũsĩgalya, nawe wasyabya mwandu wabo, kandi sĩwendĩsyaswĩta kubo kwʼabana.

¹³ Omukama Iye Mwami Mukulu ati, Kusangwa bakakubwira bati, Uwe kitaka uli mũlĩ wʼabandu, kandi Wabirireka ekihanda kyawe ĩkyakwĩrwa kwʼabana,

¹⁴ neryo siwendisyaswalya abandu, kutse erireka ekihanda kyawe ĩkyakwĩrwa kwʼabana, Omukama Iye Omwami Mukulu atya.

¹⁵ Kutse sindiendisyaswaleka iwahulikirira ebĩtsũmĩ byʼebihanda, kutse siwendisyaswaheka esĩsonĩ syʼabandu, kutse siwendisyaswatwĩkalya ekihanda kyawe, Omukama Iye Omwami Mukulu atya.

¹⁶ Neryo ekĩnywa kyʼOmwami Mukulu mokyambĩkako kiti,

¹⁷ Omugala wʼomundu, omugulu ekihanda kya Ĩsraelĩ kyĩkala omo kihugo kyabo, mobatsandyakyo omo mibere yabo nʼemĩbĩrĩ yabo. Enzira yabo embere syage yabya ngʼomũkalĩ kwʼakabya okwʼihigulwa liwe.

¹⁸ Kyaleka, ĩnũtũlĩra kubo erihitana lyage busana nʼomusasi ogo bũta oko kihugo, kandi busana nʼerĩtsandyakyo nʼesyosanamu syabo.

¹⁹ Nibya monapanzapanzirabo omo katĩkatĩ kʼebihanda, mobatsatsangwa omo bihugo. Monatswerabo ngʼesyonzira syabo, kandi ngʼemĩbĩrĩ yabo monatswerabo.

²⁰ Nʼomugulu bahĩka oko bihanda eyo baya, mobatsuma erĩna lyage lĩbũyĩrĩre, kusangwa abandu mobabũga busana nabo bati, Aba ni bandu bʼOmwami Mukulu, babĩrĩlũa omo kihugo kiwe.

²¹ Nĩkwa ĩngye monakenga erĩna lyage lĩbũyĩrĩre, eryo ekihanda kya Ĩsraelĩ kyatsuma omo bihanda mwʼeyo baya.

²² Neryo Ubwire ekihanda kya Ĩsraelĩ uti, Omukama Iye Omwami Mukulu akabũga ati, Uwe kihanda kya Ĩsraelĩ, sindikola ekĩ busana nenyũ, nĩkwa busana nʼerĩna lyage lĩbũyĩrĩre, eryo mwabiritsuma omo katĩkatĩ kʼebihanda eyo mwaya.

²³ Kandi nasyimira ekĩbũyĩrĩre kyʼerĩna lyage ĩnene, eryabiritsumwa omo katĩkatĩ kʼebihanda, eryo mwabiritsuma omo katĩkatĩ kabo. Neryo ebihanda byasyaminya ko ndi Mwami Mukulu, Omukama Iye Omwami Mukulu atya, omugulu nasyakangya ko ndi mũbũyĩrĩre omo katĩkatĩ kenyũ embere syʼameso wabo.

²⁴ Kusangwa nasyabalũsya omo bihanda, nʼeribakuma-kuma erĩbalũsya omo bihugo byosĩ, nʼeribaleta omo kihugo kyenyũ.

²⁵ Neryo nasyabatsatsanga kwʼamagetsi owene, nenyũ mwasyera. Nasyaberya oko mĩtĩndũ yenyũ yosĩ, nʼoko syosanamu syenyũ syosĩ.

²⁶ Kandi nasyabaha omutima muhya-muhya nibya, kandi nasyahĩra ekĩrĩmũ kihya-kihya omwisi wenyũ. Nasyalũsya omutima owʼerĩbwe owali omo mubiri wenyũ, nasyabaha omutima wʼomubiri.

²⁷ Kandi nasyahĩra Omũlĩmũ wage omwisi wenyũ, nʼerireka imwalendera omo migambo yage, nenyũ mwasyateya erikola ebilayiro byage.

²⁸ Nenyũ mwasyĩkala omo kihugo ekyo naha abotata wenyũ; nenyũ mwasyabya bandu bage, nage nasyabya Nyamuhanga wenyũ.

²⁹ Kandi, nasyabalamya oko bĩtĩsĩrĩre byenyũ byosĩ. Kandi nasyabirikira engano nʼerĩkanyĩrĩryayo, kandi sindiendisyabaletera enzala.

³⁰ Kandi nasyakanyĩrĩrya ebĩgũma byʼemiti, nʼerĩkanyĩrĩrya esyombuto syʼeririma, imutaswabana esĩsonĩ syʼenzala omo katĩkatĩ kʼebihanda.

³¹ Oko mugulu oyo mwasyibuka esyonzira nyibi syenyũ, nʼemĩbĩrĩ yenyũ eyitabya yowene. Neryo mwasyayĩkwa nye omo meso wenyũ busana nʼobubi bwenyũ nʼesyonye syenyũ.

³² Omukama Iye Omwami Mukulu ati, Sindikola ekĩ busana nenyũ, muminye ekyo. Mũkwe esĩsonĩ, muhemulawe busana nʼemibere yenyũ, uwe kihanda kya Ĩsraelĩ.

³³ Omukama Iye Omwami Mukulu ati, Oko kiro ekyo nasyaberya kwʼebibi byenyũ byosĩ, nasyaleka emĩyĩ yenyũ ĩyĩkalwamo, nʼahʼebĩma hasyaswahĩmbwa.

³⁴ Nʼekitaka ekyabya mulala kyasyalimwa, ekyabya mulala omo meso wʼabosĩ abalabaho.

³⁵ Basyabũga bati, Ekitaka ekĩ ekyabya mulala kyamabya ngʼeririma lyʼeEdenĩ. Nʼemĩyĩ eyabya bĩma nʼebĩhũma, eyaherĩbawa yabirikangatirwa nʼerĩĩkalwamo.

³⁶ Oko mugulu oyo ebihanda ebyasĩgala oko mbande syosĩ syenyũ byasyaminya kwʼindi nĩ ngye Mwami Mukulu nabĩrĩhĩmba ahaherĩbawa, inabirihera embuto omo bĩma. Ĩngye Mwami Mukulu, nabĩrĩbũgakyo, kandi nasyakolakyo.

³⁷ Omukama Iye Omwami Mukulu ati, Nasyaleka ekihanda kya Ĩsraelĩ ĩkyanyĩbũlya busana nʼekĩ erikolera kyobo. Nasyakanyĩrĩrya abandu babo kwʼabandu ngʼekihangulo.

³⁸ Ngʼekihangulo busana nʼerihonga, ngʼekihangulo eYerũsalema omo biro bikulu biwe ebyahĩrawa, litya emĩyĩ eyaherĩbawa yasyũsũlĩbwa nʼesyondeko syʼabandu. Neryo basyaminya ko ndi Mwami Mukulu.