Ezekĩelĩ 35 - AMASAKO ABOYTRTRE WA NYAMUHANGA AWAKAHULAWA MO BIBLIA

Eritswerwa lya Edomũ

¹ Kandi, ekĩnywa kyʼOmwami Mukulu mokyambĩkako kiti,

² Omugala wʼomundu, ũlolaye obũsũ bwawe erilwa nʼekitwa kyʼeSeĩrĩ, uminyerere amalwa busana nakyo,

³ ubwirekyo uti, Omukama Iye Omwami Mukulu ati, Lebaya, ngalwa nawe, uwe kitwa kyʼeSeĩrĩ, nasyasumba ebyala byage nʼerilwa nawe, nasyakuyira mo kĩma nʼomulala.

⁴ Nasyayira emĩyĩ yawe mo mulala, nawe wasyabya kĩma. Neryo wasyaminya ko ndi Mwami Mukulu.

⁵ Kusangwa wabiribya nʼobũyĩgũ obũtyũmbaya, iwabiriha abana ba Ĩsraelĩ erĩkwa omo maka wʼomũyalĩ oko mugulu wʼerĩkwa lyabo, oko mugulu wʼerisuyira lyʼendũlĩ.

⁶ Neryo Omukama Iye Omwami Mukulu ati, Ngoko nyiriho, nasyakũtegekanĩa busana nʼomusasi, nʼomusasi asyakukwama. Kusangwa sulitagalirwa oko musasi, neryo omusasi asyakukwama.

⁷ Litya nasyayira ekitwa kyʼeSeĩrĩ mo mulala nʼekĩma. Nasyatũaho oyukalaba nʼoyukasubula.

⁸ Kandi nasyũsũlya ebitwa byako omo bĩtawa bako. Nʼomo hitwa hyawe nʼomo misya yawe, nʼomo migende yawe basyawa abakĩtawa omo mũyalĩ.

⁹ Nasyakuyira mo kĩma luguma-guma, nʼemĩyĩ yawe siyendĩsyĩkalwamo. Neryo nenyũ mwasyaminya ko ndi Mwami Mukulu.

¹⁰ Kusangwa wabĩrĩbũga uti, Ebihanda bibiri ebĩ, nʼebihugo bibiri ebĩ byasyabya byage, netu twasyasĩgalyabyo, nomo Mwami Mukulu abyaho.

¹¹ Busana nʼekyo, Omukama Iye Omwami Mukulu ati, Ngoko nyiriho, nasyakola nawe ngʼerihitana lyawe, kandi ngʼeritsuro lyawe eryo wakangaya omo kĩnĩga kyawe busana nabo. Litya nasyayĩmĩnyĩsya omo katĩkatĩ kabo omugulu nasyakutswera.

¹² Neryo wasyaminya kwʼindi nĩ ngye Mwami Mukulu, nabĩrĩowa ebĩtsũmĩ byawe ebyo wabĩrĩbũga busana nʼebitwa bya Ĩsraelĩ uti, Byabiriyirwa mo kĩma, twabirihabwabyo mo kalyo.

¹³ Mwabĩrĩyĩhamya ũkwʼĩngye nʼobuno bwenyũ, kandi mwabĩrĩkanyĩrĩrya ebĩnywa byenyũ omo malwa busana nage. Nabĩrĩowabyo.

¹⁴ Omukama Iye Omwami Mukulu ati, Omugulu ekihugo kyosĩ kikatsema nasyakuyira mo kĩma.

¹⁵ Ngoko watsemera omwandu wʼekihanda kya Ĩsraelĩ, kusangwa kyabya kĩma, ko nasyakukola nyitya. Nawe wasyabya kĩma, uwe kitwa kyʼeSeĩrĩ, nʼeEdomũ hosĩ, eyosĩ yakyo. Neryo basyaminya ko ndi Mwami Mukulu.