Ezekĩelĩ 34 - AMASAKO ABOYTRTRE WA NYAMUHANGA AWAKAHULAWA MO BIBLIA

Abalĩsya ba Ĩsraelĩ abatahatikana

¹ Nʼekĩnywa kyʼOmwami Mukulu mokyambĩkako kiti,

² Omugala wʼomundu, uminyerere amalwa busana nʼabalĩsya ba Ĩsraelĩ. Uminyerere, Ubwire abalĩsya abo uti, Omukama Iye Omwami Mukulu ati, Obũlĩge, oko balĩsya ba Ĩsraelĩ abakayĩrĩsaya! Abalĩsya sĩbangalĩsya ekihangulo kwehĩ?

³ Ĩnywe mukalya ebĩsabũ, imwambala obweya, ĩmwasĩnza esĩnenehĩre, nĩkwa ĩsĩmwelĩsaya ekihangulo.

⁴ Esilwere simwetasĩkyasyo, sĩmwetalamya esilwere, simwetasenga esĩbũnĩkĩre, simwetasũbũlya esyapanzawa, kutse simwetasondasondya eyabya yitere. Nĩkwa omo maka nʼomo butsibu mwabiritabala kusyo.

⁵ Nasyo mosyapanzikana kusangwa sihabya omũlĩsya, mosyabya kalyo busana nʼobuli nyama yʼomo mũsĩtũ, mosyapanzikana.

⁶ Ekihangulo kyage mokyaganga-ganga oko bitwa byosĩ, nʼoko buli kitwa kiri, nʼekihangulo kyage mokyapanzikana oko kihugo kyosĩ. Isihali mundu nʼomuguma oyo wasondekanaya kutse erĩsondyasyo.

⁷ Neryo ĩnywe balĩsya, muhulikirire ekĩnywa kyʼOmwami Mukulu.

⁸ Omukama Iye Omwami Mukulu ati, Ngoko nyiriho, kwenene ngoko ekihangulo kyage kyabiribya bunyegwa, nʼekihangulo kyage kyabiribya kalyo busana nʼesyonyama syosĩ syʼomolĩ, eribula omũlĩsya, nʼabalĩsya bage mobatasonda-sondya ekihangulo kyage, nĩkwa abalĩsya mobayĩrĩsya, mobatalĩsya ekihangulo kyage,

⁹ busana nʼekyo, ĩnywe balĩsya, muhulikirire ekĩnywa kyʼOmwami Mukulu:

¹⁰ Omukama Iye Omwami Mukulu ati, Lebaya, ngalwa nʼabalĩsya nasyabũlya esyombũlĩ syage ewabo, nasyatsĩrĩsyabo okwʼĩrĩsya esyombũlĩ. Litya abalĩsya sibendisyaswayĩrĩsya kandi, nĩkwa nasyalamya ekihangulo kyage oko buno bwabo. Isitabya kalyo, busana nabo.

Omwami Mukulu akalembera esyombũlĩ siwe

¹¹ Kusangwa Omukama Iye Omwami Mukulu ati, Lebaya, ĩngye ĩngyowene-wene, nasyasonda-sondya esyombũlĩ syage, nʼerĩsondekanĩasyo.

¹² Ngoko mũlĩsya akalembera ekihangulo kiwe omo musibo omugulu ali omo katĩkatĩ kʼesyombũlĩ siwe esipanzikene, litya nasyalembera esyombũlĩ syage nyitya. Nasyalamyasyo ehosĩ eyo syapanzikanira omo kiro kyʼebĩtũ nʼomwĩrĩmya.

¹³ Nasyalũsyasyo omo bihanda nʼerikuma-kumasyo omo bihugo byosĩ, nʼeriretasyo omo kihugo kyasyo. Kandi nasyalĩsĩryasyo oko bitwa bya Ĩsraelĩ, hakũhĩ nʼesyonyũsĩ, nʼehosĩ ahalĩ abandu omo kihugo.

¹⁴ Nasyalĩsĩryasyo omo lũlĩsĩryo lowene. Nʼaho sikalira hasyabya oko bitwa bya Ĩsraelĩ. Eyo syasyabundama omo lũlĩsĩryo lowene, nasyo syasyalira omo lũlĩsĩryo olũboyĩre oko bitwa bya Ĩsraelĩ.

¹⁵ Omukama Iye Omwami Mukulu ati, Nage nasyalĩsya ekihangulo kyage, kandi nasyabũndamyasyo siluhuke.

¹⁶ Nasyasondasondya esitere, nʼerĩsũbũlya esyapanzapanzawa, nʼerisenga esyabũnĩka, nʼerĩsĩkya esyabya silwere. Nĩkwa esĩnenehĩre nʼesyʼamaka nasyaheryasyo. Nasyalĩsyasyo omwʼitswera.

¹⁷ Nĩkwa ĩnywe kĩhyo kyage, Omukama, Omwami Mukulu ati, Lebaya, nasyatswera omo katĩkatĩ kʼembũlĩ nʼembũlĩ, nʼesyombangale nʼesyombaya.

¹⁸ Ko ni mwatsi muke busana nenyũ erirya omo lũlĩsĩryo lowene, nĩkwa muti linatolere eriryatangirira omo bigere byenyũ awandi malĩsĩryo wenyũ kwehĩ? Kutse muti ĩnũkapũlaya amagetsi awatekĩre amabuya, nĩkwa litolere ĩmwatabũla omo bigere byenyũ awandi magetsi mabuya kwehĩ?

¹⁹ Nĩkwa busana nʼekihangulo kyage, litolere isialya ebyo mwabiriryatangirira nʼebisando byenyũ, kandi litolere ĩsĩapũlya ago mwabĩrĩtabũla nʼebisando byenyũ.

²⁰ Neryo, Omukama Iye Omwami Mukulu akabũga nabo ati, Lebaya, ĩngye nĩna ngye, nasyatswera omo katĩkatĩ kʼesyombũlĩ sĩnenehĩre nʼesyombũlĩ sĩbondĩre.

²¹ Kusangwa ũkakũna-kũna nʼolukanga nʼekitigo, nʼerĩkũna-kũna esiri nyolo omo mahembe wawe, erĩhĩka aho wabiripanza-panzirasyo eyĩhya.

²² Busana nʼekyo nasyalamya ekihangulo kyage, nasyo sisyendisyaswabya bunyegwa. Nage nasyatswera omo katĩkatĩ kʼembũlĩ nʼembũlĩ.

²³ Nasyahĩra omũlĩsya muguma kusyo, naye asyalĩsyasyo, iye omukobe wage Dawĩdĩ. Asyalĩsyasyo, iniabya mũlĩsya wasyo.

²⁴ Ĩngye Mwami Mukulu nasyabya Nyamuhanga wasyo, nʼomukobe wage Dawĩdĩ asyabya munya-mwami omo katĩkatĩ kasyo. Ĩngye Mwami Mukulu, nabĩrĩbũgakyo.

²⁵ Nasyalagana nabo endagano yʼobuholo, nasyalũsya esyonyama nyibi syʼomo kihugo, nabo ibatoka erĩĩkala buholo omo mbwarara, nʼerigotsera omo mũsĩtũ.

²⁶ Nasyayiraho nʼahatĩmbĩre ekitwa kyage mo hʼomũyĩsa. Kandi nasyaleka embũla eriwa oko kirimo kyayo. Yasyabya embũla yʼomũyĩsa.

²⁷ Nʼemiti yʼomolĩ yasyabuta ebĩgũma byayo, nʼekitaka kyasyahũlũkya esyombuto syakyo, nabo basyĩkala buholo omo kihugo kyabo. Neryo basyaminya ko ndi Mwami Mukulu omugulu namabĩbũnanga emiti yʼesyongomo syabo, nʼerĩlamyabo omo byala byʼabayirabo mo bakobe.

²⁸ Nabo sibendisyaswabya banyegwa oko bihanda, kutse esyonyama syʼomolĩ sisyendisyalyabo. Nĩkwa basyĩkala buholo, isihali omundu wasyũbahyabo.

²⁹ Kandi nasyatulirabo eririma erĩkũmayĩre, isibendisyaswakwa nzala omo kihugo, kutse eriswahemulwa nʼebihanda.

³⁰ Neryo basyaminya kwʼindi nĩ ngye Mwami Mukulu Nyamuhanga wabo, indi haguma nabo, nabo, ekihanda kya Ĩsraelĩ ni bandu bage, Omukama Iye Omwami Mukulu atya.

³¹ Nenyũ, esyombũlĩ syage, esyombũlĩ syʼolũlĩsĩryo lwage, muli bandu, nage indi Nyamuhanga wenyũ, Omukama Iye Omwami Mukulu atya.