Ezekĩelĩ 33 - AMASAKO ABOYTRTRE WA NYAMUHANGA AWAKAHULAWA MO BIBLIA

Omũbĩrĩ wʼomũlĩngĩ nĩ ʼbũga ati, Koko

¹ Ekĩnywa kyʼOmwami Mukulu mokyambĩkako kiti,

² Omugala wʼomundu, ũbũge nʼabana bʼabandu bawe, ubwirebo uti, Namaleta omũyalĩ oko kihugo, nʼabandu bʼekihugo bakĩmaya omundu muguma omo katĩkatĩ kabo, bakamũhĩra mo mũlĩngĩ wabo,

³ naye akalangira omũyalĩ akahĩka oko kihugo, amabuha engubi, nʼerikunga abandu omo ehe-e,

⁴ neryo oyũkowa omulenge wʼengubi, ĩsĩalĩrĩga ehe-e, omũyalĩ amahĩka nʼerimuheka, omusasi wuwe asyabya oko mutwe wuwe ĩyowene.

⁵ Iye mowa omulenge wʼengubi, nĩkwa mwatalĩga erĩowa ehe-e. Omusasi wuwe asyabya ukwʼiye. Nĩkwa kumbe alĩalĩga ehe-e kumbe abĩrĩlamya engebe yiwe.

⁶ Nĩkwa omũteya amalangira omũyalĩ akasa, isialitabuha engubi, nʼabandu isibetabwirwa ehe-e, nʼomũyalĩ akahĩka nʼeriheka omundu muguma wa kubo, akatwalwa omo bibi biwe, Nĩkwa omusasi wuwe nasyabũlyago omo byala byʼomũteya oyo.

⁷ Neryo uwe, omugala wʼomundu, nabĩrĩkũhĩra mo mũlĩngĩ busana nʼekihanda kya Ĩsraelĩ. Neryo wasyowa omwatsi omo buno bwage, ubwirebo ehe-e busana nage.

⁸ Omugulu ngabwira ababi nyiti, Uwe mundu mubi, kwenene wasyahola, nawe sũlĩbũga ehe-e, erikunga omundu mubi alũe omo nzira yiwe. Omundu mubi oyo asyahola omo bibi biwe, nĩkwa omusasi wuwe nasyasondago omo byala byawe.

⁹ Nĩkwa uwe wamakunga omundu mubi oyo uti, ehe-e busana nʼenzira yiwe, alekeyo, naye akatindaleka enzira yiwe, asyahola omo bibi biwe, nĩkwa uwe ĩwabĩrĩlamya engebe yawe.

¹⁰ Nĩkwa uwe mugala wʼomundu, Ubwire ekihanda kya Ĩsraelĩ uti, Mũkabũga muti, Amalolo wetu nʼebibi byetu biri ũkwʼĩtwe, neryo tukoloberera mubyo. Twasyabyaho tuti kwehĩ?

¹¹ Ubwirebo uti, Omukama Iye Omwami Mukulu ati, Ngoko nyiriho! Sinditsemera oluholo lwʼababi, nĩkwa nyiti, kumbe ababi bakaleka enzira yabo babyeho. Mũbũnũkale, mũbũnũkale muleke esyonzira syenyũ nyibi! Busana nakĩ uwe kihanda kya Ĩsraelĩ, ukasonda erihola kwehĩ?

¹² Nawe mugala wʼomundu, Ubwire abalĩkyenyũ uti, Eritunganene ryʼomundu utunganene sĩryendĩsyamũlamya oko kiro kyʼamalolo wuwe. Neryo busana nʼebibi byʼomundu mubi, sĩendĩsyatwĩkala busana nabyo oko kiro akabinduka akaleka ebibi biwe. Nĩkwa omundu utunganene siendisyatoka eribyaho busana nʼeritunganene riwe omo kiro akakola ekibi.

¹³ Omugulu ngabwira omutunganene asyabyaho kũndũ, amayiketera eritunganene riwe neryo akakola ebibi, sihali oko mĩbĩrĩ yiwe eyitunganene, owakandisyibukwa. Nĩkwa omo bibi biwe ebyo akola asyaholera mubyo.

¹⁴ Kandi omugulu ngabũga nʼomundu mubi nyiti, Kwenene wasyahola, neryo amaleka ebibi biwe, nʼerikola ebyʼerĩbanza nʼebitunganene,

¹⁵ omundu mubi amasũbũlya omuwato, nʼerĩsũbũlya ebyo ahũnga, akalendera omo migambo eyĩkasĩkaya engebe, isialikola ebibi, asyabyaho kwenene. Isiendisyahola.

¹⁶ Sihali oko bibi biwe ebyo abirikola ebikandisyibukwa ukwʼiye. Abirikola erĩbanza lyʼekwenene, nʼebitunganene. Asyabyaho kwenene.

¹⁷ Nĩkwa abalĩkyenyũ bakabũga bati, Enzira yʼomukama siyitunganene, nĩkwa ni nzira yabo yitatunganene.

¹⁸ Omugulu omutunganene akabinduka akaleka eritunganene liwe akakola ebibi, neryo asyahola mubyo.

¹⁹ Nĩkwa omugulu omundu mubi akabinduka erireka ebibi biwe, akakola erĩbanza lyʼekwenene, nʼebitunganene, asyabyaho busana nabyo.

²⁰ Nĩkwa mũkabũga muti, Enzira yʼomukama siyitunganene. Uwe kihanda kya Ĩsraelĩ, nasyabatswera obuli mundu ngʼesyonzira siwe.

²¹ Neryo oko mwaka wʼerĩkũmĩ nʼeyĩbĩrĩ wʼerinyegwa lyetu, oko mukera wʼerĩkũmĩ, ekiro kyʼebitanu kyʼomukera, abanyegawa bʼeYerũsalema mobambĩkako bati, Omũyĩ abĩrĩkwa.

²² Neryo ebyala byʼOmwami Mukulu ibyabiribya ũkwʼĩngye omwʼĩgolo-golo, abanyegawa bate bahĩka. Kandi mwatanda obuno bwage, oko mugulu bambĩkako omo ngyakya-ngyakya. Litya obuno bwage ĩbũnatandĩre, mondaswabya butsira erĩbũga.

²³ Neryo ekĩnywa kyʼOmwami Mukulu mokyambĩkako kiti,

²⁴ Omugala wʼomundu, abĩkere omo bĩma ebĩ, omo kihugo kya Ĩsraelĩ bakabũga bati, Abrahamũ abya muguma, nĩkwa mwasĩgalya ekihugo. Litya nĩkwa ũkwʼĩtwe ko tuli bangi, tukahabawa ekihugo eribya mwandu.

²⁵ Neryo, ubwirebo, uti, Omukama Iye Omwami Mukulu ati, Mukalya esĩswĩ haguma nʼomusasi, musumbe ameso wenyũ oko syosanamu syenyũ omugulu mũkũta omusasi. Neryo muti mwasyasĩgalya ekihugo kwehĩ?

²⁶ Mukayiketera omũyalĩ wenyũ, mukakola esyonye, nenyũ mũkatsandaya obuli mundu omũkalĩ wʼomũlĩkyabo. Neryo mwangasĩgalya ekihugo kwehĩ?

²⁷ Wasyabwirabo uti, Omukama Iye Omwami Mukulu ati, Ngoko nyiriho, kwenene abali omo bĩma basyawa omo mũyalĩ. Nʼoyuli omolĩ nasyamuna oko syonyama simulye, nʼabali ahakongotere nʼomo myangalũ basyahola omo ndwala yʼakasũsũ.

²⁸ Nage, nasyayira ekihugo mo kĩma nʼomulala, nʼeriyihalamba lyʼobũtokĩ buwe lyasyũmbya. Nʼebitwa bya Ĩsraelĩ byasyabya mulala, isihali oyukalabaho.

²⁹ Oko mugulu oyo, basyaminya ko ndi Mwami Mukulu, omugulu namabiyira ekihugo mo mulala nʼekima, busana nʼesyonye syabo syosĩ esyo babirikola.

Abakowa omũmĩnyererĩ nĩkwa isibekola ebiwe

³⁰ Nawe mugala wʼomundu, abalĩkyenyũ basyagambulira ebyawe hakũhĩ nʼesyombĩmbo nʼoko syongyo syʼamanyũmba, ibabwirana, obuli mundu uku mũlĩkyabo bati, Wase, uhulikirire omwatsi akalũa oko Mwami Mukulu.

³¹ Nabo ĩbakũhĩkako ngoko abandu bakanasa, ĩbĩkala embere syawe ngʼabandu bage, nĩkwa bakakola esyongumbu omo buno bwabo, nʼomutima wabo akwamĩre endũndĩ yabo.

³² Neryo lebaya, nawe uli kubo ngʼolwimbo lwʼengumbu nyibi, lwʼoyuwite omulenge owene, oyo wasĩ eriwata enanga, kusangwa bakowa ebĩnywa byawe, nĩkwa sibekolabyo.

³³ Neryo omugulu ebĩ bĩkahĩka (lebaya bikasa), neryo basyaminya ko mũmĩnyererĩ abiribya omo katĩkatĩ kabo.