Ezekĩelĩ 32 - AMASAKO ABOYTRTRE WA NYAMUHANGA AWAKAHULAWA MO BIBLIA

Ekiriro busana na Farao

¹ Neryo mokyahĩka omo mwaka wʼerĩkũmĩ nʼeyĩbĩrĩ, oko mukera wʼerĩkũmĩ nʼeyĩbĩrĩ, oko kiro kyʼerĩtsũka omukera, ekĩnywa kyʼOmwami Mukulu mokyambĩkako, kiti,

² Mugala wʼomundu, uyire ekiriro busana na Farao omwami wʼeMĩsĩrĩ, umubwire uti, Wayĩsosekanaya nʼekyana kyʼendale kyʼebihanda, nĩkwa uli ngʼenzoka nene yʼomo syongetsi. Kandi mowahũtũka nʼamaka omo syonyũsĩ syawe, mowatabũla amagetsi omo bisando byawe, nʼerĩtsandya esyonyũsĩ syabo.

³ Omukama Iye Omwami Mukulu ati, Nasyasesa obutaha-taha bwage ukʼuwe omo ndeko yʼebihanda bingi, nabo basyakusumba omo butaha-taha bwage.

⁴ Nasyakũsĩga oko kitaka, nasyakugusa omolĩ. Nasyaleka esyonyonyũ syʼekyanya ĩsyakwĩkĩrako, kandi nasyũgũtya esyonyama syʼekihugo kyosĩ umʼuwe.

⁵ Nasyahĩra omũnyokũ wawe oko bitwa, nʼerĩũsũlya emisya yʼomo bĩnda byawe.

⁶ Nasyaleka ekitaka ĩkyapũlya omusasi wawe nibya erĩhĩka oko bitwa, nʼesyonyũsĩ syasyũsũla mʼomusasi wawe.

⁷ Kandi omugulu nasyakũlĩmya, nasyakũlĩmya, nasyaswika ekyanya, nʼerĩhũmberya esyongũnũnũ syabo. Nasyaswika eryuba omo kĩtũ, nʼomukera sĩendĩsyaswakolerya.

⁸ Nʼesyotala syosĩ syʼekyanya esĩkakoleraya nasyahũmberyasyo endata kuwe, nʼerĩhĩra omwĩrĩmya oko kihugo kyawe, Omukama Iye Omwami Mukulu atya.

⁹ Nasyagalĩranĩa emitima yʼebihanda bingi, omugulu nasyaleta yʼebihanda bingi, omugulu nasyaleta erihera lyawe omo katĩkatĩ kʼebihanda, omo bihugo ebyo utabya wasĩ.

¹⁰ Kandi, nasyaswekya ebihanda busana nawe, nʼabami babo basyubaha kutsibu busana nawe omugulu nasyahũnga-hũngya omũyalĩ wage embere syabo. Nabo basyatitimana obuli katambĩ, obuli mundu busana nʼengebe yiwe, oko kiro kyʼeriwa lyawe.

¹¹ Kusangwa Omukama Iye Omwami Mukulu ati, Omũyalĩ wʼOmwami wʼeBabelĩ asyakũhĩkako.

¹² Omo mĩyalĩ yʼesyombangĩ; nasyaleka endeko yawe iyawa; abosĩ ni batsibu bʼebihanda; basyaherya eriyiheka lyʼeMĩsĩrĩ, nʼendeko yosĩ yako yasyaherĩbwa.

¹³ Nasyaherya esyonyama syosĩ syako esiri hakũhĩ nʼamagetsi mangi. Nʼekisando kyʼomundu sikyendisyaswatabũlago, nʼebigere byʼesyonyama sĩbyendĩsyatabũlago.

¹⁴ Omukama Iye Omwami Mukulu ati, Neryo nasyasongolya amagetsi wabo, kandi nasyasandũlya esyonyũsĩ syabo ngʼamagũta.

¹⁵ Omugulu nasyayira ekihugo kyʼeMĩsĩrĩ eribya kĩma, nʼekihugo isikiwite ebyũsũlayakyo, omugulu ngaswĩraya abosĩ abĩkere mukyo, neryo basyaminya ko ndi Mwami Mukulu.

¹⁶ Ekĩ ni kiriro, nabo basyalira batya. Abali bʼebihanda basyalira batya. Busana nʼeMĩsĩrĩ nʼendeko yiwe yosĩ basyalira batya, Omukama Iye Omwami Mukulu atya.

¹⁷ Neryo oko mwaka wʼerĩkũmĩ nʼeyĩbĩrĩ oko kiro kyʼerĩkũmĩ nʼebitanu kyʼomukera, ekĩnywa kyʼOmwami Mukulu mokyambĩkako, kiti,

¹⁸ Omugala wʼomundu, ulire busana nʼendeko yʼeMĩsĩrĩ, uleteyo ahisi, ibo nʼabali bʼebihanda byʼamaka omo kihugo kyʼeyĩkwa haguma nʼabakandagalira omo buhya.

¹⁹ Ũlengĩrendi omo bubuya kwehĩ? Ũkĩme uyire engyingo yawe haguma nʼabatabwene.

²⁰ Bakandisyawa omo katĩkatĩ kʼabakĩtawa omo mũyalĩ. Akahabawa oko mũyalĩ; babirimukura nʼesyondeko siwe syosĩ.

²¹ Abʼamaka omo katĩkatĩ kʼesyombangĩ basyahulira Farao omo Kũlĩmũ haguma nʼabandu abakamũwatĩkaya bati, Babĩrĩkĩma, bagotsere bũkũtũ, abatabwene, ĩbakwa omo mũyalĩ.

²² Asũrĩa aneyo haguma nʼendeko yiwe yosĩ. Amasinda wuwe amũtĩmbĩreko. Abosĩ bamabĩkwa, ibamabiwa omo mũyalĩ.

²³ Amasinda wabo abĩrĩhĩrwa oko syonũnga syʼobuhya, nʼendeko yiwe ĩtĩmbĩre okwʼisinda yiwe. Abosĩ bamabĩkwa, babiriwa omo mũyalĩ, abaleta erĩũbahya omo kihugo kyʼabandu baliho.

Elamũ

²⁴ Elamũ aneyo nʼendeko yiwe yosĩ ĩtĩmbĩre okwʼisinda yiwe. Abosĩ ĩbabĩrĩkwa, ibabiriwa omo mũyalĩ, abandagalira omo bihande byʼeyĩkwa byʼekihugo isibabwene, abaleta erĩũbahya lyabo omo kihugo kyʼabaliho, babiriheka esĩsonĩ syabo haguma nʼabakandagalira omo buhya.

²⁵ Babĩrĩkokotya engyingo busana naye omo katĩkatĩ kʼabandu abĩtawa haguma nʼendeko yiwe yosĩ. Amasinda wuwe atĩmbĩreyo, abosĩ sibabwene, bĩtawa omo mũyalĩ (nĩkwa erĩũbahya lyabo lyahĩrawa omo kihugo kyʼabandu abaliho) mobaheka esĩsonĩ syabo haguma nʼabandu abakandagalira omo buhya. Mobahĩrwa omo katĩkatĩ kʼabandu abĩtawa.

Mesekĩ na Tũbalĩ

²⁶ Mesekĩ aneyo, na Tũbalĩ, nʼendeko yabo yosĩ. Amasinda wako atĩmbĩre kubo. Abosĩ sibabwene, bĩtĩrwe omo mũyalĩ. Nĩkwa mobaleta erĩũbahya lyabo omo kihugo kyʼabandu baliho.

²⁷ Kandi sibagotsere hakũhĩ nʼesyombangĩ esyawa isisibwene. Ababiriandagalira eKũlĩmũ haguma nʼebindu byabo byʼamalwa, nʼemĩyalĩ yabo eyahĩrawa eyĩkwa oko mitwe yabo. Nĩkwa erisuyira busana nʼebibi byabo liri oko makũha wabo, nomo erĩũbahya lyʼesyombangĩ lyabya omo kihugo kyʼabandu baliho.

²⁸ Nĩkwa omo katĩkatĩ kʼabandu batabwene, wasyabũnwa wasyagotsera haguma nʼabandu abĩtawa omo mũyalĩ.

Edomũ

²⁹ Edomũ aneyo nibya, abami bako, nʼabanya-mwami bako bosĩ, nomo banawite amaka bakahĩrawa haguma nʼabandu abĩtawa omo mũyalĩ. Basyagotsera haguma nʼabatabwene, kandi haguma nabo abakandagalira omo buhya.

³⁰ Kandi hali abakulu bʼelutambi lwʼendata, abosĩ, nʼAbasĩdonĩ bosĩ, nomo banawite erĩũbahya. Busana nʼamaka wabo, mobandagala omo sĩsonĩ. Kitya bakagotsera isibabwene haguma nʼabo bĩtawa omo mũyalĩ, kandi bakaheka esĩsonĩ syabo haguma nʼabakandagalira omo buhya.

Farao

³¹ Farao asyalola Ukwʼaba, kandi asyasĩbĩkĩbwa busana nʼendeko yiwe yosĩ, ye Farao nʼomulondo wuwe gosĩ wʼabasĩrĩkanĩ abĩtawa omo mũyalĩ, Omukama Iye Omwami Mukulu atya.

³² Nomo anahĩra erĩũbahya liwe omo kihugo kyʼabandu baliho, nĩkwa asyagotserĩbwa omo katĩkatĩ kʼabatabwene, haguma nʼabo bĩtawa omo mũyalĩ, ye Farao, nʼe­ndeko yiwe yosĩ, Omukama Iye Omwami Mukulu atya.