Ezekĩelĩ 31 - AMASAKO ABOYTRTRE WA NYAMUHANGA AWAKAHULAWA MO BIBLIA

Nyamuhanga akĩbũkaya Farao erĩkwa lyʼeAsũrĩa

¹ Neryo oko mwaka wʼerĩkũmĩ nʼomuguma oko mukera wʼakasatu, oko kiro kyʼerĩtsũka lyʼomukera, ekĩnywa kyʼOmwami Mukulu mokyambĩkako kiti,

² Mugala wʼomundu, Ubwire Farao omwami wʼeMĩsĩrĩ, nʼendeko yiwe uti, Uli nga ndi omo bukulu bwawe kwehĩ?

³ Lebaya, Asũrĩa abya mũerezĩ eLebanonĩ owʼemitahi mibuya, nʼekyũtũtũ ngʼekyʼomũsĩtũ, nʼobuli bwʼerĩlolya endata kutsibu. Omutwe wago abya omo bĩtũ.

⁴ Nʼamagetsi mwalasyago, nʼemirindi moyayirago mo muli. Haguma nʼesyonyũsĩ syago omuti oyo mwatĩmba aho aherawa, nago mwalabya emigende yago oko miti yosĩ yʼomolĩ.

⁵ Busana nʼekyo obuli bwago mobwalaba emiti yosĩ yʼomolĩ, nʼemitahi minene minene yago moyakanya, nʼemitahi yago moyabya miri-miri busana nʼamagetsi mangi, omugulu alasayayo.

⁶ Esyonyonyũ syosĩ syʼekyanya mosyahĩmba esyonyutu syasyo omo mitahi yago, nʼeyĩkwa wʼemitahi yago esyonyama syʼomolĩ mosyabutirayo, nʼomo kyũtũtũ kyago ebihanda bikulu mobĩkalamo.

⁷ Kwʼabya mubuya atya omo bukulu bwago, nʼomo buli bwʼemitahi yago, kusangwa emĩrĩhĩ yago moyahĩka oko magetsi mangi.

⁸ Emĩerezĩ yʼomwʼirima lya Nyamuhanga moyitatoka eriringirirana nago. Emiti yʼekĩlagũ moyitatoka erisosana nʼemitahi yago, nʼemiti yʼemĩamorĩ moyitatoka eriringirirana nʼemitahi yago. Mohatabya omuti nʼomuguma omwʼirima lya Nyamuhanga owatoka eriringirirana nago oko bubuya bwago.

⁹ Monayirago mo mubuya omo bungi bwʼemitahi yago, nʼemiti yosĩ yʼeEdenĩ, eyabya omwʼirima lya Nyamuhanga, moyatsurago.

¹⁰ Neryo Omukama Iye Omwami Mukulu ati, Kusangwa omuti ni muli oko mubiri, na kusangwa abĩrĩhĩra esingi yago omo bĩtũ, nʼomutima wago akayiheka omo buli bwago.

¹¹ Neryo, nasyahĩrago omo byala byʼembangĩ yʼebihanda. Asyanũbyago kwenene. Nabirihigago busana nʼebibi byago.

¹² Nʼabʼehandi, abatsibu bʼebihanda, babirikondago, neʼrĩsĩgago. Emitahi yago yabiritogera oko bitwa nʼomo misya yosĩ, nʼemitahi minene minene yago yabĩrĩbũnangika omo misya yosĩ yʼekihugo. Nʼebihanda byosĩ byʼekihugo byabĩrĩkĩmĩra omo kyũtũtũ kyago nʼerĩsĩgago.

¹³ Esyonyonyũ syosĩ syʼekyanya syasyĩkala oko kĩma kyago, nʼesyonyama syosĩ syʼomolĩ syasyabya oko mitahi yago eyabiritera,

¹⁴ emiti yosĩ eyiri hakũhĩ nʼamagetsi sĩyĩyĩhamaye busana nʼobuli bwayo, kutse erĩhĩra esingi yayo omo katĩkatĩ kʼebĩtũ, kutse esyombangĩ syayo esĩkapũlaya amagetsi isisyahangana omo buli bwayo. Kusangwa abosĩ bakahĩrawa oko luholo, oko kitaka kyʼeyĩkwa, omo katĩkatĩ kʼabana bʼabandu, haguma nʼabakandagalira omo buhya.

¹⁵ Omukama Iye Omwami Mukulu ati, Oko kiro ekyo andagalira eKũlĩmũ monaleka ihabya ekiriro. Monaswika emirindi kugo, kandi monakakĩrĩrya esyonyũsĩ syago. Nʼamagetsi manene wago mwakakĩrĩbwa. Kandi monaleka eLebanonĩ iyalira busana nago, nʼemiti yosĩ yʼomolĩ moyahonga busana nago.

¹⁶ Monatĩtĩmanĩa ebihanda oko mulenge wʼeritera lyago omugulu nandagalĩrayago eKũlĩmũ haguma nʼabakandagalira omo buhya. Nʼemiti yosĩ yʼeEdenĩ, eyĩkapũlaya amagetsi go ndeke, eyayisogawa nʼemibuya yʼeLebanonĩ, moyakĩranĩbwa omo kihugo eyĩkwa.

¹⁷ Nayo nibya moyandagalira eKũlĩmũ haguma nago ukwʼabo abĩtawa omo mũyalĩ. Nʼabo, ababya maka wago, mobĩkala omo kyũtũtũ kyago omo katĩkatĩ kʼebihanda.

¹⁸ Oko muti wahi omo katĩkatĩ kʼemiti yʼeEdenĩ ukalingirirana utya omo lukengerwa nʼobukulu kwehĩ? Nĩkwa wasyandagalĩbwa haguma nʼemiti yʼeEdenĩ oko kitaka eyĩkwa. Wasyagotsera omo katĩkatĩ kʼabatabwene, haguma nʼabo abĩtawa omo mũyalĩ. Farao kwʼali atya nʼendeko yiwe yosĩ! Omukama Iye Omwami Mukulu akabũga atya.