Ezekĩelĩ 29 - AMASAKO ABOYTRTRE WA NYAMUHANGA AWAKAHULAWA MO BIBLIA

Eritswerwa lyʼeMĩsĩrĩ

¹ Omo mwaka wʼerĩkũmĩ, nʼomukera wʼerĩkũmĩ omo biro byʼerĩkũmĩ nʼebibiri byʼomukera, ekĩnywa kyʼOmwami Mukulu mokyambĩkako kiti,

² Omugala wʼomundu, ũlolaye obũsũ bwawe uku Farao, omwami wʼeMĩsĩrĩ, uminyerere amalwa busana naye, na busana nʼeMĩsĩrĩ yosĩ.

³ Ũbũge uti, Umukama, Iye Omwami Mukulu ati, Ũlebaye, ngalwa nawe, uwe Farao omwami wʼeMĩsĩrĩ, ekiyoka kinene ekĩkere omo katĩkatĩ kʼesyonyũsĩ syako, kyabĩrĩbũga kiti, Olũsĩ lwʼeNĩlĩ lwage ni lwage, ĩngyowene nabirihangikalo.

⁴ Nage nasyahĩra embaniko omo mikese yawe, kandi nasyaleka amahere wʼomo nyũsĩ syawe iniamatira omo bikora byawe, kandi nasyakũlũsya omo nyũsĩ syawe, haguma nʼamahere gosĩ omo nyũsĩ syawe esikamakirira omo bikora byawe.

⁵ Nasyakũsĩganĩa omo mbwarara, uwe nʼamahere gosĩ wʼomo nyũsĩ syawe. Wasyawa omo kisuki. Siwendisyaletwa haguma kutse erikuma-kumwa. Nabirikuha eribya kalyo kʼesyonyama syʼekihugo na busana nʼesyonyonyũ syʼomo kyanya.

⁶ Nʼesyondũlanĩ syosĩ syʼeMĩsĩrĩ syasyaminya ko ndi Mwami Mukulu, kusangwa babiribya mũtso wʼerĩsesa busana nʼekihanda kyʼeĨsraelĩ.

⁷ Omugulu bakuhamba omo byala, mowabũnĩka, kandi mowatulanga ebyala byabo byosĩ. Nʼomugulu bakwegemerako, mowatwĩka, kandi mowaleka esyondungu syabo syosĩ isyalega-lega.

⁸ Neryo, Omukama Iye Omwami Mukulu ati, Lebaya, nasyaleta omũyalĩ ukʼuwe, kandi nasyakubuga kwʼabandu nʼesyonyama.

⁹ Nʼekihugo kyʼeMĩsĩrĩ kyasyabya kĩma nʼomulala. Neryo basyaminya ko ndi Mwami Mukulu. Kusangwa wabũga uti, Olũsĩ lwʼeNĩlĩ ni lwage, nabiriyireteralo,

¹⁰ neryo lebaya, ngalwa nawe, nʼerilwa nʼesyonyũsĩ syawe, ngandisyayira ekihugo kyʼeMĩsĩrĩ mo mulala musa nʼekĩma, erĩtsũka eMĩgdolĩ nʼerĩhĩka eSewene nʼerĩhĩka oko mutano wʼeEtĩopĩa.

¹¹ Sihali kisando kyʼomundu ekyasyalaba mukyo nʼekisando kyʼenyama sikyendisyalabamo, kandi sĩkyendĩsyĩkalwamo omo myaka makũmĩ ani.

¹² Kandi nasyayira ekihugo kyʼeMĩsĩrĩ mo kĩma omo katĩkatĩ kʼebihugo byʼebĩma. Nʼemĩyĩ yayo omo katĩkatĩ kʼemĩyĩ yayirawa mo bĩma, yasyabya mulala emyaka makũmĩ ani. Kandi nasyapanza-panza Abanya Mĩsĩrĩ omo bihanda, nʼeritsatsangabo omo bihugo.

¹³ Kusangwa Omukama Iye Omwami Mukulu ati, Enyũma wʼemyaka makũmĩ ani nasyakuma-kuma Abanya Mĩsĩrĩ omo bihanda eyo bapanzirawa.

¹⁴ Nasyabindula abanyegwa bʼeMĩsĩrĩ, kandi nasyasũbyabo omo kihugo kyʼePatro, omo kihugo babutawamo. Nʼeyo basyabya bwami buke.

¹⁵ Bwasyabya buke kwilaba awandi mami. Kandi sibwendisyaswayisumba endata oko bihanda. Nage nasyakehyabo, ibataswatabala oko bihanda.

¹⁶ Nabo sibwendisyaswabya ekyʼeriyiketera kyʼekihanda kya Ĩsraelĩ, erireka ibibuka ebibi byʼeriyiketera eMĩsĩrĩ. Neryo basyaminya ko ndi Omukama Omwami Mukulu.

¹⁷ Neryo omo mwaka wʼamakũmĩ abiri nʼeyirinda, oko mukera wʼerĩtsũka, nʼoko kiro kyʼerĩtsũka omukera, ekĩnywa kyʼOmwami Mukulu mokyambĩkako kiti,

¹⁸ Omugala wʼomundu, Nebũkadeneza omwami wʼeBabelĩ mwaleka omulondo wuwe wʼabasĩrĩkanĩ iniakola omwatsi munene oko Tĩro. Obuli mutwe mwahĩrwa kʼoluhala, nʼobuli kitigo mokyatũtũkara. Nĩkwa iye nʼomulondo wuwe, mobatabana oluhembo eTĩro busana nʼomũbĩrĩ akolako.

¹⁹ Neryo, Omukama Iye Omwami Mukulu ati, Lebaya, nasyaha ekihugo kyʼeMĩsĩrĩ uku Nebũkadeneza omwami wʼeBabelĩ. Naye asyaheka endeko yako, nʼerĩhũnga obũsokĩ bwako, nʼerihamba ebindu byako. Nabyo byasyabya oluhembo lʼomulondo wuwe.

²⁰ Nabirimuha ekihugo kyʼeMĩsĩrĩ busana nʼomũbĩrĩ ogo akola, kusangwa anyikolera, Omukama Iye Omwami Mukulu atya.

²¹ Oko kiro ekyo nasyahũlũkya erĩsasa lyʼerĩhembe oko kihanda kya Ĩsraelĩ, kandi nasyatanda obuno bwawe omo katĩkatĩ kabo. Neryo basyaminya ko ndi Mwami Mukulu.