Ezekĩelĩ 25 - AMASAKO ABOYTRTRE WA NYAMUHANGA AWAKAHULAWA MO BIBLIA

Eritswerwa lya Amonĩ

¹ Nʼekĩnywa kyʼOmwami Mukulu mokyambĩkako kiti,

² Omugala wʼomundu, ũlolaye obũsũ bwawe oko bagala ba Amonĩ, uminyerere obũyĩgũ busana nabo,

³ Ubwire abana ba Amonĩ uti, Muhulikirire ekĩnywa kyʼomukama Iye Omwami Mukulu! Omukama Iye Omwami Mukulu ati, Kusangwa waseka busana nʼAhabũyĩrĩre hage omugulu hatsandĩbawa, nʼerĩsekererya ekihugo kya Ĩsraelĩ omugulu kyayirawa mo kĩma, nʼeriseka ekihanda kya Yũda omugulu baya omo bunyegwa,

⁴ busana nʼekyo, lebaya, nasyakũhĩra omo byala byʼabandu bʼendata busana nʼerĩkũsĩgalya, kandi basyahĩra ebilaliriro byabo omo katĩkatĩ kenyũ, nʼahʼerĩĩkala lyabo omo katĩkatĩ kenyũ. Basyalya ebĩgũma byawe, kandi basyapũlya amasabũ wenyũ.

⁵ Kandi nasyayira eRaba mo lũlĩsĩryo busana nʼesyongamia, nʼabana ba Amonĩ mo hʼerihumulira hʼebihangulo. Nenyũ mwasyaminya ko ndi Mwami Mukulu.

⁶ Kusangwa Omukama Iye Omwami Mukulu ati, Kusangwa wabirikangatira ebyala byawe, nʼerĩhĩndanga esyongyĩndo syawe nʼeritsema eriniga-niga lyʼomutima wawe oko kihugo kya Ĩsraelĩ,

⁷ neryo lebaya, nabirisumba ebyala byage erilwa nawe, nasyakuha mo munyegwa oko bihanda. Kandi nasyakusolola oko bihanda, nʼerireka iwaherera omo bihugo. Nasyakũherya. Litya wasyaminya ko ndi Mwami Mukulu.

Eritswerwa lya Moabũ

⁸ Omukama Iye Omwami Mukulu ati, Kusangwa Moabũ na Seĩrĩ bakabũga bati, Lebaya, ekihanda kya Yũda ko kine ngʼebihanda byosĩ.

⁹ Neryo lebaya, nasyalũsya oko malambo wa Moabũ emĩyĩ yako, emĩyĩ yako eyiri oko mitano yako, eripipa lyʼekihugo, eBetĩ-Yesĩmotĩ, nʼeBaalĩ-Meonĩ, nʼeKĩrĩataĩmũ,

¹⁰ nasyahakyo mo nzĩgalya oko bana bʼendata, haguma nʼabana ba Amonĩ, abana ba Amonĩ sibibukawe omo bihanda.

¹¹ Nage nasyahĩra eritswera uku Moabũ, nabo basyaminya ko ndi Mwami Mukulu.

Eritswerwa lya Edomũ na Fĩlĩstĩa

¹² Omukama Iye Omwami Mukulu ati, Kusangwa Edomũ abirilwa nʼekihanda kyʼeYũda busana nʼerĩkĩsyakyo, nʼeribana olubanza lũkalĩre, nʼerĩkĩsĩryabo.

¹³ Busana nʼekyo, Omukama Iye Omwami Mukulu ati, Nasyasumba ebyala byage erilwa na Edomũ, nʼerĩĩta mukyo abandu nʼesyo­nyama. Kandi nasyayirakyo mo kĩma. Erĩtsũka eTamanĩ nʼerĩhĩka eDedanĩ basyawa omo mũyalĩ.

¹⁴ Nage nasyahĩra erĩkĩsya lyage uku Edomũ omo byala byʼekihanda kyage Ĩsraelĩ. Neryo basyakola omo Edomũ ngʼerihitana lyage nʼeriagalirwa lyage. Litya basyaminya erĩkĩsya lyage, Omukama Iye Omwami Mukulu atya.

¹⁵ Omukama Iye Omwami Mukulu ati, Kusangwa Abafĩlĩstĩnĩ babirikola omwʼĩkĩsya, kandi babĩrĩkĩsya nʼeriniganiga lyʼomutima busana nʼerĩherya nʼobũyĩgũ bwʼebiro byosĩ,

¹⁶ neryo, Omukama Iye Omwami Mukulu ati, Lebaya, nasyasumba ebyala byage erilwa nʼAbafĩlĩstĩnĩ, kandi nasyĩta Abakeretĩ, nʼerĩherya abasĩgalira bʼoko mũsĩke wʼengetsi.

¹⁷ Kandi nasyahĩra erĩkĩsya lĩnene lyo kubo haguma nʼerikunga lyʼerihitana; nabo basyaminya ko ndi Mwami Mukulu, omugulu nasyahĩra erĩkĩsya lyage lyo kubo.