Ezekĩelĩ 24 - AMASAKO ABOYTRTRE WA NYAMUHANGA AWAKAHULAWA MO BIBLIA

Omũsyo wʼenyungu busana nʼeYerũsalema

¹ Kandi oko mwaka wʼomwenda, oko mukera wʼerĩkũmĩ, nʼoko kiro kyʼerĩkũmĩ kyʼomukera, ekĩnywa kyʼOmwami Mukulu mokyambĩkako kiti,

² Mugala wʼomundu, uyisakire erĩna lyʼekiro, ekiro ekĩ. Kusangwa omwami wʼeBabelĩ abiribambira eYerũsalema ekiro ekĩ kisakisa.

³ Uguse omũsyo busana nʼenyũmba eyĩ yʼerihona, ubwirebo uti, Omukama Iye Omwami Mukulu ati, Uteke enyungu, uteke yoho, gũte amagetsi omwisi wayo.

⁴ Ukuma-kumire muyo ebitswe-bitswe omwisi wayo, obuli kitswe kyowene, ekihinga, nʼekitigo. Ũsũlayeyo mwʼamakũha awasombwere.

⁵ Wĩmaye esisombwere syʼekihangulo, ũhĩre esyongwĩ eyĩkwa wʼenyungu. Ũberayeyo ndeke. Ũhũke amakũha abere omwisi wayo.

⁶ Neryo Omukama Iye Omwami Mukulu ati, Obũlĩge oko mũyĩ wʼomusasi, nʼoko nyungu eyiri kwʼamakenge, nʼamakenge wayo sĩalĩtalũa muyo! Mũlũsaye muyo mwʼekihande kihande, butsira erisombola.

⁷ Kusangwa omusasi wako ali omo katĩkatĩ kago. Mwahĩrago okwʼĩbwe erite kokyĩ. Mwatũtago oko kitaka mwataswikago omo lũtũtũ.

⁸ Inialeka erihitana ĩryahĩka erĩkĩsyago, Nabĩrĩhĩra omusasi wuwe okwʼĩbwe erite kokyĩ, ĩnĩatakũnĩngĩrwa.

⁹ Neryo Omukama Iye Omwami Mukulu ati, Obũlĩge oko mũyĩ wʼomusasi! Nage nibya nasyayira ekilundo mo kinene.

¹⁰ Lundika esyongwĩ, wakaye omuliro, ũhũke esĩswĩ syo ndeke, ũhĩremo obukwa, nʼamakũha ahĩsĩbawe.

¹¹ Neryo utekeyo oko makala wago, ĩhũhe, nʼomulinga wayo ahenaye, ebĩtowene byayo bitoke erinyenyeta, nʼamakenge wayo atoke eriakirira.

¹² Abĩrĩnyĩlũhya omo mũbĩrĩ, nĩkwa amakenge manene wuwe sialiamũlũako. Amakenge wago abye omo muliro.

¹³ Omo nye syawe muli obũsĩngĩrĩ. Kusangwa namakwerya nĩkwa sulitera, siwendĩsyaswerĩbwa kandi kwʼesyonye syawe, erĩhĩka aho asyabugira erikuhitanako.

¹⁴ Ĩngye Mwami Mukulu nabĩrĩbũgakyo— Kikandisyabererera, nage nasyakolakyo. Sindiendisyasasira, kandi Sindiendisyaganyira, kandi sĩndĩendĩsyakwa obũlĩge. Omukama Iye Omwami Mukulu ati, Nasyakutswera ngʼesyonzira syawe, kandi ngʼemĩbĩrĩ yawe kwʼiri.

Omũsyo wʼoluholo lwʼomũkalĩ wa Ezekĩelĩ

¹⁵ Neryo ekĩnywa kyʼOmwami Mukulu mokyambĩkako kiti,

¹⁶ Omugala wʼomundu, lebaya, ngakũlũsaya okwʼisonda lyʼameso wawe naho-naho omo kĩhĩ, nĩkwa susyerira kutse erĩsũsũmana, kutse sũsyesendaya emĩsonĩa.

¹⁷ Ũsĩmbe bũkũtũ-kũtũ, sumoleke omulenge busana nʼabaholĩ. Ubohe eki­tambara oko mutwe wawe, wambale ebiryato byawe oko bisando byawe, kandi suswike esyonderũ syawe, kandi sulye ebyalya byʼabandu.

¹⁸ Ko nabũga nyitya nʼabandu omo ngyakya, nʼomwʼĩgologolo omũkalĩ wage mwahola. Kandi omo ngyakya monakola ngoko nahanawa.

¹⁹ Nʼabandu mobambwira bati, Siwenditubwira emyatsi eyo ukakola nga ni nzumwakĩ ũkwʼĩtwe kwehĩ?

²⁰ Neryo monabwirabo nyiti, Ekĩnywa kyʼOmwami Mukulu mokyambĩkako kiti,

²¹ Ubwire ekihanda kya Ĩsraelĩ, uti, Omukama Iye Omwami Mukulu ati, Lebaya, nasyatsandya ahabũyĩrĩre hage, eripipa lyʼamaka wenyũ, erisonda lyʼameso wenyũ, nʼeritsema lyʼomutima wenyũ. Abagala benyũ nʼabali benyũ abo mwasĩga enyũma basyawa omo mũyalĩ.

²² Nenyũ mwasyakola ngoko nabirikola. Simwendisyaswika esyonderũ syenyũ, kutse erirya akalyo kʼabandu.

²³ Nʼebitambara byenyũ byasyabya oko mitwe yenyũ, nʼebiryato byenyũ oko bisando byenyũ. Simwendisyalira kutse erĩsũsũmana. Nĩkwa mwasyabonda omo bibi byenyũ, kandi mwasyasĩmbanĩa.

²⁴ Neryo litya Ezekĩelĩ asyabya kiminyikalo busana nenyũ. Nʼebyosĩ abirikola, nenyũ mwasyakola mutya. Omugulu ebĩ bĩkahĩka mwasyaminya ko ndi Omukama Iye Omwami Mukulu.

²⁵ Nawe, omugala wʼomundu, sikyendisyabya kitya oko kiro ekyo omugulu nasyalũsya kubo ahakangatĩre habo, obutseme bwʼeriyiheka lyabo, erisonda lyʼameso wabo, nʼobutseme bwʼomutima wabo, ba bagala nʼabali babuta.

²⁶ Ati oko kiro ekyo oyukabala asyakũhĩkako, erĩkowĩsya omo matwĩ wawe?

²⁷ Oko kiro ekyo obuno bwawe bwasyakũmbũlwa oko yukabala, nawe wasyabũga, siwendisyabya ĩkĩrũ kandi. Litya wasyabya kiminyikalo busana nabo. Nabo basyaminya ko ndi Mwami Mukulu.