Ezekĩelĩ 22 - AMASAKO ABOYTRTRE WA NYAMUHANGA AWAKAHULAWA MO BIBLIA

Ebibi byʼeYerũsalema

¹ Kandi ekĩnywa kyʼOmwami Mukulu mokyambĩkako kiti,

² Nawe, mugala wʼomundu, wasyatswerago, wasyatswera omũyĩ oyũ wʼomusasi kwehĩ? Neryo ũmĩnyĩsayego esyonye syosĩ syago.

³ Neryo wasyabũga uti, Omukama, Iye Omwami Mukulu ati, Omũyĩ oyo owakũta omusasi omo katĩkatĩ kago, omugulu wago anganahĩka, nʼowakakola esyosanamu eritatolerego erĩtsandyago.

⁴ Wabiribya nʼolubanza omo musasi ogo wũta, kandi ũtsandĩre omo syosanamu syawe esyo wabirikola. Litya wabirireta ebiro byawe byo hakũhĩ, wabĩrĩhĩka oko myaka yawe. Busana nʼekyo nabirikuyira mo kĩtsũmĩ omo katĩkatĩ kʼebihanda, nʼeribya erisekererwa omo bihugo byosĩ.

⁵ Abali hakũhĩ nʼabali hali kuwe basyakũsekererya, uwe ũtsandĩre omo lĩna, goswĩre nʼomwaga.

⁶ Lebaya, abatabalĩ ba Ĩsraelĩ, obuli muguma ngʼamaka wuwe kwʼali abiribya omwisi busana nʼerĩũta omusasi.

⁷ Babiripona ĩse wabo na koyo wabo ewenyũ. Babĩrĩnũbya ababunga omo katĩkatĩ kenyũ. Babirikola esyongũbĩ nʼomũkwakalĩ bo nabi ewenyũ.

⁸ Wabiripona ebindu byage bĩbũyĩrĩre, kandi wabiritsuma esyo Sabato syage.

⁹ Abakalega abandu bo nabi babiribya omwisi wawe busana nʼerĩũta omusasi. Nʼomwisi wawe babiririra oko hendata hʼebitwa. Babirikola emĩbĩrĩ yʼoluteto.

¹⁰ Ewawe babiriswikula endũmbũ ya tata wabo. Ewawe babirihemula oyo wabya oko mugesera.

¹¹ Nʼomuguma abirikola esyonye haguma nʼomũkalĩ wa mũlĩkyabo, nʼogundi abĩrĩtsandya muka mugala. Nʼogundi ewawe abirihemula mwali wabo, mwali wa tata wuwe.

¹² Ewawe bakĩmaya esigulo busana nʼerĩũta omusasi. Wabĩrĩmya endũndĩ yʼebindu nʼerikanyirira lyʼebindu, kandi wabĩrĩagalya abalĩkyenyũ nʼerĩnũbyabo busana nʼendũndĩ, kandi wabirinyibirirwa, Omukama Iye Omwami Mukulu atya.

¹³ Neryo lebaya, ngaswĩraya nʼebyala byage omwʼihitana busana nʼendũndĩ yawe ite yʼekwenene eyo wabiribana na busana nʼomusasi owabiribya omo katĩkatĩ kawe.

¹⁴ Omutima wawe asĩkĩre erĩyĩyĩnĩa, kutse ebyala byawe byanganakala, omo biro byo nasyakukola omwatsi kwehĩ? Ĩngye Mwami Mukulu, nabĩrĩbũgakyo, nʼakandi nasyakolakyo.

¹⁵ Kandi nasyakupanza-panzira omo katĩkatĩ kʼebihanda, nʼerikutsatsanga omo bihugo, nasyabuga esyonye syawe omwisi syawe.

¹⁶ Wasyayihemula omo meso wʼebihanda. Kandi wasyaminya ko ndi Mwami Mukulu.

Ebibi byʼekihanda kya Ĩsraelĩ

¹⁷ Ekĩnywa kyʼOmwami Mukulu mokyambĩkako kiti,

¹⁸ Mugala wʼomundu, ekihanda kya Ĩsraelĩ kyamabya mahungu busana nage. Abosĩ babiribya mulinga, nʼebatĩ, nʼekyuma, nʼerĩsasĩ omo katĩkatĩ kʼerĩko. Abo ni mahungu wʼekĩtsĩpa.

¹⁹ Busana nʼekyo, Omukama Iye Omwami Mukulu ati, Kusangwa ĩnywe bosĩ mwabiribya mahungu, neryo lebaya, nasyabakuma-kumira omo Yerũsalema.

²⁰ Ngoko bakakuma-kumira ebĩtsĩpa nʼomulinga, nʼekyuma, nʼerĩsasĩ, nʼebatĩ omo lĩko erĩtsũhya kubyo kʼomuliro, erĩnyenyetyabyo, ko nasyabahĩndanĩa omwʼihitana lyage nʼomo eriagalirwa lyage, nʼerĩbahĩramo nʼerĩbanyenyetya.

²¹ Ega, nasyabahĩndanĩa nʼerĩbatsũhya omo muliro wʼerihitana lyage, nenyũ mwasyanyenyetera aho.

²² Ngoko ebĩtsĩpa bĩkanyenyetĩbawa omo lĩko, ko mwasyanyenyetĩbwa mutya aho. Nenyũ mwasyaminya kwĩngye Mwami Mukulu, nabĩrĩbũtũlĩra kwʼerihitana lyage.

²³ Nʼekĩnywa kyʼOmwami Mukulu mokyambĩkako kiti.

²⁴ Omugala wʼomundu, ubwirekyo uti, Uli kihugo ekĩterĩre, kutse eriwa kwʼembũla oko kiro kyʼerihitana.

²⁵ Hali embĩta yʼabamĩnyererĩ bakyo aho mugo, ngʼendale kwʼikaruruma eritulanga enyama yʼobuhiyi. Babirirya esyongebe. Babĩrĩhũnga ebindu nʼebyʼobũgũlĩ. Babĩrĩkanyĩrĩrya abakwakalĩ mugo.

²⁶ Abahererĩ bago babĩrĩhalya oko migambo yage, kandi babĩrĩtsandya ebindu byage bĩbũyĩrĩre. Sibetagabula omo katĩkatĩ kʼebĩbũyĩrĩre nʼebĩtabũyĩrĩre kutse sibetaleka abandu ibaminya ebĩtĩsĩrĩre nʼebyowene, kandi babĩrĩbĩsa ameso wabo oko syoSabato syage, nage nabirihemulwa omo katĩkatĩ kabo.

²⁷ Abanyamwami bako omo katĩkatĩ kago bali ngʼesyoboha esikatulanga enyama yʼobuhiyi, ĩbakũta omusasi nʼerĩherya esyongebe ibatoka eribana endũndĩ yʼamatebo.

²⁸ Nʼabamĩnyererĩ bako babĩrĩyĩhakabya embemba ĩtahĩre, ibakalangira esyonzolĩ syʼamabehĩ, nʼerilagula amabehĩ busana nabo bati, Omukama Iye Omwami Mukulu akabũga, omugulu Omwami Mukulu Sĩalĩtabũga.

²⁹ Abandu bʼekihugo babĩrĩnũbya, kandi bakahũnga, kandi babĩrĩagalya abera nʼabʼobwaga, kandi babĩrĩnũbya omubunga ahate rĩbanza lya kwenene.

³⁰ Nage monasondya omundu omo katĩkatĩ kabo, oyo wangahĩmba olũhĩmbo, nʼerihangana omo mwanya embere syage busana nʼekihugo, isinangaheryakyo. Nĩkwa mondabana mundu.

³¹ Busana nʼekyo nabĩrĩũtũlĩra kubo erihitana lyage. Nabĩrĩokereryabo nʼomuliro wʼerihitana lyage. Nabĩrĩsũbya enzira yabo yʼoko mitwe yabo, Omukama, Iye Omwami Mukulu atya.