Ezekĩelĩ 21 - AMASAKO ABOYTRTRE WA NYAMUHANGA AWAKAHULAWA MO BIBLIA

Omũyalĩ wa Nyamuhanga akatyalĩbawa busana na Ĩsraelĩ

¹ Ekĩnywa kyʼOmwami Mukulu mokyambĩkako kiti,

² Mugala wʼomundu, Ũlolaye obũsũ bwawe ebwanga bwʼeYerũsalema, ũbũge obũyĩgũ-yĩgũ oko habũyĩrĩre, uminyerere obũyĩgũ-yĩgũ busana nʼekihugo kya Ĩsraelĩ.

³ Ubwire ekihugo kya Ĩsraelĩ uti, Omwami Mukulu ati, Lebaya, ngalwa nawe, nasyakula omũyalĩ wage gʼomo lubo lwago, nasyakusolola kwʼabatunganene nʼababi.

⁴ Neryo kusangwa nasyakusolola kwʼabatunganene nʼababi, neryo omũyalĩ wage asyakulika omo lubo lwago nʼeriyalwa nʼabandu bosĩ erĩtsũka elutambi lwʼeyĩkwa nʼerĩhĩka elutambi lwʼendata.

⁵ Litya abandu bosĩ basyaminya kwʼindi nĩ ngye Mwami Mukulu, nabirikula omũyalĩ wage omo lubo lwago. Siendisyaswasuba omo lubo lwago kandi.

⁶ Nĩkwa uwe, mugala wʼomundu, ũsĩmbe nʼomutima akabũnĩka nʼoko bũlĩge bũkalĩre, ũsĩmbe embere syʼameso wabo.

⁷ Neryo omugulu basyakũbũlya bati, Busana nakĩ ũkasĩmba kwehĩ, wasyabũga uti, Busana nʼengulu eyikasa. Obuli mutima akalũa omo nda, nʼebyala byosĩ bikoloba, nʼobuli kĩrĩmũ kikalembera, nʼamarwĩ gosĩ asyakonongoka ngʼamagetsi. Lebaya, ikasa nayo yasyakoleka, Omukama Iye Omwami Mukulu atya.

⁸ Kandi ekĩnywa kyʼOmwami Mukulu mokyambĩkako kiti,

⁹ Omugala wʼomundu, uminyerere, ũbũge uti, Omwami Mukulu atya. Ũbũge uti, Omũyalĩ, omũyalĩ atwĩre, kandi agũsũngwĩre!

¹⁰ Atwĩre, iniatoka erĩĩta. Agũsũngwĩre iniatoka erĩkangabasanĩa ngʼerĩpalya! Kutse tutsange kwehĩ? Omũtso wa mugala wage akapona obuli muti.

¹¹ Nago akahabawa busana nʼerigusungulwa, iniatoka erihambwa omo byala. Omũyalĩ amatyalĩbwa, nʼerigusungulwa, erihago omo byala byʼomwĩtĩ.

¹² Uwe mugala wʼomundu, ulake, ulire, kusangwa akalwa nʼabandu bage, akalwa nʼabakulu bosĩ ba Ĩsraelĩ. Babirihabwa oko mũyalĩ haguma nʼabandu bage. Neryo Ũswĩraye oko ndungu yawe.

¹³ Kusangwa hali erirengwako. Nʼomũtso owakapona amahwaho kwehĩ? Omukama Iye Omwami Mukulu atya.

¹⁴ Neryo uwe, mugala wʼomundu, uminyerere, ukangatire ebyala. Nʼomũyalĩ agombolawe engendo yʼakasatu, omũyalĩ busana nʼabandu abakĩtawa. Nĩ mũyalĩ busana nʼomukulu oyo wĩtawa, oyũkatĩmba kubo,

¹⁵ emitima yabo ĩtwĩke, abangi bawe oko syongyo syabo syosĩ. Nabiriha omũyalĩ owakahenaya. Ĩlolo! Akayirawa busana nʼerĩswĩrya ngʼerĩpalya, agũsũngwĩrye busana nʼerĩĩta.

¹⁶ Ũyĩtegekanaye haguma, ugende oko luhande lwʼamali, uyihande. Ugende oko malembe, ehosĩ eyo ũkalolaya.

¹⁷ Nage nibya ngandisyakangatira ebyala, nasyatũlerya erihitana lyage. Ingye Omwami Mukulu nabĩrĩbũgakyo.

¹⁸ Ekĩnywa kyʼOmwami Mukulu mokyambĩkako kandi kiti,

¹⁹ Nawe, mugala wʼomundu, ũyĩhĩrĩre esyonzira ĩbĩrĩ, omũyalĩ wʼOmwami wʼeBabelĩ ahĩke. Esĩbĩrĩ syosĩ syasyagenda sĩkalũa omo kihugo kiguma. Uyire ekibenete, kyʼerĩmĩnyĩkalya, ũhĩrekyo oko mutwe wʼenzira eyĩlolĩre oko mũyĩ.

²⁰ Wasyahĩra enzira busana nʼekĩnywa erĩhĩka eRaba yʼabana ba Amonĩ, nʼerĩhĩka eYũda, eYerũsalema owakongotere.

²¹ Kusangwa omwami wʼeBabelĩ akahangana omo mahwa wʼenzira, aho mutwe wʼesyonzira ĩbĩrĩ, erilagula. Akasũkaya emisoha, akabũlaya esyosanamu siwe, akalangira omo marepe.

²² Omo byala biwe byʼamali mohahĩka erigereka, eYerũsalema, erĩhĩra emipundo oko syongyo, erĩkũmbũla obuno busana nʼerĩĩta, nʼerisumba omulenge wʼobogo bwʼamalwa, nʼerĩhĩra emipundo yʼerisambula esyongyo; erĩhĩra ebilundo byʼekitaka, erĩhĩmba olũhĩmbo lwʼeribambiraho.

²³ Kyasyabya kubo ngʼerilagula lyʼamabehĩ omo meso wabo. Babĩrĩlahĩrya erĩkalĩre. Nĩkwa akibuka ebibi, ibatoka erihambwa.

²⁴ Busana nʼekyo, Omukama Iye Omwami Mukulu akabũga ati, Kusangwa mwabirireka ebibi byenyũ ibyibukwa, nʼamalolo wenyũ iniaswikulwa, neryo omo mĩbĩrĩ yenyũ yosĩ ebibi byenyũ bikahuluka, kusangwa mwabiryibukwa, mwasyahambwa omo byala.

²⁵ Nawe uwe oyũkwĩre, omundu mubi, omunya-mwami wa Ĩsraelĩ, ekiro kyawe kyamahĩka omo mugulu wʼerisuyira lyʼendũlĩ.

²⁶ Omukama Iye Omwami Mukulu ati, Lũsaya ekitambara, ũlũsaye embĩta. Sibyendisyaswabya bitya. Ũhamaye ekiri ahisi, ũkĩmaye ekiri endata.

²⁷ Ekĩhũma, ekĩhũma, ekĩhũma, nasyayirakyo. Ekĩ nakyo sikyendisyaswabya kitya erĩhĩka aho oyuwite eritswera asyasira, Nage nasyamuhakyo.

Eritswerwa lya Amonĩ

²⁸ Nawe, omugala wʼomundu uminyerere, ũbũge uti, Omukama Iye Omwami Mukulu, akabũga busana nʼabana ba Amonĩ, na busana nʼesĩsonĩ syabo, ũbũge uti, Omũyalĩ, omũyalĩ amakulwa, erigusungulwa busana nʼerĩĩta, busana nʼerĩĩtĩsya, iniatoka eribya ngʼerĩpalya,

²⁹ omugulu bakalangira busana nawe esyonzolĩ syʼamabehĩ, nʼomugulu bakalagula amabehĩ busana nenyũ, erĩkũhĩra oko bĩkya byʼababi ababĩrĩtwa, ekiro kyabo kyamahĩka omo mugulu wʼerisuyira wʼendũlĩ.

³⁰ Ũsũbayego omo lubo lwago. Aho wahangikawa, omo kihugo ekyo wabutawamo, ho nasyakutswerera.

³¹ Nasyũtũlĩra erihitana lyage ukʼuwe. Nasyakubuhira kʼomuliro wʼerihitana lyage, nasyakũhĩra omo byala byʼabandu abakala-kalĩre, abanyima-nyima abʼerĩherya.

³² Wasyabya ngwĩ busana nʼomuliro. Nʼomusasi wawe asyasenda omo katĩkatĩ kʼekihugo. Siwendisyaswibukwa kandi, kusangwa Ĩngye Mwami Mukulu nabĩrĩbũgakyo.