Ezekĩelĩ 2 - AMASAKO ABOYTRTRE WA NYAMUHANGA AWAKAHULAWA MO BIBLIA

Obutsibu bwʼabana ba Ĩsraelĩ

¹ Neryo mwabũga nage ati, Mugala wʼomundu, uhangane oko bisando byawe, nyitoke erĩbũga nawe!

² Nʼomugulu abũga nage Omũlĩmũ mwanyingiramo mwanyĩhanganĩa oko bisando byage, kandi monowa akabũga nage.

³ Neryo mwambwira ati, Mugala wʼomundu, ngakutuma oko bana ba Ĩsraelĩ, abandu bʼerihona ababirinyihonako. Ibo nʼabotata wabo babĩrĩnyĩhalyako erĩhĩka na mũnabwĩre.

⁴ Ngakutuma oko bana bakalakalĩre nʼabatsibu. Nawe wasyabwirabo uti, Omukama Iye Omwami Mukulu atya.

⁵ Nabo bamowa kutse bamatĩndĩowa (kusangwa nĩ kĩtũnga kyʼerihona), nĩkwa basyaminya ko hali omũmĩnyererĩ oyo wabiribya omo katĩkatĩ kabo.

⁶ Nawe uwe mugala wʼomundu, subahebo, kutse subahe ebĩnywa byabo, nomo amahwa nʼemisakisaki biri haguma nawe kandi wĩkere oko syonge. Subahe ebĩnywa byabo, kutse erĩhanga-hangya embere syabo, kusangwa nĩ nyũmba yʼerihona.

⁷ Nawe wasyabwirabo ebĩnywa byage, bamowa kutse bamatĩndĩowa, kusangwa bakahona.

⁸ Nĩkwa uwe mugala wʼomundu, wowe ebyo ngakubwira. Subye oyukahona ngʼekĩtũnga ekyo kyʼerihona. Ũkũmbũle obuno bwawe, ulye ebyo ngakuha.

⁹ Neryo monasamalira, lebaya, ebyala mobyalolya aho nyiri. Neryo lebaya, ekĩrĩngo kyʼekitabu kyabya mubyo.

¹⁰ Omugulu asanzakyo embere syage, kyabya ikyabirisakwako embere nʼenyũma, nʼakandi ĩhasakĩreko ebiriro, nʼerĩsũsũmana nʼobũlĩge.