Ezekĩelĩ 16 - AMASAKO ABOYTRTRE WA NYAMUHANGA AWAKAHULAWA MO BIBLIA

Obubuya bwa Nyamuhanga uku Ĩsraelĩ

¹ Kandi ekĩnywa kyʼOmwami Mukulu mokyambĩkako kiti,

² Omugala wʼomundu, ũmĩnyĩsaye eYerũsalema esyonye syago,

³ uti, Omukama Iye Omwami Mukulu akabwira eYerũsalema ati, Erĩtsũka lyawe nʼeributwa lyawe ni byʼekihugo kyʼOmukanana. Omũamorĩ abya tata wawe, na koyo wawe abya Mũhĩtĩ.

⁴ Nĩkwa busana nʼomwatsi wʼeributwa lyawe, ekiro ekyo wabutawa engundi yawe moyĩtatũbwa, kutse mutakoswa omo magetsi erĩkwerya. Kutse erĩhakabĩbwa omũnyũ nʼahake, kutse eriswikwa ebiremberero nʼahake.

⁵ Sihabya erĩso likakusasira erikukolera emyatsi eyĩ, nʼerikuganyira. Nĩkwa mowaguswa omolĩ, mobakũkwa nye ekiro wabutawa.

⁶ Kandi omugulu nalaba hakũhĩ nawe, monakulolako inukagala-gala omo musasi wawe, nʼomugulu wabya omo musasi wawe, monakubwira nyiti, Ubyeho! Omugulu wabya omo musasi wawe, monakubwira nyiti, Ubyeho!

⁷ Monakuyiia eribya bandu bangi ngʼebiti ebikalasa omolĩ. Neryo mowusuka nʼeribya muli, mowakula eribya wʼemyaka yʼeriambala obutega. Amabere wawe mwasuna nʼesyonzwiri syawe mosyalasa. Nĩkwa wabya ndũmbũ nʼomubiri musa.

⁸ Neryo monalabaho monakulolako, lebaya, omugulu wawe abya omugulu wʼolwanzo. Monasesa omukuyiro wʼolukimba lwage ukʼuwe, monaswika endũmbũ yawe. Kandi monakũlahĩryako monalagana nawe, neryo mowabya wage, Omukama Iye Omwami Mukulu atya.

⁹ Neryo monakwerya omo magetsi, ega, monakwerya ndeke kʼomusasi wawe, kandi monakũhakabya kwʼamagũta.

¹⁰ Monakwambalya olukimba olũtsotsĩre, monakwambalya esyongeta syʼengobĩ syʼenyama yʼomo lũsĩ. Monakuhanga kwʼolukimba lwʼekĩtanĩ monakuswika omo harĩrĩ.

¹¹ Monakũsũga omo byambalo, kandi monahĩra emisege oko byala byawe, nʼobuhulula omo bĩkya byawe.

¹² Monahĩra embũka omo nĩndo yawe, nʼesyombũka omo matwĩ wawe, nʼakakĩra kabuya oko mutwe wawe.

¹³ Neryo litya wabya ũsũyĩre omo syamagetsi nʼebĩtsĩpa. Nʼesyongimba syawe syabya syʼekĩtanĩ kyowene, nʼeharĩrĩ, nʼomũbĩrĩ wʼeritsotsa. Mowalya eyĩsyano yʼenzelele, nʼobuki, nʼamagũta. Litya mowabya omubuya kũndũ. Mowabana omũyĩsa erisosa omwami.

¹⁴ Nʼengulu yawe moyagenda-genda omo katĩkatĩ kʼebihanda busana nʼobubuya bwawe, kusangwa bwabya bũhĩkene busana nʼolukengerwa lwage nakũhĩrako, Omukama Iye Omwami Mukulu atya.

¹⁵ Nĩkwa mowayiketera obubuya bwawe, mowakola ebyʼobũmalaya busana nʼolũkũmayiro lwawe, mowahĩra obũsĩngĩrĩ bwawe oko buli mundu walaba oyũkalĩga.

¹⁶ Kandi mowĩmya oko ngimba syawe, mowayĩkokoterya ahʼendata ĩhasesĩre miringo-miringo, kandi mowakola ebyʼobũmalaya kuho, ebitatolere, erĩhĩka, kutse eribyaho bitya.

¹⁷ Kandi mowĩmya ebindu byʼamalya-bindu byawe wʼobũgũlĩ bwʼesyamagetsi syage nʼebyʼebĩtsĩpa byage, ebyo nakuha, mowayiyirirabyo mwʼesyosanamu syʼabalume, iwatoka erikola ebyʼomũmalaya haguma nabyo.

¹⁸ Neryo mowĩmya esyongimba syawe esĩtsotsĩre mowaswikasyo, kandi mowahera amagũta wage nʼobukwa bwage embere wasyo.

¹⁹ Kandi Omukama Iye Omwami Mukulu ati, Mowĩmya obundu bwage obo nakuha, nʼeyĩsyano yʼenzelele, nʼamagũta, nʼobuki, ebyo nakũlĩsaya, mowaherabyo embere wasyo busana nʼerikumba ndeke. Ko byabya bitya.

²⁰ Kandi wabĩrĩmya abagala bawe nʼabali bawe, abo wanyibutira, bo wabirihongera esyosanamu uti bĩtawe. Obũsĩngĩrĩ bwawe bwabya mwatsi muke kwehĩ?

²¹ Mowĩta abana bage, mowahongabo mo buhere nʼerĩlabyabo omo muliro.

²² Nʼomo katĩkatĩ kʼesyonye syawe syosĩ, nʼobũmalaya bwawe mutibuka ebiro byʼobũlwana bwawe, omugulu wabya ndũmbũ nʼomubiri musa, inukagala-gala omo musasi wawe.

²³ Neryo enyũma wʼobubi bwawe bosĩ [Omukama Iye Omwami Mukulu ati, Obũlĩge, obũlĩge ukʼuwe],

²⁴ mowayĩhĩmbĩra obuhima, kandi mowayĩkokoterya ahʼendata omo buli kibuga.

²⁵ Wabĩrĩhĩmba ahʼendata hawe oko mutwe wʼobuli nzira, kandi wabiriyira obubuya bwawe mo nye. Kandi Wabiritanika emihimbi yawe oko buli mundu ukalaba hakũhĩ, erĩkanyĩrĩrya oluteto lwawe.

²⁶ Kandi wabĩrĩsĩngĩra Abanya Mĩsĩrĩ, abalĩkyenyũ bʼesyongumbu. Kandi wabĩrĩkanyĩrĩrya obũsĩngĩrĩ bwawe, busana nʼerĩnyĩhĩtanĩa.

²⁷ Neryo ũlebaye, nabirisumba ebyala byage erilwa nawe, kandi nabĩrĩkehya akalyo kawe. Kandi nabirikuha okwʼisonda lyʼabakakũkwa obusu, abali bʼAbafĩlĩstĩnĩ, abakahemuka busana nʼemikolere yawe yʼoluteto.

²⁸ Kandi mowakola emyatsi yʼobũsĩngĩrĩ haguma nʼAbasũrĩa, kusangwa wabya ĩsũlĩũgũta. Ega, mowakola emyatsi yʼoluteto haguma nabo, nĩkwa mogũtũgũta.

²⁹ Kandi wabĩrĩkanyĩrĩrya oluteto lwawe nʼekihugo kyʼabatũndya eKaldea. Nĩkwa mogũtũgũta umwʼebyo.

³⁰ Omukama Iye Omwami Mukulu ati, Omutima wawe amalembera ati omugulu ukakola emyatsi eyĩ yosĩ, emikolere yʼomũtetĩ omũkalĩ mutsibu.

³¹ Ĩnũkahĩmba amanyũmba wawe mali-mali omo mahwa wʼobuli nzira, igukayira aho wawe ahendata omo buli nzira, isulitabya ngʼomũmalaya kusangwa ukapona oluhembo.

³² Omũkalĩ oyukateta, oyũkĩmaya abʼehandi omo mwanya wʼĩba wuwe!

³³ Bakaha ebihembo oko bamalaya bosĩ. Nĩkwa uwe ukaha ebihembo byawe oko baragane bawe bosĩ, inukahabo esigulo, ibaminya erĩkũhĩkako oko mbande syosĩ busana nʼobũsĩngĩrĩ bwawe.

³⁴ Litya omo bũsĩngĩrĩ bwawe, uli gundi mũsĩndo oko bandi bakalĩ, kusangwa sihali gundi ukakukwama omo myatsi yawe yʼoluteto, neryo kusangwa ukaha ebindu, isulihabawa bindu. Busana nʼekyo uli wʼogundi mũsĩndo.

³⁵ Neryo uwe mũtetĩ, hulikirira ekĩnywa kyʼOmwami Mukulu.

³⁶ Omukama Iye Omwami Mukulu ati, Kusangwa obubi bwawe mobũtwa eyĩhya, nʼendũmbũ yawe yamaswikulwa busana nʼoluteto lwawe haguma nʼabaragane bawe kandi haguma nʼabaragane haguma nʼesyosanamu syawe syosĩ syʼesyonye syawe, na busana nʼomusasi wʼabana bawe ogo waha esyosanamu.

³⁷ Busana nʼekyo, lebaya, nasyakuma-kuma abaragane bawe bosĩ, abo wabiritsemera, nʼabosĩ abo wabirianza, haguma nʼabosĩ abo wabĩrĩkwa obusu. Nasyahĩndanĩabo erilwa nawe oko mbande syosĩ, kandi nasyaswikulirabo endũmbũ yawe, ibatoka erilangira endũmbũ yawe yosĩ.

³⁸ Nage nasyakutswera, ngʼabakalĩ abakateta nʼabakũta omusasi ko bakatswerawa. Neryo nasyakuletako omusasi wʼerihitana nʼobũha.

³⁹ Kandi nasyakũhĩra omo byala byʼabaragane bawe, nabo basyaterya esyosanamu syawe, nʼerisambula aho wawe ahendata, kandi basyapũra esyongimba syawe, nʼerĩĩmya amabwe wawe mabuya wʼobũgũlĩ, basyakũsĩga ndũmbũ nʼomubiri musa.

⁴⁰ Nabo basyatsotsya endeko ukʼuwe, kandi basyakwĩta omo mabwe, nʼerĩkũtsũtsanga omo mĩyalĩ yabo.

⁴¹ Kandi basyahĩsya amanyũmba wawe omo muliro, nʼerikutswera omusango embere syʼabakalĩ bangi. Neryo nasyakũtsĩrĩsya oluteto, kandi siwendisyaswahemba abaragane bawe.

⁴² Ko nasyakakĩrya litya erihitana lyage ukʼuwe, nʼobũha bwage bwasyakũlũako, nage nasyabondera, sindiendisyaswahitana.

⁴³ Omukama Iye Omwami Mukulu ati, Kusangwa sulitibuka ebiro byʼobũlwana bwawe, nĩkwa wabĩrĩnyĩhĩtanĩa omo myatsi eyĩ yosĩ. Neryo lebaya, nasyasũbya emikolere yawe oko mutwe wawe, isiwendisyakola oluteto olũ endata oko syonye syawe syosĩ esĩ.

⁴⁴ Lebaya, obuli mundu oyũkatwa emĩsyo, asyatũa omũsyo oyũ ukuwe ati, Ngoko nyĩnya ali, na mwali kwʼane atya.

⁴⁵ Uwe uli mwali wa koyo wawe, Oyũkakwa ĩba wuwe nʼabana buwe bʼesyonye. Kandi uli mwali wabo bali benyũ, abakwa abĩba wabo nʼabana babo bʼesyonye. Koyo wawe abya Mũhĩtĩ, na tata wawe abya Mũamorĩ.

⁴⁶ Na mwali wenyũ mukulu nĩ Samarĩa oyo wĩkere oko luhande lwʼelutambi lwʼendata haguma nʼabali buwe. Na mwali wenyũ mulere oyo wĩkere oko luhande lwʼelutambi lwʼeyĩkwa, ni Sodomo, nʼabali buwe.

⁴⁷ Nĩkwa sulitalendera omo syonzira syabo nyisa kutse mutakola ngʼesyonye syabo. Nĩkwa nomo angabya mwatsi muke, wabya iwabiritsanda kwilababo omo mikolere yawe yosĩ.

⁴⁸ Omukama Iye Omwami Mukulu ati, Ngoko nyiriho, Sodomo, mwali wenyũ, nʼabali buwe, Sibetakola ngoko wabirikola uwe nʼabali bawe.

⁴⁹ Lebaya, olubanza lwa mwali wenyũ Sodomo lolũ. Iye nʼabali buwe mobabya nʼobutsibu nʼakalyo, nʼerikamaha butsira mũbĩrĩ, nĩkwa mwatawatĩkya abera nʼabʼobwaga.

⁵⁰ Nabo mobayipipa, nʼerikola esyonye embere syage. Busana nʼekyo omugulu nalangira ekyo monalũsya boho.

⁵¹ Kandi Samarĩa mwatakola nʼekitswe kyʼebibi byawe. Nĩkwa uwe wabĩrĩkanyĩrĩrya esyonye syawe kwilababo. Litya Wabirireka abali benyũ ibabya nga ni babuya busana nʼesyonye syawe syosĩ esyo wabirikola.

⁵² Nawe nibya uheke esĩsonĩ syawe, kusangwa wabiriyira eritswera libuya busana nʼabali benyũ. Busana nʼebibi byawe ebyo wabirikola esyonye esĩlabĩre esyabo, ibo ni batunganene kwilaba we. Ega, uhemuke uheke esĩsonĩ syawe kusangwa wabiriyira bali benyũ eribya ngʼabatunganene.

⁵³ Nage nasyasũbya obunyegwa bwabo, obunyegwa bwa Sodomo nʼabali buwe, nʼobunyegwa bwa Samarĩa nʼobwʼabali buwe, nʼobunyegwa bwawe haguma nabo,

⁵⁴ iwaminya eriheka esĩsonĩ syawe ĩgowene, kandi iwaminya erihemuka busana nʼebyosĩ wabirikola omugulu wasĩbĩkayabo.

⁵⁵ Nʼabali benyũ, na Sodomo nʼabali bako, na Samarĩa nʼabali bako, basyasuba aho wabo hʼerĩmbere. Nawe nʼabali bawe mwasyasuba aho wenyũ hʼerĩmbere.

⁵⁶ Ngoko erĩna lya mwali wenyũ Sodomo mwatahulwa omo mĩnywa yawe oko kiro kyʼeriyiheka lyawe,

⁵⁷ ebibi byawe bite byaswikulwa, lino wabiribya ekĩtsũmĩ kyʼabali ba Edomũ nʼekyʼabosĩ abamũtĩmbĩreko, ekyʼabali bʼAbafĩlĩstĩnĩ, abakũtĩmbĩreko abakakũkwa obusu.

⁵⁸ Wabiririha omwatsi wʼoluteto lwawe nʼesyonye syawe, Omwami Mukulu atya.

⁵⁹ Kusangwa Omukama Iye Omwami Mukulu ati, Nasyakukolera ngoko wabirikola nibya, uwe wabiripona erĩlahĩrya mũkatwa endagano.

⁶⁰ Nĩkwa nasyibuka endagano yage haguma nawe oko biro byʼobũlwana bwawe, kandi nasyahanda endagano yage ya kera na kera haguma nawe.

⁶¹ Nʼaho wasyibuka esyonzira syawe, nʼerĩkwa esĩsonĩ, omugulu wasyangirira abali benyũ, abali benyũ bakulu nʼabalere. Nage nasyakuhabo babye bali bawe, nĩkwa si busana nʼendagano yawe.

⁶² Litya nasyahanda endagano yage nawe, nawe wasyaminya ko ndi Mwami Mukulu,

⁶³ iwaminya eryibuka nʼerĩkwa esĩsonĩ, nʼeritindaswakũmbũla obuno bwawe kera na kera busana nʼesĩsonĩ syawe omugulu namabikubuyira ebyosĩ ebyo wabirikola, Omukama Iye Omwami Mukulu atya.