Ezekĩelĩ 13 - AMASAKO ABOYTRTRE WA NYAMUHANGA AWAKAHULAWA MO BIBLIA

Eritswera abamĩnyererĩ bʼamabehĩ

¹ Neryo ekĩnywa kyʼOmwami Mukulu mokyambĩkako kiti,

² Mugala wʼomundu, uminyerere busana nʼabamĩnyererĩ ba Ĩsraelĩ abakaminyerera, Ubwire abakaminyerera omo mitima yabo ĩbobene, uti, Muhulikirire ekĩnywa kyʼOmwami Mukulu.

³ Omukama Iye Omwami Mukulu ati, Obũlĩge oko bamĩnyererĩ bakĩrũ, abakakwama ekĩrĩmũ kyabo ĩbobene, isibetalangira kyahi!

⁴ Uwe Ĩsraelĩ, abamĩnyererĩ bawe babiribya ngʼesyoboha aho, omo bĩma.

⁵ Simwetahetukira ahasambwĩre, kutse sĩmwetahĩmba olũhĩmbo busana nʼekihanda kya Ĩsraelĩ, mubane erihangana omo malwa oko kiro kyʼOmwami Mukulu.

⁶ Bakalangira amabehĩ, nʼerilagula ebyʼamabehĩ, abakabũga bati, Omwami Mukulu akabũga, omugulu Omwami Mukulu sialitatumabo. Nĩkwa ibabya nʼamaha wʼeribererera lyʼekĩnywa kyabo.

⁷ Simwetalangira esyonzolĩ syʼamabehĩ, kandi simwetabũga erilagula lyʼamabehĩ omugulu mwabũga muti, Omwami Mukulu akabũga kwehĩ? nĩkwa ĩngye mondabũga.

⁸ Busana nʼekyo, Omukama Iye Omwami Mukulu ati, Kusangwa mwabĩrĩbũga amabehĩ, nʼerilangira amabehĩ, neryo Omukama, Iye Omwami Mukulu ati, Neryo lebaya, ngalwa nenyũ.

⁹ Neryo ebyala byage byasyalwa nʼabamĩnyererĩ abakalangira esyonzolĩ syʼamabehĩ, nʼabakabũga erilagula lyʼamabehĩ. Sibendisyabya nʼomwanya omwʼĩhĩndana lyʼabandu bage, kutse sibendisyasakwa omo masako wʼekihanda kya Ĩsraelĩ, kutse sibendisyingira omo kihugo kya Ĩsraelĩ, imwatoka eriminya ko ndi Omukama Iye Omwami Mukulu.

¹⁰ Ni kusangwa babiriteba abandu bage, bati, Obuholo! Isihali Obuholo. Kandi omugulu omundu muguma akahĩmba olũhĩmbo, lebaya, bakahakabayalo embemba.

¹¹ Ubwire abakahakabayalo embemba uti lwasyatera. Hasyabya erigunga lyʼembũla. Nenyũ amatwa manene-manene, mwasyawa nʼekihunga kinene kyasyasa.

¹² Lebaya, omugulu olũhĩmbo lwamabitera, sĩmwendĩsyabũlĩbwa, bati, Kwʼembemba iri hayi eyo mwahakabayalo kwehĩ?

¹³ Busana nʼekyo Omukama Iye Omwami Mukulu ati, Nasyaleta ekihunga kinene kĩkalĩre omwʼihitana lyage. Kandi hasyabya erigunga lyʼembũla, nʼamatwa manene-manene omwʼihitana lyage erĩheryalo omwʼihitana.

¹⁴ Ko nasyaterya olũhĩmbo olo mwahakabaya embemba nʼerĩtereryalo oko kitaka nʼekibanza kyalo ikyaswikulwa. Nʼomugulu lwasyatera, nenyũ mwasyahwera omo katĩkatĩ kalo. Nenyũ mwasyaminya ko ndi Mwami Mukulu.

¹⁵ Neryo nasyaberererya erihitana lyage oko lũhĩmbo olo ko nyitya, nʼukwʼabo abahakabayalo omo mbemba. Nage nasyababwira nyiti, Olũhĩmbo silukiri, nʼabahakabayalo babirigenda,

¹⁶ haguma nʼabamĩnyererĩ ba Ĩsraelĩ abakaminyerera busana nʼeYerũsalema, nʼabakalangira esyonzolĩ syʼobuholo busana nago, isihali Obuholo, Omukama Iye Omwami Mukulu atya.

¹⁷ Nawe, mugala wʼomundu, ukale oko bali bʼabandu bawe, abakaminyerera ebyʼemitima yabo ĩbobene. Nawe uminyerere olubi kubo.

¹⁸ Ũbũge uti, Omukama Iye Omwami Mukulu ati, Obũlĩge oko bakalĩ abakahungira emihungi oko ngokola syosĩ, nʼabakayira ebitambara busana nʼemitwe yʼobuli lulengo, busana nʼeritega emitima! Mwasyatega emitima yʼabandu bage, nʼerĩteya emitima yʼabandi busana nenyũ ĩmwebene kwehĩ?

¹⁹ Kandi mwabirinyitsuma omo katĩkatĩ kʼabandu bage busana nʼamakũndĩ wʼekisusu na busana nʼebitole byʼobundu, erĩĩta ebĩrĩmũ ebite byangahola, nʼerĩbalya ebĩrĩmũ ebiriho ebite byangabyaho, busana nʼeribihira abandu bage abakahulikirira amabehĩ.

²⁰ Neryo Omukama Iye Omwami Mukulu ati, Lebaya, ngalwa nʼemihungi yenyũ eyo mukategamo ebĩrĩmũ byʼabandu, ngʼesyonyonyũ erĩgũlũkyayo, nage nasyasagulayo nʼamaka oko maboko wenyũ. Nasyaleka ebĩrĩmũ ebyo ibyagenda, bye bĩrĩmũ mukatega ngʼesyonyonyũ.

²¹ Nasyasatangya otutambara twenyũ, nʼerĩlamya abandu bage omo byala byenyũ, isibendisyaswabya omo byala byenyũ, eritegwa. Nenyũ mwasyaminya ko ndi Mwami Mukulu.

²² Kusangwa mwabĩrĩagalya emitima yʼabatunganene omo mabehĩ, omugulu nabya nyite nabaha obũlĩge, nĩkwa ĩmwabĩrĩsĩkya omubi, sĩabũnũkale nʼerireka enzira nyibi yiwe, nʼerĩlamya engebe yiwe.

²³ Busana nʼekyo ĩnywe bakalĩ simwendisyaswalola oko nzolĩ syʼamabehĩ, kutse erilagula amalagu, nage nasyalamya abandu bage omo byala byenyũ. Nenyũ mwasyaminya ko ndi Mwami Mukulu.