Ezekĩelĩ 12 - AMASAKO ABOYTRTRE WA NYAMUHANGA AWAKAHULAWA MO BIBLIA

Omũsyo wʼerĩhũngwa lyʼOmunya-mwami wa Ĩsraelĩ

¹ Neryo ekĩnywa kyʼOmwami Mukulu mokyanyĩhĩkako kiti,

² Mugala wʼomundu, uwe wĩkere omo kĩtũnga kyʼerihona, ekiwite ameso wʼerilangira, isibelangira, ekiwite amatwĩ wʼerĩowa, ĩsĩbalĩowa, kusangwa nĩ kĩtũnga kyʼerihona.

³ Neryo, uwe mugala wʼomundu, uyĩtegekanaye busana nawe ebindu byʼerĩhũma ngʼomunyegwa, ugende mo munyegwa omwʼitungi ĩbanalolĩre. Ega, ugende mo munyegwa erĩlũa oko wawe eriya ehandi ĩbanalolĩre. Mbino basyaganĩrya, nomo bane kihanda kyʼerihona.

⁴ Wasyahũlũkya ebindu byawe omwʼitungi ĩbanalolĩre, ngʼebindu byʼobunyegwa. Nawe wasyahuluka omwʼĩgolo-golo ĩbanalolĩre, ngʼabandu abakaya omo bunyegwa.

⁵ Utakule omo lũhĩmbo ĩbanalolĩre, uhekebyo Ulabe aho.

⁶ Usumbe ebindu ebyo oko kitigo kyawe ĩbanalolĩre, kandi uhekerebyo eyĩhya omo mwĩrĩmya. Wasyaswika obũsũ bwawe isiwalangira oko kihugo, kusangwa nabirikuyira mo kiminyikalo busana nʼekihanda kya Ĩsraelĩ.

⁷ Neryo monakola nyitya ngoko nahanawa. Monahũlũkya ebindu byage ĩbũnalolĩre, ngʼebindu byʼomunyegwa. Neryo omwʼĩgolo-golo monatakula omo lũhĩmbo omo byala byage. Monahuluka omo mwĩrĩmya, monaheka ebindu ebyo oko kitigo kyage ĩbanalolĩre.

⁸ Nʼomo ngyakya-ngyakya ekĩnywa kyʼOmwami Mukulu mokyanyĩhĩkako kiti,

⁹ Uwe mugala wʼomundu, ekihanda kya Ĩsraelĩ, ekihanda kyʼerihona, mokĩtakũbũlya kiti, Ukayira uti kwehĩ?

¹⁰ Ubwirebo uti, Omukama Iye Omwami Mukulu ati, Omũsyo oyũ akahula omunya-mwami wʼeYerũsalema nʼekihanda kyosĩ kya Ĩsraelĩ abali mugo.

¹¹ Ũbũge uti, Ingye indi kiminyikalo kyenyũ ngoko nabirikola, ko basyakolwa batya. Basyaya omo bunyegwa omo bũhũngwa.

¹² Nʼomunya-mwami oyuli omo katĩkatĩ kabo asyasumba ebindu biwe ebyo oko kitigo kiwe omo mwĩrĩmya nʼerihuluka, basyatakula ekyũna omo lũhĩmbo aho basyahekerabyo eyĩhya. Asyaswika obũsũ buwe iniatatoka erilangira ekihugo nʼameso wuwe.

¹³ Nasyasesa obutaha-taha bwage endata ukwʼiye, naye asyakwa omo kitego kyage. Nage nasyamuleta eBabelĩ omo kihugo kyʼAbakaldea. Nĩkwa siendisyalangirakyo, nomo asyaholerayo.

¹⁴ Nage nasyapanza-panza oko mahunga gosĩ abandu bosĩ abamũtĩmbĩreko abawatĩkya buwe, erĩmũwatĩkya, nʼemilondo yiwe yosĩ yʼabasĩrĩkanĩ. Nage nasyakula omũyalĩ enyũma kubo.

¹⁵ Nabo basyaminya ko ndi Mwami Mukulu, omugulu nasyapanza-panzabo omo katĩkatĩ kʼebihanda nʼerĩpanzalĩkanĩabo omo bihugo.

¹⁶ Nĩkwa nasyabalya abandu bake ba kubo oko mũyalĩ, nʼenzala, nʼendwala yʼakasũsũ, ibaminya erĩtũla engulu yʼesyonye syabo syosĩ omo bihanda mwʼeyo bakaya, ibatoka erisyaminya ko ndi Mwami Mukulu.

¹⁷ Kandi ekĩnywa kyʼOmwami Mukulu mokyambĩkako kiti,

¹⁸ Mugala wʼomundu, ulye akalyo kawe nʼerititimana, Ũpũlaye amagetsi wawe nʼerititimana nʼengitsi.

¹⁹ Neryo Ubwire abandu bʼekihugo uti, Omukama, Iye Omwami Mukulu akabũga busana nʼesyondũlanĩ syʼeYerũsalema, omo kihugo kya Ĩsraelĩ ati, Basyalya akalyo kabo nʼengitsi, nʼerĩpũlya amagetsi wabo nʼobuyuyu, kusangwa ekihugo kyabo kyasyahũngwa kwʼamaka wakyo, busana nʼobutsibu bwʼabosĩ abĩkere mukyo.

²⁰ Nʼemĩyĩ eyiri mwʼabandu yasyayirwa mo kĩma, nʼekihugo kyasyabya mulala. Nenyũ mwasyaminya ko ndi Mwami Mukulu.

²¹ Neryo ekĩnywa kyʼOmwami Mukulu mokyambĩkako kiti,

²² Mugala wʼomundu, nĩ mũsyo wahi ogo muwite busana nʼekihugo kya Ĩsraelĩ owakabũga ati, Ebiro byamakanyĩbwa, nʼobuli nzolĩ sĩsyetaberererĩbwa kwehĩ?

²³ Neryo ubwirebo uti, Omukama Iye Omwami Mukulu akabũga ati, Nasyaleka omũsyo oyũ ĩnĩũmbya, nabo sibendisyaswabũgago ngʼomũsyo omo Ĩsraelĩ. Nĩkwa ubwirebo uti, Ebiro bĩkahĩka hakũhĩ nʼeribererera lyʼesyonzolĩ syosĩ.

²⁴ Kusangwa Sihendisyaswabya esyonzolĩ syʼamabehĩ, kutse erilagula lyʼekĩsehya omo kihanda kya Ĩsraelĩ.

²⁵ Kusangwa ĩngye Mwami Mukulu nasyabũga, nʼobuli kĩnywa ekyo nasyabũga kyasyakolwa. Sikyendisyaswamala, kusangwa omo biro byenyũ, uwe kihanda kyʼerihona, ngandĩsyabũga ekĩnywa ekyo, kandi nasyaberereryakyo, Omukama Iye Omwami Mukulu atya.

²⁶ Akandi, ekĩnywa kyʼOmwami Mukulu mokyanyĩhĩkako kiti,

²⁷ Omugala wʼomundu, lebaya, ekihanda kya Ĩsraelĩ kiti, Esyonzolĩ esyo akalangira ni syʼebiro bingi ebyasyasa, naye akaminyerera emigulu eyiri hali.

²⁸ Neryo ubwirebo uti, Omukama Iye Omwami Mukulu ati, Sihali nʼekiguma oko bĩnywa byage ekikandisyamala kandi, nĩkwa ekĩnywa ekyo nasyabũga kyasyakolwa, Omukama Iye Omwami Mukulu atya.