Esyonyimbo 9 - AMASAKO ABOYTRTRE WA NYAMUHANGA AWAKAHULAWA MO BIBLIA

Ewasĩngya uku Nyamuhanga busana nʼerĩbanza liwe

Olwimbo lwa Dawĩdĩ. Busana nʼomwĩmbĩrĩrĩ.

¹ Nasyakuha ewasĩngya uwe Mwami Mukulu, nʼomutima wage gosĩ, Nasyakanĩa emĩbĩrĩ yawe yosĩ yʼeriswekera eyo wabirikola.

² Nasyatsema nʼeritsanga busana nawe! Nasyimbira erĩna lyawe erikupipa, Uwe Wʼendata Kutsibu.

³ Esyonzĩgũ syage sikasuba enyũma omugulu ukahuluka; Sikatogera ahisi nʼerihola.

⁴ Kusangwa ukanyihanganira, nʼeriimira omwatsi wage; Ngʼomũtswerĩ oyutunganene, wĩkere oko kĩtũmbĩ kyawe kyʼobwami.

⁵ Wabirikunga ebihanda ebĩtakwasĩ, wabĩrĩherya ababi, Kandi sibendisyaswibukwa na kera.

⁶ Esyonzĩgũ sikahwa kera na kera, Wabĩrĩhĩmbũla emĩyĩ yasyo, Erisyibukasyo siriri kandi.

⁷ Nĩkwa Omwami Mukulu ni mwami kera na kera, Abiritegekanĩa ekĩtũmbĩ kiwe kyʼobwami busana nʼeritswera.

⁸ Asyatswera ekihugo omo litunganene, Akatswera abandu omo lĩbanza litunganene.

⁹ Omwami Mukulu ni hʼerisagira busana nʼabandu abakanũbĩbawa, Omwami Mukulu nĩ nyũmba yʼobuholo oko mugulu wʼobũlĩge.

¹⁰ Abandu abakwasĩ basyayiketera we, Kusangwa uwe Mwami Mukulu sũlĩsĩganaya abakakusonda.

¹¹ Mwimbire Omwami Mukulu yʼesyonyimbo, Oyukatabala eSĩonĩ, Mũkanĩraye emĩbĩrĩ yiwe omo katĩkatĩ kʼebihanda.

¹² Kusangwa oyũkakĩsaya omusasi akibukabo, Sialibirirawa erilaka lyʼabera.

¹³ Uwe Mwami Mukulu, unyiganyire! Ulangire amalĩge wage ago ngagalawamo busana nʼabakanyĩkwa obusu. Uwe Mwami Mukulu unyisabule omo luholo.

¹⁴ Inatoka erihangana erikupipa, Embere syʼabandu bʼeYerũsalema; Nasyatsema kusangwa Wabĩrĩnyĩlamya.

¹⁵ Ebihanda bĩtakwasĩ byabiritobera omo buhya batakula, Babirihambwa omo kitego ekyo batega bũbĩso-bĩso.

¹⁶ Omwami Mukulu abĩrĩyĩmĩnyĩsya, busana nʼeritswera liwe ritunganene, Kandi ababi babirihambwa omo kitego kyʼemĩbĩrĩ yabo.

¹⁷ Ababi basyasuba omo Kũlĩmũ, Nʼebihanda byosĩ ebikibirirawa Nyamuhanga.

¹⁸ Abʼobwaga sibendisyibiriranwa ebiro byosĩ. Kutse amaha wʼabakanũbĩbawa siendĩsyalĩmĩbwa ebiro byosĩ.

¹⁹ Uwe Mwami Mukulu, uhangane! Suleke abandu bakasĩngana, Ulete ebihanda bitswerawe omo meso wawe!

²⁰ Uwe Mwami Mukulu, wĩtebo obuba! Ebihanda biminye ko bali bandu buyira.