Esyonyimbo 89 - AMASAKO ABOYTRTRE WA NYAMUHANGA AWAKAHULAWA MO BIBLIA

¹ Uwe Mwami Mukulu, nasyimba emigulu yosĩ busana nʼolwanzo lwawe olutyusa, Nasyatũla omwatsi wʼeritindalegula lyawe oko mugulu gosĩ.

² Nyĩnasĩ olwanzo lwawe ko lukakota, Kandi eritindalegula lyawe lĩsĩkĩre ngʼekyanya.

³ Wabĩrĩbũga uti, Nabirilagana nʼomundu oyo nayisoga; Nabirilaga omugombe wage Dawĩdĩ, nyiti,

⁴ Omwana wawe asyabya mwami ebiro byosĩ; Nasyabika obwami bwawe busana nʼemigulu yosĩ.

⁵ Omwami Mukulu, emyanya yʼelubula ikimbira emyatsi yʼeriswekera yawe; Ikimba emyatsi yʼeritindalegula lyawe.

⁶ Omo lubula sihali mundu ngʼOmwami Mukulu. Nindi yuli ngʼOmwami Mukulu omo katĩkatĩ kʼababũyĩrĩre bʼelubula kwehĩ?

⁷ Nyamuhanga ni wʼolubahwa omwʼĩbũgĩro lyʼababũyĩrĩre, Abosĩ abakamũtĩmbako bakamubaha.

⁸ Uwe Mwami Mukulu, Nyamuhanga Wʼemilondo, sihali mundu wʼamaka nga we; Uwe Mwami Mukulu, omo myatsi yosĩ Suliregula.

⁹ Ukatabala oko ngetsi eyĩkalĩre; Ũkatũleraya ebisunda byayo ebĩkalĩre.

¹⁰ Mowakĩnda enyama eyo, ye Rahaba, mowĩtayo; Mowakĩnda esyonzĩgũ syawe omo maka wawe awakalĩre.

¹¹ Ekihugo ni kyawe, nʼolubula nibya; Mowahangika ekihugo nʼebyosĩ ebiri mukyo;

¹² Mowahĩra eLutambi lwʼEndata, nʼolwʼEyĩkwa; Ekitwa kyʼeTaborĩ, nʼekyʼeHermonĩ bikakwimbira omo butseme.

¹³ Suli wʼobũtokĩ bungaha! Nʼamaka wawe si mangaha kwehĩ?

¹⁴ Obwami bwawe bũhĩmbĩre oko kibanza kyʼeritunganene nʼerĩbanza; Olwanzo nʼeritendiregula biri omo byosĩ ukakola.

¹⁵ Obutseme buli nʼabandu abakakũramaya omo syonyimbo, Ababyaho, uwe Mwami Mukulu, omo kyakakala embere syawe!

¹⁶ Bakatsema busana nawe omo musibo gosĩ, Kandi bakakupipa busana nʼobubuya bwawe.

¹⁷ Ukatuha erĩkĩnda lĩnene, Omo bubuya bwawe ukaleka ĩtwakĩnda,

¹⁸ Kusangwa Omwami Mukulu mwayisoga Omũhanganĩrĩ wetu, Uwe Oyũbũyĩrĩre wa Ĩsraelĩ, mowatuha omwami wetu.

Erilaga lya Nyamuhanga busana na Dawĩdĩ

¹⁹ Kera omo nzolĩ mowabwira abagombe bawe abateregula, uti, Nabĩrĩhĩra embĩta oko mbangĩ, Nabiriha ekĩtũmbĩ kyʼobwami oko mundu oyo wayisogawa omo katĩkatĩ kʼabandu.

²⁰ Nabiriyisoga omugombe wage Dawĩdĩ, Nabĩrĩmũhakabya ngʼOmwami.

²¹ Amaka wage asyabya haguma naye ebiro byosĩ, Obũtokĩ bwage bwasyamuyira mo wʼakagala.

²² Esyonzĩgũ siwe sisyendĩsyasĩngana, Nʼababi sibendĩsyamũkĩnda.

²³ Nasyalunda esyonzĩgũ siwe, Nasyĩta abosĩ abakamũkwa obusu.

²⁴ Nasyamwanza ebiro byosĩ, nʼeritendiregula lyage lyasyabya naye; Nasyaleka iniabya akakĩnda ebiro byosĩ.

²⁵ Nasyaleka obwami buwe ibwakanya, Erĩtsũka oko ngetsi yʼeMedĩteranĩa nʼerĩhĩka oko lũsĩ lwʼeEfũratĩ.

²⁶ Asyambwira ati, Uli Tata wage, Uli Nyamuhanga wage, omũhanganĩrĩ wage, nʼomũlamya wage!

²⁷ Nasyamuyira mo mugala kambere kage, Yo mwami mukulu oko bami bosĩ bʼekihugo.

²⁸ Nasyamubikira olwanzo lwage olutyusa kera na kera, Nʼendagano yage haguma naye yasyakota.

²⁹ Omwana wuwe asyabya mwami ebiro byosĩ, Obwami buwe bwasyakota ngʼekyanya.

³⁰ Nĩkwa abana buwe bamaketa emigambo yage, Isibalikwama erihamula lyage;

³¹ Bamapona amategeko wage, Isibekenga erĩhano lyage.

³² Neryo nasyasuyirabo busana nʼebibi byabo, Nasyanyambyabo busana nʼamalolo wabo.

³³ Nĩkwa sindiendĩsyũmbya erianza Dawĩdĩ, Kutse eribula erĩberererya endagane yage busana naye.

³⁴ Nĩkwa Sĩndĩendĩsyatwa endagane yage naye, Kutse erikeha omo syondagane namulaga.

³⁵ Kera na kera nabirilaga omo lĩna lyage lĩbũyĩrĩre; Sindiendisyabihira Dawĩdĩ!

³⁶ Asyabya nʼabitsikulu kera na kera, Kandi nasyateya obwami buwe omugulu eryuba lĩkĩnakoleraya.

³⁷ Bwasyakota ngʼomũbangũkĩ, Bwasyabya ngʼomũlangĩrĩ oyuteregula omo kyanya. Erĩsũsũmana busana nʼerĩkĩndwa lyʼOmwami

³⁸ Nĩkwa ukahitana oko mwami wawe oyo wayisogawa; Wabĩrĩmũsĩganĩa nʼerimugana.

³⁹ Wabĩrĩtwa endagane yawe haguma nʼomugombe wawe, Wabirigusa embĩta yiwe oko kitaka.

⁴⁰ Wabĩrĩterya esyombĩmbo syʼomũyĩ wuwe, Nʼerĩsĩganĩa ahawatĩre huwe mo mulala.

⁴¹ Abosĩ abakalabaho bakĩba ebindu biwe; Abalĩkyabo bosĩ bakamuseka.

⁴² Wabiriha esyonzĩgũ siwe erĩkĩnda; Wabĩrĩtsemesya esyonzĩgũ siwe syosĩ.

⁴³ Wabiriyira ebindu byʼamalwa biwe mo buyira, Wabirireka ĩnĩakĩndwa omo malwa.

⁴⁴ Wabirimusagula omũtso wuwe wʼobwami, Wabirigusa ekĩtũmbĩ kiwe kyʼobwami oko kitaka.

⁴⁵ Wabirimuyira mo mũsyakulu embere wʼomugulu wuwe, Wabirimuhemula kutsibu.

Erisaba busana nʼerĩlamĩbwa

⁴⁶ Uwe Mwami Mukulu, Wasyatwĩryahi kwehĩ? Wasyabĩsama kera na kera kwehĩ? Erihitana lyawe lyasyaka ngʼomuliro erĩtwĩryahi kwehĩ?

⁴⁷ Wibuke obũkũhĩ bwʼengebe yʼomundu; Wibuke ngoko wahangika abandu bosĩ ibasyahola!

⁴⁸ Nindi angatoka eribyaho nʼeritindahola kwehĩ? Ko mundu angayĩkakĩrya eritindaya eKũlĩmũ kwehĩ?

⁴⁹ Uwe Mukama, ebĩmĩnyĩsyo bya kera byʼolwanzo lwawe biri hahi kwehĩ? Esyondagane esyo walaga Dawĩdĩ siri hahi kwehĩ?

⁵⁰ Siwibirirawe, Omukama, ngoko ĩngye omugombe wawe, ngatsumawa; Siwibirirawe, ngoko ngayĩyĩnaya omo bĩtsũmĩ byʼabatĩkĩrĩrye.

⁵¹ Uwe Mwami Mukulu, Siwibirirawe kwʼesyonzĩgũ, syawe sikatsuma omwami wawe oyo wayisogawa! Bakamutsuma ehosĩ eyo akaya.

⁵² Tupipe Omwami Mukulu, ebiro byosĩ? Amina! na Amina!