Esyonyimbo 83 - AMASAKO ABOYTRTRE WA NYAMUHANGA AWAKAHULAWA MO BIBLIA

Erisaba Nyamuhanga asĩnge esyonzĩgũ siwe

Olwimbo lwa Asafũ.

¹ Uwe Nyamuhanga, subye bũkũtũ; Uwe Nyamuhanga, suhune, subye bũkũtũ!

² Ulangire! Esyonzĩgũ syawe sikalwa, Nʼabakakũkwa obusu bakahona.

³ Bakaya embĩta erilwa nʼabandu bawe; Bakakanaya haguma erilwa nʼabo ukalembera.

⁴ Bakabũga bati, Mwase, tũtogotaye ekihanda kyabo, Neryo Ĩsraelĩ asyibiriranwa kera na kera.

⁵ Bakalĩga oluhota lwabo, Bakahanana erikubambira.

⁶ Abandu bʼeEdomũ, nʼAbanya Ĩsĩmaelĩ, Abandu ba Moabũ, nʼAbanya Hagarĩ;

⁷ Abandu ba Gebalĩ, na Amũnonĩ, na Amalekĩ, Abandu bʼeFĩlĩstĩa nʼeTĩro,

⁸ EAsũrĩa abirimatikana nabo nibya, Bakawatĩkaya abana ba Lotĩ.

⁹ Ukolebo ngoko wayira Abanya Mĩdĩanĩ, Ngoko wakola Sĩsera na Yabĩnĩ oko lũsĩ lwʼeKĩsonĩ.

¹⁰ Mobakĩndĩrwa eEndorĩ, Nʼemibiri yabo moyahondera oko kitaka.

¹¹ Ukole abakulu babo ngoko wakola Orebũ na Zebũ; Ukole abatabalĩ bosĩ ngoko wakola Zeba na Zalmũna;

¹² Ababũga bati, Tũyĩmĩraye, Ekihugo kya Nyamuhanga.

¹³ Uwe Nyamuhanga wage, upanzebo ngʼolũtũtũ, Ngʼebiti ebikahekawa nʼerihunga.

¹⁴ Ngʼomuliro owakahĩsaya omũsĩtũ. Ngʼomuliro owakahĩsaya ebitwa.

¹⁵ Uhigebo omo kihugo kyawe, Ũhehayebo omo lihunga lyawe erĩkalĩre.

¹⁶ Uwe Mwami Mukulu uswike obũsũ bwabo mwʼesĩsonĩ, Basonde erikukolera.

¹⁷ Bakĩndawe nʼerĩũbahĩbwa kera na kera. Bahole nʼerihemulwa kutsibu!

¹⁸ Neryo baminye kʼuli inina we musa Omwami Mukulu, Omũtabalĩ mukulu wʼekihugo kyosĩ!