Esyonyimbo 79 - AMASAKO ABOYTRTRE WA NYAMUHANGA AWAKAHULAWA MO BIBLIA

Erisaba busana nʼerĩlamya ekihanda

Olwimbo lwa Asafũ.

¹ Uwe Nyamuhanga, abatĩkĩrĩrye babĩrĩhũnga ekihugo kyʼabandu bawe; Babĩrĩtsandya eHekalũ yawe eyĩbũyĩrĩre, Babĩrĩsĩga eYerũsalema mo kĩma.

² Babĩrĩsĩga ebĩnda byʼabandu bawe eriribwa nʼesyonyonyũ syʼekyanya, Babĩrĩsĩga emĩbĩrĩ yʼabagombe bawe busana nʼesyonyama syʼomolĩ.

³ Babĩrĩũta omusasi wʼabandu bawe ngʼamagetsi; Omusasi mwasenda ngʼamagetsi eYerũsalema ehosĩ, Isihali omundu wʼerita ebĩnda.

⁴ Ebihanda ebĩtũtĩmbĩreko bakatuseka, Bakatuseka nʼerĩtũsekererya.

⁵ Uwe Mwami Mukulu Wasyatwĩryahi erituhitanako kwehĩ? Ebiro byosĩ kwehĩ? Erihitana lyawe lyasyaka ngʼomuliro kwehĩ?

⁶ Uhitanire ebihanda ebitekũramaya, Kandi uhitanire abandu abakakupona!

⁷ Babĩrĩĩta abandu ba Yakobo Babiriyira ekihugo kyetu mo mulala.

⁸ Sutusuyire busana nʼebibi byʼaboso-kulu wetu, Nĩkwa utuganyire lino, Kusangwa twamabula maha.

⁹ Uwe Nyamuhanga, Omũlamya wetu, ũtũwatĩkaye, busana nʼerĩsĩkya lyawe; Ũtũlamaye nʼeribuyira ebibi byetu busana nʼerikupipa.

¹⁰ Ko busana nakĩ ebihanda byangatũbũlya bati, Nyamuhanga wenyũ alihi? Uleke tulangire kʼukasuyira ebihanda, Kusangwa bakũta omusasi wʼabagombe bawe!

¹¹ Uhulikirire okwʼĩsĩmba lyʼabandu bʼomũlĩkĩ. Ubohole ababiritswerwa erihola, omo bũtokĩ bwawe bunene.

¹² Uwe Mukama, ulihe ebindi bihanda ngendo sirinda, Busana nʼebĩtsũmĩ ebyo babirikutsuma.

¹³ Neryo ĩtwe, abandu bawe, esyombũlĩ syʼekĩhyo kyawe, Twasyakuha ewasĩngya kera na kera, Twasyakupipa omo migulu yosĩ eyikandisyasa.