Esyonyimbo 78 - AMASAKO ABOYTRTRE WA NYAMUHANGA AWAKAHULAWA MO BIBLIA

¹ Ĩnywe bandu bage, muhulikirire erĩkangĩrĩrya lyage, Mowe ebyo ngabũga.

² Ngandĩbũga nenyũ, Nʼeribabwira erĩkũmbo lya kera.

³ Ngandibabwira emyatsi eyo towa nʼeyo twabiriminya, Eyo aboso-kulu wetu babiritubwira.

⁴ Sĩtwendĩbĩsayo oko bana betu, Tukandisyabwira olulengo olũkasyahĩka, Twasyabwirabo emyatsi yʼeriswekera eyo Mwami Mukulu abirikola, Nʼobũtokĩ buwe nʼemĩbĩrĩ yiwe yʼamaka.

⁵ Mwaha emigambo oko bandu ba Ĩsraelĩ, Kandi mwaha ebihano oko bana ba Yakobo. Mwahamula aboso-kulu, Erĩkangĩrĩrya emigambo yiwe oko bana babo.

⁶ Neryo olulengo olukasubaho lutoke eriigabyo, Nʼeriswabwira abana babo.

⁷ Neryo litya batoke erĩkĩrĩrya Nyamuhanga, Nʼeritindasyibirirwa emĩbĩrĩ eyo Nyamuhanga abirikola, Nĩkwa batoke erikenga ebihano biwe emigulu yosĩ.

⁸ Sibabye ngʼaboso-kulu wabo, Abandu abakayisamambula nʼerĩtendĩowa. Abandu abatawite erĩkĩrĩrya erĩsĩkĩre uku Nyamuhanga, Kandi mobatabya nʼeritindalegula embere sya Nyamuhanga.

⁹ Abana ba Efũraĩmũ, abalwa omo mata nʼemisoha, Mobatswa oko kiro kyʼamalwa.

¹⁰ Mobatakwama endagane yabo na Nyamuhanga; Mobagana erĩowa emigambo yiwe.

¹¹ Mobibirirwa ebyo akola, Nʼebitiko-tiko ebyo akangayabo.

¹² Omugulu aboso-kulu wabo banatungerere, Nyamuhanga mwakola ekitiko-tiko Omo kihugo kyʼeMĩsĩrĩ, omwʼirima lyʼeSoanĩ.

¹³ Kandi mwagaba engetsi, neryo mwalabyabo muyo, Mwakyika magetsi mo kilundo.

¹⁴ Omo musibo mwasondolabo omo kĩtũ, Kandi omo kiro kyosĩ mwasondolabo omo kyakakala kyʼomuliro.

¹⁵ Mwatula mabwe omo mbwarara, Mwahabo amagetsi mangi wʼerĩpũlya ngʼawakalũa omo mirindi.

¹⁶ Mwahũlũkya olũsĩ omo lĩbwe, Ĩnĩakasendaya amagetsi ngʼesyonyũsĩ.

¹⁷ Nĩkwa mobatenderera erĩhalya uku Nyamuhanga, Ibakahona omo mbwarara erilwa nʼOwendata Kutsibu.

¹⁸ Kandi mobalenga uku Nyamuhanga omo mitima yabo, Ĩbakabũlaya akalyo ako basonda.

¹⁹ Mobatonga Nyamuhanga yo nabi bati, Ko Nyamuhanga angatoka erisesa emesa yʼomo mbwarara kwehĩ?

²⁰ Kwenene, mwaswĩrya erĩbwe, nʼamagetsi mwakũnũnũka, Nʼesyonyũsĩ mosyatswaga; Nĩkwa, anganatoka nʼerituha obundu kwehĩ? Anganabana esĩswĩ busana nʼabandu buwe kwehĩ?

²¹ Neryo Omwami Mukulu omugulu owabo, mwahitana, Neryo mwĩta abandu buwe omo muliro, Nʼerihitana liwe molyakanya kubo.

²² Kusangwa mobatabya nʼerĩmwĩkĩrĩrya, Kandi mobatĩkĩrĩrya kwʼakandĩsyalamyabo.

²³ Nĩkwa mwahana ekyanya kyʼendata, Nʼerihana esyonyũyĩ syakyo erikingukala;

²⁴ Neryo mwahabo obundu obũkalũa elubula, Nʼeritumirabo amana busana nʼerirya.

²⁵ Neryo mobalya akalyo kʼabamalaĩka; Nyamuhanga mũgũtyabo kutsibu.

²⁶ Neryo mwalabya erihunga lyʼebwanga bwʼEndata, Kandi omo maka wuwe mwalabya erihunga lyʼeLutambi lwʼEyĩkwa,

²⁷ Mwatumirabo esyonyonyũ nyingi ngʼolũtũtũ, Syabya nyingi ngʼemisege yʼoko mũsĩke wʼengetsi;

²⁸ Esyonyonyũ esyo mosyatogera omo katĩkatĩ kʼekilaliriro kyabo, Esĩkatĩmba oko mahema wabo.

²⁹ Neryo abandu mobalya, mobũgũta, Nyamuhanga mwahabo ebyosĩ ebyo babya banzĩre.

³⁰ Nĩkwa omugulu babya bakinalya, Bate bũgũta, nʼakalyo ikakine omo buno bwabo,

³¹ Nyamuhanga mwahitana kubo, Mwĩta esyombangĩ sya mubo, Kandi mwĩta abalwana babuya ba Ĩsraelĩ!

³² Nĩkwa omo bitiko-tiko byosĩ ebĩ, mobakwamirira erĩhalya, Mobagana erĩkĩrĩya emĩbĩrĩ yʼeriswekera yiwe.

³³ Kyaleka iniabuga ebiro byabo ngʼomuka, Kandi mwabuga emyaka yabo omwʼihera.

³⁴ Nĩkwa omugulu asonda erĩĩta bandĩ, mobasonda-sonda Nyamuhanga, Mobabindula emitima yabo erireka ebibi, nʼerisaba uku Nyamuhanga.

³⁵ Mobibuka ko Nyamuhanga abya mũhanganĩrĩ wabo, NʼOwendata Kutsibu ye Nyamuhanga kwʼali Mũlamya wabo.

³⁶ Nĩkwa ebĩnywa byabo byabya mabehĩ masa-masa; Nʼebyosĩ ebyo babũga byabya kĩsehya.

³⁷ Kandi emitima yabo moyitabya itondekene ukwʼiye, Mobalegula oko ndagane yiwe.

³⁸ Nĩkwa Nyamuhanga mwaganyira abandu buwe. Neryo mwabuyira ebibi byabo, mwataheryabo. Ega, engendo nyingi mwakakĩrya erihitana liwe, Kandi mwakakĩrya erikarama liwe,

³⁹ Neryo mwibuka ko bali bandu buyira, Ibali ngʼerihunga erikatwangana, iritaswasubula.

⁴⁰ Engendo singahi bahona omo mbwarara, Kandi engendo singahi mobamwĩta obũlĩge eyo!

⁴¹ Mobalenga uku Nyamuhanga kandi nʼakandi, Nʼerĩhĩtanĩa Oyũbũyĩrĩre wa Ĩsraelĩ.

⁴² Mobibirirwa Obũtokĩ buwe bunene; Mobibirirwa omugulu alamayabo oko syonzĩgũ syabo,

⁴³ Ngoko akola ebitiko-tiko nʼemĩbĩrĩ ĩkalĩre omwʼirima lyʼeSoanĩ, Nʼebyʼeriswekera omo kihugo kyʼeMĩsĩrĩ.

⁴⁴ Mwahindula esyonyũsĩ syabo mo musasi, Neryo Abanya Mĩsĩrĩ mobatatoka erĩpũlya oko hyũsĩ hyabo.

⁴⁵ Kandi mwatuma amarumbu wʼesĩsũkĩ esyagalayabo, Nʼebikere ebyatsandaya amalima wabo.

⁴⁶ Mwatuma ebinya-buyimbi erirya kalyo kabo, Nʼesyongĩke erĩherya malima wabo.

⁴⁷ Kandi mwĩta emĩrĩkĩ yʼebĩnyũ yabo omo matwa, Nʼemikuyu yabo omwʼitsuku erĩkahĩsayayo.

⁴⁸ Mwĩta esyonde syabo omo matwa, Nʼebihangulo byabo omo karabyo akahũhĩre.

⁴⁹ Kandi mwahĩsyabo omwʼihitana liwe lĩkalĩre nʼerikarama liwe; Erihitana, nʼerikarama, nʼobũlĩge, Eritumirabo omulondo wʼabamalaĩka abakaheraya.

⁵⁰ Mwatakakĩrya erihitana liwe; Kandi mwatabalya esyongebe syabo, Nĩkwa mwaha engebe yabo yʼoko ndwala yʼakasũsũ.

⁵¹ Mwĩta ehimbere hyosĩ hyʼobulume, Omo bĩtũnga byosĩ byʼeMĩsĩrĩ.

⁵² Neryo mwasondola abandu buwe ngʼomũlĩsya, Mwagendyabo erĩlabyabo omo mbwarara.

⁵³ Mwasondolabo omo buholo, neryo mobatubaha; Nĩkwa engetsi moyakũnĩngĩra esyonzĩgũ syabo.

⁵⁴ Mwaletabo oko kihugo kiwe kĩbũyĩrĩ­re, Oko bitwa ebyo akĩnda.

⁵⁵ Kandi mwahiga esyondũlanĩ syako omugulu abandu buwe bahĩkaho; Mwagaba ekihugo omo katĩkatĩ kʼebihanda bya Ĩsraelĩ, Mwĩkalyabo eyo omo mahema wabo.

⁵⁶ Nĩkwa mobahona nʼerirenga uku Nyamuhanga Wʼendata Kutsibu, Mobatowa ebihano biwe.

⁵⁷ Nĩkwa mobahona nʼeriteba ngʼaboso-kulu wabo, Mwayihengeka nʼobuta oyũhengemĩre.

⁵⁸ Mobamũhĩtanĩa omo myanya yabo mitya-mitya yʼerĩramya, Mobaleka inialwa obũha busana nʼesyosanamu syabo esikabatsawa.

⁵⁹ Omugulu Nyamuhanga alangirakyo mwahitana, Neryo mwagana bandu buwe bo kutsibu.

⁶⁰ Mwasĩganĩa ehema yiwe eSĩlo, Eka wuwe omo katĩkatĩ kʼabandu.

⁶¹ Mwalĩga esyonzĩgũ sikahamba erĩsandũkũ lyʼerilagana, Obũtokĩ buwe nʼolukengerwa luwe mobyalolwako.

⁶² Mwahitanira bandu buwe, Kandi mwalĩga esyonzĩgũ syabo erĩĩtabo.

⁶³ Abalwana babo mobakwa omo malwa, Nʼabana-bato babo mobabula abangahĩkyabo.

⁶⁴ Abahererĩ buwe mobakwa omo mũyalĩ, Nʼabakwakalĩ babo mobatatoka eriririra kubo.

⁶⁵ Neryo Omukama mwabuka ngʼabya agotsere; Abya ngʼembangĩ, oyũkabĩlũmba ebĩnyũ.

⁶⁶ Mwakĩnda esyonzĩgũ siwe, Nʼerihemulasyo omwʼĩsonĩ esitehwa.

⁶⁷ Kandi mwagana abitsikulu ba Yosefũ; Mwatayisoga ekihanda kya Efũraĩmũ.

⁶⁸ Nĩkwa mwayisoga ekihanda kya Yũda, Nʼekitwa kyʼeSĩonĩ, ekyo anzĩre kutsibu.

⁶⁹ Nʼeyo mwahĩmba eHekalũ yiwe, ngʼeka wuwe elubula, Mwasĩkyayo ngʼekihugo ekyo abĩrĩsĩkya kera na kera.

⁷⁰ Mwayisoga omugombe wuwe Dawĩdĩ, Mwamũlũsya okwʼĩrĩsya esyombũlĩ,

⁷¹ Mwamũlũsya okwʼirembera esyombũlĩ nʼehyana hyʼesyombũlĩ, Mwamuyira mo mwami wa Ĩsraelĩ, Omũlĩsya wʼabandu ba Nyamuhanga.

⁷² Dawĩdĩ mwalemberabo nʼeritunganene lyʼomutima wuwe, Kandi mwasondolabo nʼamenge.