Esyonyimbo 74 - AMASAKO ABOYTRTRE WA NYAMUHANGA AWAKAHULAWA MO BIBLIA

Erisaba busana nʼerilama lyʼekihanda

Eririra busana nʼerihera lyʼekihugo. Olwimbo lwa Asafũ lwʼamenge.

¹ Uwe Nyamuhanga, busana nakĩ wabiritugusa kwehĩ? Wasyahitana oko bandu bawe kera na kera kwehĩ?

² Wibuke abandu bawe, abo wayisoga eribya bawe kera, Abandu abo watongolaya eribya kihanda kyawe, Wibuke ekitwa kyʼeSĩonĩ, aho wabĩrĩkala!

³ Wase ulendere omo kĩma ekĩkotĩre, Esyonzĩgũ syetu syabĩrĩherya ebyosĩ omo Hekalũ!

⁴ Esyonzĩgũ syawe bakabũgĩraya olukanda ahʼerĩhĩndana lyawe; Syabĩrĩhũnga eHekalũ.

⁵ Basosĩre ngʼabandu bʼomũsĩtũ, Abakakonda emiti omo syombasa syabo.

⁶ Mobatulanga ebisayi byosĩ ebĩbatsĩre, Omo syombasa nʼomo syongonĩ syabo.

⁷ Mobahĩsya eHekalũ yawe yʼomo muliro, Babĩrĩtsandya aho bakakũramĩraya; Babĩrĩheryaho kutsibu.

⁸ Mobayĩsũnza bati, bakatubuga, Babĩrĩhĩsya ahabũyĩrĩre hosĩ ha Nyamuhanga omo kihugo.

⁹ Ebiminyikalo byetu bibũyĩrĩre byabirigenda; Isihakiri abamĩnyererĩ, Kandi Sĩtwasĩ nga byasyabya bitya erĩhĩka mugulu wahi.

¹⁰ Uwe Nyamuhanga, esyonzĩgũ syetu syasyatuseka erĩtwĩryahi kwehĩ? Syasyatsuma erĩna lyawe kera na kera kwehĩ?

¹¹ Wabirigana erĩtũwatĩkya busana nakĩ kwehĩ? Busana nakĩ ũkabĩsa ebyala byawe enyũma kuwe kwehĩ?

¹² Nĩkwa uwe Nyamuhanga, utula Mwami wetu, Ũkasĩngana omo kihugo.

¹³ Mowagaba engetsi omo kagala kawe, Mowatũa emitwe yʼesyonyama nene-nene syʼomo ngetsi.

¹⁴ Mowahĩmata emitwe yʼenyama Levĩatanĩ, Kandi mowaha omubiri wayo oko bandu bʼembwarara eriryago.

¹⁵ Mowaleka esyongũnũnũko nʼesĩsoko isyasenda; Kandi mowũmya esyonyũsĩ nene-nene.

¹⁶ Mowahangika omusibo nʼekiro, Kandi mowahĩra eryuba nʼomukera omo myanya yabyo.

¹⁷ Mowahĩra emitano yʼekihugo; Mowahĩra ebirimo byʼomũtũta nʼebyʼeritsuku.

¹⁸ Nĩkwa Omwami Mukulu Wibuke, ngoko esyonzĩgũ syawe sikakuseka, Kandi abandu bakĩrũ bakakupona.

¹⁹ Sũsĩganaye abandu bawe bolo oko syonzĩgũ syabo, sĩkalĩre, Siwibirirawe abandu bawe abakendererĩbawa.

²⁰ Wibuke endagano eyo walagana netu. Hali omwaga omo syongonde syosĩ syʼekihugo omo mwĩrĩmya!

²¹ Suleke abakanũbĩbawa erĩkĩndwa; Nĩkwa uleke abera nʼabʼobwaga bakupipe.

²² Uwe Nyamuhanga, uhangane, Uhanganire omwatsi wawe! Wibuke abatekukenga ko bakakuseka omo musibo gosĩ!

²³ Siwibirirawe emirenge yʼerihitana yʼesyonzĩgũ syawe, Siwibirirawe olukanda lwʼemigulu yosĩ lwʼesyonzĩgũ syawe.