Esyonyimbo 72 - AMASAKO ABOYTRTRE WA NYAMUHANGA AWAKAHULAWA MO BIBLIA

Erisaba busana nʼomwami

Olwimbo lwa Solomono.

¹ Uwe Nyamuhanga, ũkangĩrĩraye omwami eritswera omo litunganene ryawe, Kandi ũkangĩrĩraye omugala wʼOmwami eritunganene ryawe.

² Litya atabale oko bandu bawe omo lĩbanza litunganene,

³ Neryo ekitaka kibane omugaso; Nʼekihanda kyʼabandu kibane eritunganene.

⁴ Omwami atswere abera bo ndeke; Kandi awatĩkaye abali nʼobwaga, Nʼerĩkĩnda abakanũbaya.

⁵ Bakubahe omugulu eryuba lĩkĩnakoleraya, Nʼoko mugulu omukera akinaleta ekyakakala, omugulu gosĩ.

⁶ Abye ngʼembũla omo malima, Ngʼembũla yʼobunyenye kwʼikawa oko kitaka.

⁷ Ekitunganene kikanye omugulu akabyaho, Nʼomugaso abyeho omugulu omukera akĩnakoleraya.

⁸ Obwami buwe bwasyahĩka oko ngetsi nʼoko yindi ngetsi, Erĩtsũka oko Lũsĩ Efũratĩ nʼerĩhĩka oko ndũlĩ syʼekihugo.

⁹ Abandu bʼomo mbwarara basyũnama embere siwe; Nʼesyonzĩgũ siwe syasyagotsera ahisi omo lũtũtũ.

¹⁰ Abami bʼEspanĩa nʼabami bʼoko bitsira basyamuha esyonzũnzo, Abami bʼeArabĩa nʼabʼeEtĩopĩa basyamuletera omuhako.

¹¹ Abami bosĩ basyũnama embere siwe, Nʼebihanda byosĩ byasyamukolera!

¹² Asyalamya abera abakamulakira, Nʼabali nʼobwaga, nʼabakasĩganĩbawa.

¹³ Akaganyira abera, nʼabandu bolobolo; Akalamaya esyongebe syʼabandu abali nʼobwaga.

¹⁴ Akalamayabo okwʼĩnũbya nʼobwaga; Esyongebe syabo nĩ syʼobũgũlĩ bunene busana naye.

¹⁵ Omwami akote! Ahabawe esyamagetsi esĩkalũa eArabĩa; Erisaba lĩbũgawe busana naye emigulu yosĩ; Eritsumula lya Nyamuhanga limubyeko emigulu yosĩ!

¹⁶ Engano ibyeho nene omo kihugo; Nʼehitwa hyũsũle mwʼebyalya ngʼebiri eLebanonĩ. Emĩyĩ yosũle mwʼabandu ngʼebiti ebikalasa omolĩ.

¹⁷ Erĩna liwe siribiriranawe na kera; Engulu yiwe ikote ngʼeryuba. Abandu bayitsumule busana naye, Ebihanda byosĩ bipipe Omwami.

¹⁸ Mupipe Omwami Mukulu Nyamuhanga, Nyamuhanga wa Ĩsraelĩ, Oyukakola emyatsi eyi yʼeriswekera!

¹⁹ Mupipe erĩna liwe lyʼolukengerwa kera na kera, Nʼolukengerwa luwe lũsũlaye ekihugo kyosĩ! Amina! Amina!

²⁰ Erisaba lya Dawĩdĩ, mugala wa Yese, lĩtwĩrĩrye aho.