Esyonyimbo 69 - AMASAKO ABOYTRTRE WA NYAMUHANGA AWAKAHULAWA MO BIBLIA

Erilaka busana nʼerĩwatĩkĩbwa

Busana nʼomwĩmbĩrĩrĩ, Ikimbawa oko biranga-ranga. Olwimbo lwa Dawĩdĩ.

¹ Ũnyĩlamaye, uwe Nyamuhanga! Kusangwa amagetsi amahĩka oko bĩkya byage;

² Namatobera omo londo luli-luli, ahate ahʼerihangana Namahĩka omo mirindi yʼamagetsi, nʼebisunda bikasonda erĩnyĩsendya.

³ Namaluha omwʼilakira erĩwatĩkĩbwa nʼomumero wage amuma. Ameso wage akabulirayo busana nʼerĩsondya erĩwatĩkĩbwa na Nyamuhanga.

⁴ Abakanyĩkwa obusu ahate ekikaleka, Ni bangi kwilaba esyonzwiri syʼoko mutwe wage; Esyonzĩgũ syage syʼamabehĩ sĩkalĩre, sikasonda erĩnyĩta. Bakanyihatikana erĩsũbũlya ebindu ebyo ndĩba.

⁵ Uwe Nyamuhanga, ũnasĩ ngoko nyiri mũkĩrũ; Ebibi byage sũlĩbĩsawabyo!

⁶ Suleke ngahemula abayiketera we, uwe Mwami Mukulu, Nyamuhanga wʼemilondo! Uwe Nyamuhanga wa Ĩsraelĩ, Suleke ngahemula abakakũramaya!

⁷ Ni busana nawe ngatsumawa, Kandi busana nawe ngahemuka kutsibu.

⁸ Nyiri ngʼowʼehali oko bagala betu, Nyiri ngʼowʼekindi kihugo oko kĩtũnga kyetu.

⁹ Omũhwa wʼenyũmba yawe akagulumira omwisi wage ngʼomuliro; Nʼebĩtsũmĩ ebyo bakakutsuma bikanyibyako.

¹⁰ Ngayĩkehaya omwʼitsira akalyo, Neryo abandu bakanyitsuma;

¹¹ Ngambala emisarandwe, Neryo bakanyiseka.

¹² Bakanyitongera omo syonzira, Neryo indi lwimbo lwʼabakũndĩrya.

¹³ Nĩkwa ĩngye, ngandikusaba, uwe Mwami Mukulu, Ũnyĩsũbĩraye, Nyamuhanga, oko mugulu ukayisoga, Busana nʼolwanzo lwawe lunene, kandi kusangwa Suliregula erilaga lyawe lyʼerĩlamya.

¹⁴ Suleke ngatobera omo londo; ũnyĩlamaye. Ũnyĩtegaye oko syonzĩgũ syage, nʼomo mirindi yʼamagetsi aya.

¹⁵ Suleke erigunga lyʼamagetsi likanyikunungula, Suleke ngasenda omo mirindi, Kandi Suleke ngatobera omwʼisinda.

¹⁶ Uwe Mwami Mukulu ũnyĩsũbĩraye, Busana nʼobubuya bwʼolwanzo lwawe olutyusa; Unyikebere, busana nʼeriganyira lyawe lĩnene!

¹⁷ Sũyĩbĩse oko mugombe wawe; Indi omo bũlĩge bunene, ũnyĩsũbĩraye lũba!

¹⁸ Wase hakũhĩ, Ũnyĩtongolaye; Ũnyĩlamaye oko syonzĩgũ syage.

¹⁹ Ũnasĩ ngoko ngatsumawa, nʼerihemulwa, nʼeriponwa; Uwe unemulangira esyonzĩgũ syage syosĩ.

²⁰ Ebĩtsũmĩ byabĩrĩtwa omutima wage, nyĩkwĩre ngitsi. Nabya nʼamaha wʼeriyirwa embũlũlĩ nĩkwa mondabanayo. Monasondya abasĩbĩkya, nĩkwa mondabanabo.

²¹ Omugulu nawira, mobamba obuti Kandi omugulu nakwa enyota, mobamba epada.

²² Erirya lyabo libye kitego kubo; Nʼemesa yabo embere syabo ibye mũlyatĩ.

²³ Ameso wabo abye mwĩrĩmya, ibatatoka erilangira; Uyire emigongo yabo mo myolomyolo emigulu yosĩ!

²⁴ Gũtũlĩre erihitana lyawe lyo kubo; Nʼerikarama lyawe rihambebo!

²⁵ Enyũmba yabo ibye kĩhũma; Sihabye mundu oyuliho akasĩgala omo mahema wabo!

²⁶ Bakendereraya abo wabirisuyira; Bakakanaya amalĩge wʼabo wabĩrĩhũtalya.

²⁷ Ũkanyaye ebibi byabo; Suleke bakasangira erĩlamya lyawe.

²⁸ Amena wabo asangulawe omo kitabu kyʼabaliho; Kandi sibasakawe omo katĩkatĩ kʼabandu bawe.

²⁹ Nĩkwa ĩngye nyiri nʼobwaga, ngagalawa; Unyisumbe, Nyamuhanga, ũnyĩlamaye!

³⁰ Nasyapipa Nyamuhanga omo lwimbo; Nasyakanganĩa obukulu buwe erimuha ewasĩngya.

³¹ Ekĩ kyasyatsemesya Omwami Mukulu kwilaba erimuherera enume, Kyasyamũtsemesya kwilaba erimuha enume nene-nene.

³² Omugulu abʼobwaga basyalangira ekĩ basyatsema; Ĩnywe mũkaramaya Nyamuhanga emitima yenyũ isube omo nda,

³³ Omwami Mukulu akowa abali nʼobwaga, Isialibirirawa abandu buwe omo mũlĩkĩ.

³⁴ Mupipe Nyamuhanga, olubula nʼekihugo, Esyongetsi nʼesyonyama syosĩ esiri mubyo simupipe!

³⁵ Kusangwa Nyamuhanga asyalamya eSĩonĩ, nʼerĩswahĩmba emĩyĩ ya Yũda; Abandu buwe basyĩkalayo nʼerĩsĩgalya ekihugo;

³⁶ Nʼabana bʼabagombe buwe basya sĩgalya ekihugo. Nʼabandu abanzĩre erĩna liwe basyĩkalayo.